"Sərhədləri bağlı olan yeganə ölkə". Azərbaycanda karantin müddəti uzadılıb
Azərbaycanda karantin uzadılıb
Azərbaycanda koronavirus pandemiyası ilə əlaqədar karantin müddəti mayın 1-dək uzadılıb. Ölkənin quru sərhədləri üç ildir bağlı qalır. “Azərbaycan bu gün dünyada sərhədləri rəsmi olaraq bağlı olan yeganə ölkədir”, – deyə müxalif siyasətçi Natiq Cəfərli bildirir.
- Bəxtiyar Hacıyevə azadlıq tələb edən iki fəal həbs edilib
- Saakaşvili: səhhəti, həbsxana şəraiti, onu nələr gözləyir? Video və suallara cavab
- “Gec, ya tez Laçın yolunda Azərbaycan postu olacaq”. Bakıdan şərh
Azərbaycan Nazirlər Kabinetinin bu gün – 21 fevral qərarı ilə koronavirus pandemiyası ilə əlaqədar ölkədə xüsusi karantin rejimi daha iki ay, 2023-cü il mayın 1-i səhər saat 6-dək uzadılıb. Sonuncu dəfə karantin dekabrın sonunda – martın 1-dək uzadılmışdı.
Ölkədə xüsusi karantin rejiminin bütün tədbirlərindən yalnız biri faktiki olaraq qüvvədədir – quru sərhədləri bağlı qalır. Ölkədən çıxış və ölkəyə giriş yalnız hava nəqliyyatı ilə mümkündür. Yeganə istisna Naxçıvanda Türkiyə ilə quru sərhədidir, lakin bu sərhədi yalnız Naxçıvanda qeydiyyatı olan Azərbaycan vətəndaşları keçə bilər.
Bütün digər tədbirlər – qapalı məkanlara girərkən COVID-pasportun tələb olunması, maska taxmaq məcburiyyəti və s. Faktiki olaraq heç bir yerdə istifadə olunmur.
“Sərhədləri bağlı olan yeganə ölkə”
“Bütün Dünya artıq “karantin”, “koronavirus”, “məhdudiyyətlər” kimi absurd yanaşmalardan imtina edib, dünyada quru sərhədləri rəsmən bağlı olan heç bir ölkə yoxdur, hətta Türkmənistan və Şimali Koreyada da sərhəd bağlı deyil, xüsusi icazə ilə sərhərddi keçmək mümkündür”, – deyə Respublikaçı Alternativ partiyasının liderlərindən biri Natiq Cəfərli qəzəbini ifadə edib.
“Mart ayında ciyanətkar təşkilat olan ÜST-ün öz axmaq və absurd “pandemiya” qərarını ləğv edəcəyi gözlənilir. Bir tək Azərbaycan hökuməti dirəşib ki, yox e, pandemiya var, karantin olmalıdır, quru sərhədlərini də bağlı saxlamaq lazımdır!” – deyə o əlavə edib.
“Martda ÜST “pandemiyanı” ləğv etsə, bizim hökumət nə deyəcək?!” – deyə siyasətçi sual edir.
Siyasətçinin sözlərinə görə, ölkədə aktiv xəstə sayı 100 nəfərdən bir az çoxdur:
“Deməli quru sərhədləri “pandemiya” bəhanəsi ilə qapalı saxlamaq məntiqsizlikdir, yaxşı, səbəbi nədir?!
Əgər AZAL-ın pul qazanmasıdırsa, bu da inandırıcı deyil – zatən AZAL büdcədən onmilyonlarla dotasiya alır, zatən inhisarçıdır, zatən qazanır.
Əgər daxili turizm obyektlərinin pul qazanması marağıdırsa, bu da absurddur – ölkədə böyük holdinqlərə məxsus otellər də büdcə hesabına kef edirlər və onların qazancı turizmdən (korrupsiya və büdcəni sökməklə müqayisədə) o qədər azdır ki, məmur-oliqarxlar üçün heç “semiçka pulu” da deyil, həm də quru sərhədlər açılsa daha çox turist gələcək ki, zatən otellər daha çox qazana biləcəklər.
Yaxşı, bu işin sirri nədir?! Əgər təhlükəsizliklə bağlı narahatlıqdırsa, bunu da anlamıram – məgər Gürcüstan, Ermənistan bizdən güclü ölkələrdimi ki, quru sərhədlərini açıq tutublar və xarici təsirlərdən çəkinmirlər?! Axı bizim dövlət onlardan daha dayanıqlı və güclüdür – təhlükəsizliyin sərhədlərin qapalı qalmasından asılı olacaq qədər zəif deyilik!
Bu sirrin əsl səbəbini tapana Nobel mükafatı düşür, mənim ağlıma ciddi bir arqument gəlmir. Belə çıxır ki, sadəcə hökumətin kefi belə istəyir, vəssalam…”
