Biopsiya müayinəsi Ələsgər Məmmədlinin xərçəng olmadığını göstərib
“Toplum Tv işi” – Ələsgər Məmmədli
Dörd aydır “Toplum TV işi” üzrə həbsdə saxlanılan media hüququ üzrə tanınmış ekspert Ələsgər Məmmədlidən götürülmüş analizin nəticələri açıqlanıb. Götürülmüş biopsiyanın nəticələrinə görə, onun boğaz nahiyyəsindəki şişin xoşxassəli olduğu müəyyən edilib. Amma Məmmədlinin yaxınları açıqlanan nəticələrə şübhə ilə yanaşırlar.
- Bakı yeni prezident seçildikdən sonra İranla münasibətlərin fəal inkişafını gözləyir
- “Cənubi Qafqaz Trampın planlarına daxildirmi?” Bakıdan baxış
- Azərbaycan növbəti Avropa strukturu ilə əməkdaşlıqdan imtina edib
İyunun 22-də 1 saylı Bakı İstintaq Təcridxanasında saxlanılan “Toplum TV” internet nəşrinin təsisçisi Ələsgər Məmmədlinin qalxanabənzər vəzində aşkar olunan şişdən özəl klinikada (West Hospital) iynə biopsiyası götürülmüşdü. Müayinə Məmmədlinin özünün, ailə üzvlərinin və vəkillərinin uzun sürən tələblərdən sonra həyata keçirilmişdi. Amma bu barədə ailəsinə və vəkillərinə məlumat verilməmişdi.
Daha sonra o, özümüm istədiyi həkim tərəfindən müayinə olunmasına şərait yaradılmadığını, müayinə zamanı pis rəftara məruz qaldığını açıqlamışdı.
“Faktiki olaraq müayinə ilə bağlı məhkəmə qərarının icrasına təhlükəsizlik orqanlarının əməkdaşları imkan verməyib. Əməliyyat otağına daxil olan çoxsaylı polis, prokurorluq və digər hüquq mühafizə orqanlarının əməkdaşları Ələsgər bəyin istədiyi və məhkəmə qərarında adı çəkilən həimlərin iştirakının qarşısını alıblar. Elə həmin andan biopsiya nəticələrinin etibarlılığına şübhə yaranmışdı”, – deyə Ələsgər Məmmədlinin qardaşı Nəsimi Məmmədli bildirib.
Ələsgər Məmmədli bu məsələ ilə bağlı iyulun 5-də BMT İnsan Hüquqları Komitəsinə şikayət göndərib.
Müayinə nəticələri açıqlananadan sonra Nəsimi Məmmədli “Amerikanın Səsi”nə bildirib ki, iyulun 8-də qardaşı ilə telefonla danışıb.
“Əlsəgər bəy təcridxanadan zəng etmişdi. O bildirdi ki, keçən həftəsonu biopsiyanın nəticəsi açıqlanıb. Görüntünün kistik degenerativ xoşxassəli follikulyar düyün ilə uyğun gəldiyi bildirilib. Şişin xoşxassəli olması sevindirici xəbər olsa da, buna şübhəli yanaşmağımıza ciddi əsaslar var.
Belə ki, Ələsgər bəy həbsindən 1 saat öncə özəl klinikada ultrasəs müayinəsi olunmuşdu. O zaman qalxanvari vəzinin boyun hissəsində, sol payda 23 millimetr ölçüdə heterogen, periferik, vaskulyarizasiyalı TİRADS III düyün (50-75% xərçəng ehtimalı) aşkar edilmişdi. Eləcə də qandan götürülən digər analizlərin cavabları da şişin təhlükəli xarakterli olması ehtimalından xəbər verirdi. Cərrah endokrinoloq biopsiya ilə yanaşı 10 tibbi komponent üzrə qan analizinin vacibliyini tövsiyə etmişdi.
Ancaq təhlükəsizilik qüvvələri Ələsgər bəydən biopsiya götürülən zaman digər analizlərin götürülməsinə imkan verməyib. Beləliklə, biopsiyanın cavabları Ələsgər bəyi və ailə üzvlərini qane etməyib. Bu nəticə xəstəliyin dəqiq diaqnozunu qoymaq üçün yetərli deyil. Cərrah endokrinoloq da USM nəticələri ilə biopsiya nəticələri arasında uyğunsuzluq olduğunu bildirib. Tiroid biopsiyası ilə yanaşı, TSH, ST4, tireoglobulin, bilirubin fraksiyaları, GGT, ALT, AST, Amilaza, şəkər HbAıC, kreatin, qanın ümumi analizinin təcili verilməsini tövsiyə edib. Cərrahi əməliyyat ehtimalını istisna etməyib”, – deyə o qeyd edib.
Nəsimi Məmmədli deyib ki, qardaşı boğulmadan əziyyət çəkir.
“Boğazdakı düyünün ölçüsü böyükdür. Biopsiyanın nəticəsini etibarlı hesab etmirik. Təhlükəsizlik qüvvələrinin kobud nəzarəti və pis rəftarı ilə təkrar qarşılaşmamaq üçün təcridxana şəraitində cərrahi əməliyyatı həyatına təhlükə sayırıq. Bu şəraitdə ağrı-acı içərisində təcridxanada qalmağı təhlükəsizlik qüvvələrinin ləyaqəti alçaldan pis rəftarına məruz qalaraq müayinəyə aparılmaqdan daha üstün tuturuq. Ölkənin ən işıqlı aydınlarından biri tamamilə təqsirsiz, sübutsuz, dəlilsiz, qanunsuz və xəstə halı ilə həbsdə saxlanır. Ölkə içərisində bu haqsızlığı dayandıracaq heç bir güc təəssüf ki, yoxdur”, – deyə o bildirib.
Nəsimi Məmmədli əlavə edib ki, telefon danışığı zamanı Ələsgər bəyin səsi yenə də zəif və yorğun gəlib:
“Boğazındakı şiş onun yatmasına əngəl yaradır və yuxusuzluqdan əziyyət çəkir. İsti hava, qapalı şərait, boğulma halı və davamlı baş ağrısı onun səhhətində getdikcə ağır fəsadlar yaradır”.
Martın 6-8-də “Tolum TV” və onun tərəfdaş təşkilatı Demokratik Təşəbbüslər İnstitutunun 9 əməkdaşı saxlanılıb. Onlar xarici valyuta qaçaqmalçılığında ittiham olunurlar. Yeddi nəfər barədə həbs qətimkan tədbiri seçilib, iki nəfər isə polisin nəzarətinə verilib.
Onlardan biri – “Toplum TV”nin təsisçisi Ələsgər Məmmədli martın 8-də qalxanabənzər vəzisində yaranmış şişin müayinəsi üçün getdiyi klinikanın həyətindəcə polislər tərəfindən saxlanılıb.
