Strit-art Cənubi Osetiyanı necə dəyişir?
Strit-art Cənubi Osetiya üçün hələlik yeni haldır. Kosta Ciotı və Karina Dziqoyeva burada, deyəsən, qraffiti ilə maraqlanan yeganə rəssamlardır. Onlar birlikdə yerli incəsənət litseyində oxuyublar, indi isə birlikdə Mədəniyyət Nazirliyində işləyirlər. Kosta ixtisasca xoreoqrafdır, Karina isə memar.
İki il əvvəl Kosta Cənubi Osetiyada ilk strit-art festivalı təşkil edib. O zaman Vladiqafqazdan və Moskvadan da rəssamlar gəlib və yerli həmkarları ilə birlikdə binaların divarlarını rəsmlərlə bəzəyiblər. Hətta bu festival haqda klip də çəkiblər:
Kosta və Karinanın işləri dərhal seçilir. Bu aptekdir, əvvəllər avtobus dayanacağının arxasında heç gözə dəymirdi. İndi isə narıncı günəbaxanlarla bəzənib. Aptek kommersiya sifarişi olub, amma onlara rəsmi öz zövqlərinə görə çəkməyi təkilf ediblər, “təki çox parlaq olsun”.
Ən mürəkkəb layihə elektrik yarımstansiyasının yarıdağılmış köşkü üzərində çəkdikləri çiçəklər olub. “Biz onun üzərində çoxlu əlvan çiçəklər çəkmək qərarına gəldik. Maraqlanan insanlar dəstələrlə gəlirdi baxmağa, çoxu deyirdi ki, ciddi bir şey çəkmək lazımdır. Məsələn, Osetiya bayrağı. Bir də qoca elektrik vardı, o ümumiyyətlə deyirdi ki, bizim çiçəklərimiz təhlükəli həngamədir. Rəsmi çətinliklə başa vurduq”.
Avtomobil ehtiyat hissələri satılan mağazanın divarında klassik osetin portreti çəkib və osetin alim, iranşünas Vaso Abayevin sitatını yazıblar. “Bilirsiz, niyə məhz orada? Çünki məhz bu mağazanın üzərinə doğma osetin dilində ilk lövhə vurulub. Biz hər şeyi öz hesabımıza eləmək istəyirdik, amma mağaza sahibi boya və digər materialların pulunu ödəməkdə israr etdi”, - Kosta deyir.
Karına və Kostanın planlarında yenidən art-festival keçirmək, bura rəssamları gətirmək var. Həmçinin rəsm çəkmək üçün rayonlara getmək. Hələlik Sxinval hüdudlarından kənarda onların yalnız bir rəsmi var – bir kənd icra nümayəndəliyi onlara şair Kosta Xetaqurovun portretini, qala və dağ rəsmləri çəkməyi sifariş edib.
