Tbilisidə etiraz aksiyaları nəticəsində həbs olunan Lazar Qriqoriadisin hüquqları pozulub - müstəqil vəkillər
Lazare Qriqoriadis kimdir?
Gənc Hüquqşünaslar Assosiasiyası bildirir ki, 7-9 mart aksiyaları ilə bağlı həbs edilən Lazare Qriqoriadisin hüquqları pozulmuş ola bilər.
Bu açıqlamanı nüfuzlu qeyri-hökumət təşkilatı Qriqoriadislə bağlı mümkün qanun pozuntusuna dair konkret misallar göstərərək, ictimaiyyətə açıq məlumatlar əsasında verib.
İctimai marağın yüksək olmasına baxmayaraq, Lazare Qriqoriadis barəsində iki aylıq həbs-qətimkan tədbiri seçildiyi məhkəmə iclasında bu qərarın səbəbləri açıqlanmayıb.
Qriqoriadisə gəlincə, təqsirsizlik prezumpsiyası pozulub – rəsmilər öz bəyanatlarında gənci qanunsuz hərəkətlərdə birbaşa ittiham ediblər.
Qriqoriadisə baş çəkmiş vəkillər aprelin 3-də bildiriblər ki, istintaq idarəsinin əməkdaşları Qriqoriadisi ona kompromat təqdim etməyə məcbur edə bilərdilər.
Aprelin 3-də Qriqoriadisin vəkili isə müttəhimin saçının zorla qırxıldığını bildirib.
Düzdür, Penitensiar xidmət bu məlumatı təkzib edib, lakin Assosiasiya hesab edir ki, məhbusun hüquqları pozulmuş ola bilər.
Təşkilat Xüsusi İstintaq Xidməti və Xalq Müdafiəçisini səlahiyyətləri çərçivəsində hərəkət etməyə çağırır.
- “Xalqa Rusiya yox, Avropa lazımdır” – Gürcüstan prezidentinin parlamentdəki çıxışı
- “Xalqın gücü”: Gürcüstanın hakim partiyasının xidmətində olan Qərb əleyhinə hərəkat
- Saakaşvili: səhhəti, həbsxana şəraiti, onu nələr gözləyir? Video və suallara cavab
Lazare Qriqoriadis kimdir?
Martın 29-da 21 yaşlı Lazare Qriqoriadis mübahisəli “xarici agent qanunu”nun qəbuluna qarşı nümayişlər zamanı polis əməkdaşına hücum və başqalarının əmlakını məhv etmək ittihamı ilə həbs olunub. Ona martın 30-da, günortadan sonra istintaq təcridxanasında rəsmi ittiham irəli sürülüb. Martın 31-də şəhər məhkəməsi Qriqoriadis barəsində həbs-qətimkan tədbiri seçib.
Qriqoriadis hazırda 7-9 mart etirazları ilə bağlı həbs edilən yeganə şəxsdir. İttiham tərəfi Qriqoriadisin polis əməkdaşlarına iki şüşə molotov kokteyli atdığını və polis avtomobilini yandırdığını sübuta yetirsə, onu 11 ilə qədər həbs gözləyir.
Martın 7-9-da Tbilisinin mərkəzinə on minlərlə etirazçı toplaşıb. Onlar Gürcüstan parlamentinin birinci oxunuşda qəbul etdiyi “Xarici təsir agentləri haqqında” qanuna etiraz ediblər. Polis üç gün ardıcıl olaraq etirazçıları dağıtmaq üçün su şırnaqları və gözyaşardıcı qazdan istifadə edib. Etirazçılar bir neçə molotov kokteylindən istifadə ediblər. Sonda hökumət güzəştə getməyə məcbur olub – etirazçıların tələblərinə uyğun olaraq qanun layihəsini geri çəkilib və mitinqlərdə həbs olunan bütün vətəndaşlar azad edilib.
Prokurorluq bildirir ki, Qriqoriadisin atdığı “Molotov kokteyli”nə görə iki xüsusi təyinatlı xəstəxanaya yerləşdirilib. İttiham aktında həmçinin bildirilir ki, yanmış avtomobilə görə dövlətə 39 min lari [təxminən 15 min dollar] ziyan dəyib.
Daxili İşlər Nazirliyi üzü maskalı və başlıqlı gəncin nəsə atdığını əks etdirən video yayıb.
Daxili İşlər Nazirliyi martın 29-da yaydığı bəyanatda həmçinin qeyd edib ki, Qriqoriadisin əvvəllər də qanunla bağlı problemləri olub. 2020-ci ildə o, polisə müqavimət göstərdiyinə görə həbs edilib, 2021-ci ildə isə öz atasına qarşı məişət zorakılığında ittiham edilib.
Daha sonra Qriqoriadisin atası izah edib ki, oğlu ilə həqiqətən də fikir ayrılıqları olub, çünki “o, azad yaşamaq istəyirmiş”, lakin münaqişə tezliklə həllini tapıb:
“Onun yaşında mən də azad yaşamaq istəyirdim və belə də yaşayırdım. O, çox ağıllı və mehriban insandır. Aramızda kiçik bir ailə mübahisəsi oldu və sonda hər şey həll olundu. Mən ona tam azadlıq verdim. Biz bir-birimizə qarışmırıq. Oğluma qarşı pis münasibətim olsaydı, camaat qarşısında çıxış edərdimmi? Oğlumun kim olduğunu və nəyi müdafiə etdiyini bildiyim üçün sona qədər dəstəkləyəcəm. Mən onun necə ürəyi olduğunu bilirəm”, – Beka Qriqoriadis Facebook-da yazıb.
Lazarın babası Gia Kalandadze də jurnalistlərə deyib ki, atası ilə münaqişə zamanı Lazar özünü atasından müdafiə edirdi, əksinə yox.
Martın 31-də Qriqoriadisin işi üzrə məhkəmə iclası keçirilib və onun barəsində həbs-qətimkan tədbirinin tətbiqi məsələsi müzakirə olunub. Vəkillər girov kimi 10 000 lari [təxminən 4 000 dollar] tələb ediblər.
İclasda 21 yaşlı Lazare Qriqoriadis yenidən ifadə vermək istədiyini bildirib. O, artıq bir dəfə polis binasında ifadə verib, lakin vəkilsiz. Daha sonra o, “Molotov kokteyli” atdığını və polisin avtomobilini yandırdığını etiraf edib. Vəkil Lika Bitadze bu ifadənin müttəhimə təzyiq nəticəsində verilə biləcəyindən şübhələnir. Məhkəmədən əvvəl vəkilin Lazare ilə görüşməsinə icazə verilməyib.
Martın 31-də yüzlərlə insan Tbilisi şəhər məhkəməsi yaxınlığında toplaşıb. Onlar Qriqoriadisin azadlığa buraxılmasını tələb edib və iddia ediblər ki, hakimiyyət qeyri-standart görünüşlü gənci qəsdən “qurban” seçib və indi onu şeytanlaşdırır.
Məhkəmədən bir gün əvvəl rəsmi təbliğat aparılıb.
Martın 29-da Daxili İşlər Nazirliyi öz məlumatlarında Qriqoriadisi hələ yalnız baş hərflərlə qeyd edərkən, hökumət kanalları artıq onun orta barmaq göstərdiyi fotosunu yayırdılar. Hökumət kanalları bildiriblər ki, Qriqoriadis müxalifət adından hərəkət edib – o, Elene Xoştariyanın Droa partiyasının üzvüdür və həm də atasına qarşı zorakılıqda ittiham olunur.
Eyni zamanda ölkənin nüfuzlu yüksək vəzifəli şəxsləri, o cümlədən hakim “Gürcü arzusu” partiyasının sədri İrakli Kobaxidze də Qriqoriadisə qarşı məhkəmə qarşısına çıxıb. O, Qriqoriadisin xarici görünüşünü xatırladıb və “disorientasiyadan” danışıb.
“Görünür, onun bütün oriyentirləri qarışıb, belə insanlar polislərə qarşı qəddar davranıblar və bu, düzgün qiymətləndirmə tələb edir…”, – deyə İrakli Kobaxize bildirib.
Hakim “Gürcü Arzusu” partiyasının sədri İrakli Kobaxidze məhbus haqqında əlavə olaraq deyib ki, “bu, yolunu azmış adamdır”. Kobaxidzenin sözlərinə görə, Qriqoriadis “bolşevik üçlüyü” – Elene Xoştariya, Zurab Caparidze və Giorgi Vaşadze ilə bağlıdır. Xoştariya “Gürcü Arzusu” sədrinin yaydığı məlumatı təkzib edir.
Bundan əvvəl, martın 12-də “İmedi” televiziyasına müsahibə verən baş nazir Qaribaşvili 7-9 mart etiraz aksiyalarında iştirak edən gəncləri “satanistlər” və məqsədi “daimi destabilizasiyanı saxlamaq” olan “anarxistlər” adlandırmışdı. Daha sonra parlamentdə çıxışı zamanı Qaribaşvili “satanist” adlandırdığı şəxslərlə bağlı Daxili İşlər Nazirliyindən məlumat almasına aydınlıq gətirib.
Müxalifət partiyalarının nümayəndələri və fəallar hesab edirlər ki, Qriqoriadis etirazçılar arasında xüsusi seçilib və ona qarşı iş qaldırıb.
Qriqoriadisin üzündə xarakterik döymə var – gözlərinin ətrafında günəş şüalarına bənzəyən kirpiklər. O, saçlarını boyayıb və pirsinq edib. Dostları və tərəfdarları onun polisin “hədəfinə” çevrilməsinin səbəblərindən birinin də onun xarici görünüşü olduğunu düşünürlər.
“Əminəm ki, onlar kimi günah keçisi seçmək üçün üç həftə vaxt sərf ediblər… Cəmiyyət haqda çox pis təsəvvürə sahib olmaq lazımdır ki, kiminsə döymə və sırğalara görə şeytanlaşdırıla biləcəyini düşünəsən”, – martın 31-də məhkəmənin yaxınlığında keçirilən mitinqdə iştirak edən fəal Giorgi Kikonişvili “Azadlıq Radiosu”na deyib.
“Hakimiyyət mitinqlərdə iştirak edən bizlərin satanist olduğunu sübut etmək və təbliğatını gücləndirmək üçün üç həftə Lazarı axtarırdı. Hakimiyyət insanlara göstərmək istəyirdi ki, baxın, bizimlə vuruşanlar necə insanlardır. Əslində, Lazare boş yerə tutulan 21 yaşlı oğlandır”, – başqa etirazçı Sofiko Şerazadişvili deyir.
Bizi izləyin – Twitter | Facebok | Telegram
Mitinqə gələn Lazare Qriqoriadisin tərəfdarları da eyni kirpikləri çəkdiriblər. Mitinqə siyasətçilər və fəallarla yanaşı Avropa Parlamentinin deputatı Viola fon Kramon da gəlib.
Avropa Parlamentinin deputatı Kobaxidzenin Lazare ilə bağlı açıqlamasını təhqir adlandırıb.
“Ola bilsin ki, bu, cinayət işidir, amma ayrı-ayrılıqda göstərilib, şouya çevrilib və hesab edirəm ki, bu, çox təhqiramizdir. Martın əvvəlində baş verənləri nəzərə alaraq demək lazımdır ki, hər kəsin toplaşmaq, etiraz etmək hüququ var, konkret şəxsləri ayırmağa ehtiyac yoxdur. Ona görə də mən bura həmrəylik nümayiş etdirmək üçün gəlmişəm”, – deyə Viola fon Kramon jurnalistlərə bildirib.
Lazare Qriqoriadisin məhkəməsinin növbəti iclası mayın 1-nə təyin edilib.
