Saakaşvili Ukraynanın baş nazir müavini ola bilər

Cümə günü Ukrayna parlamentində Mixail Saakaşvilinin baş nazirin müavini təyin edilməsi məsələsi səsə qoyula bilər.

Təşəbbüs prezident Vladimir Zelenskidən gəlib. Onun partiyası – “Xalq xidmətçisi” parlamentdə çoxluğa sahibdir.

Saakaşvilinin özü bildirib ki, “prezidentdən bu təklifi almaq onun üçün böyük şərəfdir”. O əlavə edib ki, baş nazir Denis Şmıqalla “çox məzmunlu və faydalı söhbətləri” olub və bu zaman “hökumətdə iş ehtimalı ilə bağlı bütün məsələləri müzakirə ediblər”.

• Şərh: Saakaşvilinin Ukraynaya üçüncü gəlişi
• “Gürcü” Saakaşvilinin “ukraynalıdan” dörd fərqi
• Şərh: Saakaşvili Ukraynada – başlanğıc və son

O, cümə günü Radada təxirəsalınmaz dəyişikliklər və hökumətin işində iştirakı ilə bağlı özünün “həm Ukraynadan kənarda, həm də Ukraynadakı fəaliyyəti zamanı formalaşan konkret təcrübələrinə əsaslanan” proqramını təqdim etməlidir.

Mixail Saakaşvili Facebook səhifəsində yazıb:

“Mən Ali Radada Şmıqal hökumətinin proqramının bir hissəsi kimi lazımi dəyişikliklər üzrə həm Ukraynadan kənarda, həm də Ukraynadakı fəaliyyətim zamanı həm müsbət, həm də mənfi təcrübəmə əsasən formalaşan konkret iş vərdişlərimə əsaslanan təkliflərimi təqdim edəcəyəm.

Prezidentin komandası ilə birlikdə mən Ukrayna parlamentindəki bütün vətənpərvər qüvvələrlə və cəmiyyətdəki digər siyasi qüvvələrlə işləməyə hazıram ki, Ukrayna ən az itkilərlə hazırkı dünya iqtisadi böhranını aşa və bütün maneələrin öhdəsindən gələ bilsin. Ümid edirəm ki, komandanın etibarlı üzvü olacağam və insanlar üçün xeyirli nələrsə edərək Ukrayna xalqına faydalı ola biləcəyəm.

Mən həmçinin ümid edirəm ki, öz beynəlxalq təcrübəmdən yararlanaraq hökumət komandasının üzvləri üçün, o cümlədən də beynəlxalq maliyyə təşkilatları ilə münasibətlərin qurulmasında, Ukraynanın nüfuzunun möhkmləndirilməsində və onun beynəlxalq aləmə inteqrasiyası üçün faydalı ola biləcəyəm, ilk növbədə Ukrayna xalqının maraqlarının qorunması və ölkənin inkişafına töhfə vermək naminə”.

2017-ci ildə o zamankı Ukrayna prezidenti Poroşenko Saakaşvilini Ukrayna vətəndaşlığından məhrum edib. Ona vətəndaşlıq 2019-cu ildə prezident Zelenski tərəfindən qaytarılıb.