“Təyyarə bileti üçün çay tarlasında işləmişəm”. Emin Karaçobanın hekayəsi
21 yaşlı bakılı səyyah sadəcə dolanışıq üçün yox, bütün dünyanı gəzmək üçün pul qazanmağa çalışır. Əsas gəlir mənbəyi sosial şəbəkələrdəki bloqu və əl işlərinin satışından ibarətdir.
Səyahətlərini davam etdirə bilməsi üçün başqa ölkələrdə də işləməli olur. Sonuncu dəfə təyyarə bileti almaq üçün 10 gün çay tarlasında işləyib. Sakit həyat onun üçün deyil – Emin Karaçoban deyir.
- “Cəhənnəmdə idim, indi cənnətə düşmüşəm”
- “Yanımda kişi yoxdursa, bu mənim şəxsi seçimimdir”
- “Biri 10 qəpiyə alışqan doldurub, xeyli pul qazanırdım” – Həşimin uğura aparan yolu
Emin sistemə qarşıdır. Sadəcə vətənindəki siyasi sistemə qarşı yox, ümumilikdə dünya düzəninə qarşıdır. İnsanların dolana bilmək üçün sutkada 12 saat işləməyə məcbur olmasını ədalətsizlik hesab edir.
Gənc azərbaycanlı səyyahın ən böyük arzusu Latın Amerikası, Asiya və Afrika ölkələrinə səfər etməkdir.
![](https://jam-news.net/app/uploads/2022/06/emin1.jpg)
“Bəlkə bir gün bütün dünyanı gəzərək özümə daimi yaşamağa yer seçərəm. Gəzdikcə fərqli dillər, mədəniyyətlər öyrənirəm. Maddi dünyanın nemətləri məni o qədər də maraqlandırmır”, – Emin Karaçoban deyir.
Xoşbəxtlik istədiyin kimi yaşamaqdır
Eminin fikrincə, istənilən adam üçün əsl xoşbəxtlik xoşuna gəldiyi kimi yaşamaqdır.
![](https://jam-news.net/app/uploads/2022/06/rasht_iran-820x1024.jpg)
Biz gənc səyyahdan səyahətlərinin son hədəfinin nə olduğunu soruşduq. Əgər alpinistlərin ən böyük xəyalı Everestə çıxmaq, “səkkiz minlik” yüksəklikləri fəth etməkdirsə, Eminin xəyalı daha sadədir:
“Norveçə gedib Qütb işıqlarını görmək istəyirəm. Altı aydan bir baş verdiyi üçün diqqətimi çəkir. Bir gün ora gedib səhərə qədər səmanı izləmək istəyirəm”.
![](https://jam-news.net/app/uploads/2022/06/emin.krcbn_271461180_122369413618223_5453843348643643667_n-819x1024.jpg)
2-3 həftəlik sevgi
Eminin sevgiyə yanaşması da özünəməxsusdur:
“Yollarda bir çox insanla qarşılaşıram. Sevdiyim çox insan olub, amma bu anlıq baş verir.
Kimləsə tanış olub 2-3 həftə onunla tətilə getdiyim olur, amma heç uzun müddət ərzində belə bir insan olmayıb”.
![](https://jam-news.net/app/uploads/2022/06/emin.krcbn_256376749_307052341036739_125774425565166508_n-820x1024.jpg)
Təyyarə bileti üçün çay tarlasında işçi
“Sakit, oturaq həyat mənə görə deyil”, – həmsöhbətimiz deyir.
Amma o da hamı kimi hesab edir ki, normal həyat üçün stabil gəlir olmalıdır:
![](https://jam-news.net/app/uploads/2022/06/emin.krcbn_128467821_2744182789138159_658168829943246801_n-819x1024.jpg)
“Çox səyahət edirəm, xərc çox çıxır. Çatdırmaq olmur. Müxtəlif yollarla pul qazanmağa çalışıram.
Getdiyim ölkələrdən vloqlar çəkib YouTube kanalıma yükləyirəm. Bir az oradan pul qazanıram. Getdiyim ölkələrdə əl işlərimi satıram. 5-10 günlük işlər tapıb işləyirəm.
Sonuncu dəfə Türkiyədə on gün çay tarlasında işlədim. Oradan qazandığım pulla Bakıya təyyarə bileti aldım.
Burada da boyunbağı, bilərzik satıram. Təyyarə biletinə yetəcək qədər pul toplaya bilsəm, Taylanda getməyi düşünürəm.
Quru sərhədi olan ölkələrdə avtostopla gəzirəm. Amma Tayland kimi yerlərə, təəssüf ki, təyyarəylə getməli oluram”.
![](https://jam-news.net/app/uploads/2022/06/emin.krcbn_189718683_140213401482019_8572328195374865930_n-819x1024.jpg)
“Ola bilər ki, Avstraliyada qalım”
“50 yaşında özünü harada görürsən?” sualına Emin Karaçoban belə cavab verir:
“Hər şey ola bilər. 50 yaşımda özümü çox fərqli yerlərdə görürəm. Avstraliya, Tayland kimi yerlərdə yaşaya bilərəm.
Səyahət etməyə davam edə, yeni dillər öyrənə bilərəm…
Təbii ki, bunlar sadəcə xəyaldır. İnsan heç bir il sonranın planını dəqiqliklə qura bilmir”.
![](https://jam-news.net/app/uploads/2022/06/emin.krcbn_260082210_709130129991352_9018587822686333003_n-819x1024.jpg)
“Daha ədalətli dünyada yaşaya bilərdik”
Eminin sözlərinə görə, insan haqlarına hörmət olunsaydı, həyat daha yaxşı olardı:
“10-12 saat işləyən insanlar var, amma aldıqları pulla tək özlərini çətinliklə dolandırırlar.
Daha ədalətli bir dünyada yaşaya bilərdik. İnsanlar işlədikləri zaman qarşılığında normal maaş alsa, özlərinə daha xoşbəxt həyat bəxş edə bilərdilər”.