“Rusiya Azərbaycan ərazilərinin 3 faizini işğal edib” – Bakıdan şərh

Rusiya sülhməramlılarının Qarabağa gəlişinin ilk günündən Azərbaycanda bu fakta münasibət birmənalı deyil. Siyasətçilərin və ekspertlərin böyük əksəriyyəti RF hərbçilərinin ölkənin hamı tərəfindən tanına ərazilərində yerləşdirilməsini qeyri-legitim hesab edir.

• Moskva, yoxsa Brüssel? Ermənistanın baş naziri haqda niyə qərbyönlü təəssüratı yaranıb?
• Gürcüstanlı həkim Vaja Qaprindaşvili Avropa Məhkəməsində Rusiyaya qarşı iddia qaldıracaq
• Rusiya hərbçilərindən ibarət daha bir qrup Qarabağa getməyə hazırlaşır

2020-ci il noyabrın 10-da Rusiya və Azərbaycan prezidentləri, o cümlədən də Ermənistanın baş naziri tərəfindən imzalanan üçtərəfli razılaşmaya əsasən, Dağlıq Qarabağın Azərbaycan ordusunun nəzarətində olmayan hissəsində Rusiyanın sülhməramlı qüvvələri yerləşdirilib.

Bu akt hələ də qanunvericilik məcrasına salınmayıb. Azərbaycan parlamenti xarici sülhməramlı qüvvələrin ölkə ərazisinə daxil edilməsini ratifikasiya etməyib. Üstəlik, bu məsələ Milli Məclisdə ümumiyyətlə qaldırılmayıb.

“Dünən axşam Rusiya kanallarının birində XİN-nin müavinlərindən biri Sergey Ryabkov çıxış edirdi və dedi ki, dünyanın və qonşularının Rusiyanı “aqressor” adlandırmasını, Kremldən çəkindiklərini anlamır, bunun əsası, sübutu, faktı yoxdur, qərəzdir.

Uzaq keçmişi qoydum kənara, son 30 ildə, SSRİ-nin dağılmasından sonra Rusiyanın etdiklərini sadalamaq yetərlidir ki, Kremlin aqressor olduğunu sübut etmək mümkün olsun:

1. Post-sovet məkanında bütün etnik-separatist hərakatları başladan, onları yönləndirən Rusiya olub;

2. Abxaziya və Cənubi Osetiya kimi “qondarma qurumları” saxlayan, onların “müstəqiliyini” tanıyan Moskvadır – günü bu gün də hər iki qondarma qurumda pul vahidi rubl, xarici pasport Rusiya sənədi, büdcələri Moskvadan ayrılan vəsaitdir;

3. İkinci Dünya müharibəsindən sonra Avropada başqa ölkənin ərazisini rəsmən işğal və ilhaq edən Rusiya olub – Krımı işğal edib, Donbasda qondarma qurumlar yaradıb;

4. Moldova ərazisində Dnestryanı oyuncaq “respublika” yaradan Rusiyadır, günü bu gün də maddi yardımı, silah yardımını, idarəetməni Kreml həyata keçirir;

5. Kremlin “təlxəkləri” hər gün mərkəzi TV kanallardan qonşu ölkələri işğal çağırışları edir;

6. Orta Asiyada bütün ölkələrin daxili siyasətini Moskva dizayn edir;

7. Son 15 ildə Kreml, güya, “yumşaq güc” alətləri ilə Baltikyani ölkələrdə, Avropada siyasətə yön verməyə çalışır;

8. Ermənistanda daxili və xarici siyasətin əsas moderatoru Rusiyadır;

9. Kreml ərtaf ölkələrdə, məsələn, Belarusda öz hərbi üstünlüyünü artırır, Polşa sərhədində hərbi bazalar saxlayır, eyni addımı NATO atanda qəzəblənir;

10. Və nəhayət, Rusiya “sülhməramlı” adı altında Azərbaycanın 3% torpağını işğal edib.

Rusiya böyük dövlətdir, ərazisi və resursları 2 mlrd. insanın rifah içində yaşamasına kifayətdir, amma absurd sistemi və xəstə ambisiyaları Rusiyanı inkişafdan saxlayır. Ciddi ideoloji böhran yaşayan Rusiya dünyaya sübut etmək istəyir ki, heç bir ümumbəşəri dəyərlər yoxdur, ancaq “Rus dünyası” və öz unikal yolları var, amma bunu tezis və arqumentlərlə edə bilmir. Rəsmi Kreml hələ də anlamır ki, ölkədə yeni nəsl yetişib, onları “Suslov” təbliğatı, “Stalin” qorxu maşını, “Brejnev” marazmı ilə idarə edə bilməz.

Əslində Rusiya dünyada çox vacib balans yaradan ölkə, ədaləti qoruyan mərkəz ola bilərdi, bunun üçün daxildə ədalətli sistem qurmalı idi – bacarmadı, çünki pul və qazanc hərisliyi Rusiya “elitasına” hakim kəsildi. Bacarsaydı Qərbdə bu gün baş verən təhlükəli tendensiyaların da qarşısını ala, yeni dinamika yarada bilərdi.

Amma Rusiya dəyişməyə məhkumdur, söhbət dərhal demokratik sistem qurulmasından getmir, söhbət sadə vətəndaşa hakim kəsilən ədalətsizlik hissinin artmasından gedir – bu hiss artır və dəyişikliyi labüd edir. Bizə Rusiyanın dağılması yox, pozitiv transformasiyası lazımdır, məncə, proseslər o yöndə gedəcək, bütün qonşuları, o cümlədən Azərbaycan buna hazırlaşmalıdır”, – müxalif Respublikaçı Alternativ Partiyasının liderlərindən biri Natiq Cəfərli Facebook-da yazıb.