Şərh: “Gürcüstan müxalifəti kimlə danış(m)ır?”
Gürcüstan müxalifəti ancaq cəmiyyətin bir hissəsinə müraciət edib.
“Mən düşünürəm ki, müxalifətin problemi həm də əhali tərəfindən etibar amilinin daha da dərinləşdirilməsi lazımdır… Vətəndaşlar bizim hakimiyyətə gəlişimizin pnların həyatını dəyişəcəyini hiss etməlidirlər”, – bu haqda keçmiş parlament deputatı və müxalifət liderlərindən biri Elene Xoştariya bildirib.
Bu da həqiqətən belədir. Gürcüstanın müxalifət partiyalarının bütün ritorikası və gündəmi bir dar elektorat seqmentinə yönləndirilib.
Hər gün işə gedənlərə, hər hansı təhsili olanlara, demokratiyanın durumu və Gürcüstanın Qərb və Avroatlantik gələcəyindən narahat olanlara.
Amma başqa bir seqment də var. Məsələn, xaricdə işləyən arvadının və ya anasının hesabına yaşayanlar, iş əvəzinə totalozatora, lombarda və kilsəyə gedənlər. Onlar keşişləri dinləyir və onlara inanırlar.
Ölkədə məhkəmənin necə olacağı bu cür insanları niyə narahat etsin ki? Ya da söz azadlığının olub-olmaması? NATO-ya qəbul ola biləcəyikmi? Bütün bunlar onların həyatında nəyi dəyişəcək ki?
Hətta milli valyutanın məzənnəsi də onları çox da narahat etmir, çünki onların özlərinin gəlirləri yoxdur.
Bunun əvəzinə onları Gürcüstana türklərin və iranlıların gəlməsi, bəzi qüvvələrin “pravoslavlığa qarşı mübarizə apardığı” və “bu LGBT-lərin lap qudurduqları” narahat edir.
Belə insan ya seçkiyə getmir, ya “adət elədiyi bəla” kimi “Gürcü arzusuna” səs verir, ya da rusiyayönlü mühafizəkar “Vətənpərvərlər Alyansına”.
Belə insanlarla işləmək çətindir və şəxsən mən təsəvvür eləmirəm ki bu durumda nə etmək olar.
Amma uğura nail olmaq üçün müxalifət belə insanlarla da işləməlidir. Ətrafda böyük dəniz dalğalandığı halda bir-biri ilə bir balaca elektorat adası üçün dalaşmaq əvəzinə.
Belə tipajlar da anlamalıdırlar ki, “Gürcü arzusu” hakimiyyətdə olmasa, onların həyatı yaxşılaşacaq. Qərblə bağlı gələcək onlar üçün ən yaxşı variantdır. Korrupsiya, qohumbazlıq və yaltaqlıq olmayan ölkə həm onların cibləri üçün, həm də onların uşaqlarının gələcəyi üçün daha yaxşı olacaq.
Amma buna necə nail olmaq lazım olduğunu mən bilmirəm.
