Xankəndidə konsulluq Rusiyanın nəyinə lazımdır? Bakıdan şərh
Rusiya Xankəndidə konsulluq açmaq istəyir
Rusiya 2024-cü il ərzində Xankəndidə baş konsulluq açmaq istəyir. Bunu Rusiya Federasiya Şurasının Beynəlxalq Əlaqələr Komitəsinin rəhbəri Qriqori Karasin Azərbaycan Milli Məclisinin Beynəlxalq və Parlamentlərarası Əlaqələr Komitəsinin sədri Səməd Seyidovla görüşündə deyib.
Karasinin sözlərinə görə, bu, “qarşılıqlı konsulluq mövcudluğundakı dispariteti aradan qaldırmağa imkan verəcək”.
- “Keşlə bazarı”nın sökülmə ehtimalı burada dolanan onlarla insanı nigaran qoyub
- Bərpa olunan enerji – dəb, yoxsa praqmatizm? Bakıdan təhlil
- “Toplum TV”nin təsisçisi Ələsgər Məmmədli 56 yaşını həbsxanada qeyd edib
Hazırda Rusiya Azərbaycanda diplomatik səviyyədə yalnız Bakıdakı səfirliyi ilə təmsil olunur. Ölkənin digər şəhərlərində Rusiya konsulluğu yoxdur.
Digər tərəfdən, Azərbaycanın Rusiya Federasiyasında üç konsulluq idarəsi var – Moskva, Sankt-Peterburq və Yekaterinburqda.
Siyasi icmalçı Hacı Namazov JAMnews-un Azərbaycan redaksiyası üçün məsələni şərh edib.
Ekspertin fikrincə, Qarabağda Rusiya konsulluğuna ehtiyac yoxdur:
“Qarabağda Rusiya vətəndaşı yoxdur. Qətiyyən yoxdur. Rusiya tərəfinin istəyini isə yalnız o baxımdan qiymətləndirmək olar ki, bu ölkə sülhməramlı qüvvələrini oradan çıxardıqdan sonra Azərbaycanın bu hissəsində mövqelərini itirmək istəmir. Bəs bu, Azərbaycana lazımdırmı? Sual budur. Məncə yox.
Son 30 ildən artıqdır ki, Rusiya Azərbaycandakı mövcudluğu üçün Türkiyə ilə pərdəarxası mübarizə aparır. Lakin o, bu mübarizəni tamamilə itirib. Burada məsələ heç diplomatik mövcudluqda da deyil.
Özünüz baxın: Türkiyənin Azərbaycanda üç konsulluğu var. Bakı, Gəncə və Naxçıvanda. Burada hər şey tam məntiqə uyğundur, çünki Türkiyə vətəndaşları Azərbaycanda yaşayır və işləyirlər, onlar sənədlərlə bağlı problemlərini həll etməlidirlər. Gəncə ölkənin qərb hissəsində yerləşir, burada ayrıca konsulluğun olması əsaslıdır. Naxçıvanın ölkənin qalan hissəsi ilə birbaşa quru əlaqəsi də yoxdur və burada da hər şey doğrudur.
Artıq Türkiyə və Azərbaycan Şuşada baş konsulluğun açılması barədə razılığa gəliblər ki, bu da işğaldan azad edilmiş ərazilərin dirçəldilməsi ilə məşğul olan Türkiyə vətəndaşlarının həyatını xeyli asanlaşdıracaq. Heç kimə sirr deyil ki, Türkiyə şirkətləri Qarabağda və Şərqi Zəngəzurda böyük həcmdə işlər görür.
Belə baxanda, Rusiyanın bununla nə əlaqəsi var? İki ölkə arasında vizasız rejim mövcuddur, yəni Azərbaycan vətəndaşlarına Rusiya səfirliyi özlüyündə lazım deyil. Ölkədə Rusiya vətəndaşları çox azdır və onlar Bakıdakı səfirliyin konsulluq şöbəsi vasitəsilə problemlərini asanlıqla həll edirlər. Qarabağda isə onlar praktiki olaraq yoxdur.
Xankəndidə konsulluq açılsa belə, bu qurumun işçiləri sadəcə olaraq öz kreslolarında əyləşəcəklər.
Burada daha bir vacib detalı qeyd etmək lazımdır. Bu isə ölkədə yumşaq gücün mövcudluğu ilə bağlıdır.
Bu baxımdan Rusiyanın Azərbaycanda üzərində işləməli olduğu bir məqam var. Bəli, ölkədə rus dilində təhsil verən çoxlu məktəblər və universitetlər mövcuddur. Belə fərz etmək olar ki, Rusiyanın burada görəcəyi xüsusi bir iş yoxdur. Valideynlər övladlarını həvəslə məktəblərin rus bölməsinə göndərirlər, bəzən orada yer qıtlığı da yaşanır. Çünki son zamanlar həqiqətən də rus dilini bilən pedaqoji kadr çatışmazlığı hiss olunur. Amma bütün bunlar dövlət səviyyəsindədir, bütün bunları Azərbaycan hökuməti idarə edir. Burada Rusiya məktəbləri və liseyləri yoxdur. Türkiyənin təhsil müəssisələri isə kifayət qədər çoxdur.
Keçən il Rusiya Bakıda rus məktəbləri açmaq istəyini bildirsə də, bu günə qədər məsələ bir addım da irəli getməyib.
Bütün bunlar həm də Azərbaycanın müəyyən bölgələrində ölkənin diplomatik mövcudluğunun zəruriliyi baxımından məna kəsb edir. Rusiyanın bütün coğrafi yaxınlığına və Azərbaycana təsirinə baxmayaraq, burada heç bir real mövcudluğu yoxdur.
Düzünü desəm, bu, Azərbaycan cəmiyyətindəki əhval-ruhiyyəyə tam uyğundur. Çünki Azərbaycanda Rusiya və Türkiyəyə diametral şəkildə əks münasibət var. Bu da hamıya aydındır”.
