2020-ci il oktyabrın 17-20 Qarabağda baş verən hərbi əməliyyatlarla bağlı xəbərlər

Gecədən başlayaraq oktyabrın 20-də bütün gün ərzində Qarabağ münaqişəsi zonasında Azərbaycan və Ermənistan orduları arasında bir neçə istiqamətdə gərgin döyüşlər davam edir.

• Qarabağ, döyüşlər və bəyanatlar. 20 oktyabr, hadisələr, üç həftə sürən toqquşmalar

Ermənistanın baş naziri Nikol Paşinyan və Azərbaycanın prezidenti İlham Əliyev oktyabrın 19-u axşam bəyan ediblər ki, Moskvada danışıqlar üçün görüşməyə hazırdırlar.

• Oktyabrın 19-u sutka ərzində nə baş verib – bütün tərəflərdən olayların icmalı

Atəşkəs 18 oktyabr yerli vaxtla saat 00:00-da qüvvəyə minəcək.

“Bu qərar Fransa, Rusiya Federasiyası və Amerika Birləşmiş Ştatları prezidentlərinin 1 oktyabr bəyanatının, ATƏT-in Minsk Qrupu həmsədrlərinin 5 oktyabr bəyanatının və 10 oktyabrda Moskvada qəbul edilmiş birgə bəyanatın davamı olaraq qəbul edilib”, – Ermənistan XİN-in məlumatında deyilir.

Azərbaycan XİN məlumatı təsdiqləyib.

Azərbaycanın Ağcabədi rayonunun ərazisinin Ermənistan silahlı qüvvələri tərəfindən intensiv atəşə tutulması nəticəsində 17 oktyabr 2020-ci il tarixində təxminən saat 16-da Arazbar kəndinin sakini, 1991-cu il təvəllüdlü Orxan Hacıyev yaralanıb. Məlumatı Azərbaycan Baş Prokurorluğunun mətbuat xidməti yayıb.

Azərbaycanın Baş Prokurorluğu mülki şəxslər arasında ölənlərin və yaralıların sayı ilə bağlı məlumatı yeniləyib.

Qurumdan bildirildiyinə görə, hərbi əməliyyatlar nəticəsində 60 mülki şəxs həlak olub, 270 nəfər yaralanıb. 1704 şəxsi ev zərər görüb.

“Gecə düşmən növbəti dəfə humanitar atəşkəsi pozaraq Artsaxın dinc yaşayış məntəqələrini, o cümlədən də Stepanakerti artilleriya və raket atəşinə tutub”, – hərbi qurumdan bildirilib.

Azərbaycan prezidenti İlham Əliyev xalqa müraciət edib. Müraciətin əsas tezisləri:

• Ermənistanın faşist rəhbərliyi Azərbaycanın dinc əhalisinə qarşı növbəti dəfə cinayət törədib.
• Əməliyyat-taktiki raketlərlə dinc sakinləri atəşə tutmaq hərbi cinayətdir və Ermənistan rəhbərliyi bu əməllərinə görə cavab verəcək.
• Biz onlara döyüş meydanında cavab verəcəyik, Azərbaycan dinc əhalini atəşə tutmur.
• Əgər Ermənistan silahlı qüvvələri bizim ərazilərimizi könüllü tərk etməsə, biz onları güclə qovacağıq.
• Ermənistanda bu qədər silah hardandır? Bu, müflis olmuş ölkədir. Onlar hansı pulla silah alırlar? Ancaq bu günlər ərzində 2 milyard dollarlıq hərbi texnika məhv etmişik və işlək vəziyyətdə ələ keçirmişik.
• Bu gün ordumuz Füzuli rayonunun Qoç Əhmədli, Çimən, Cuvarlı, Pirəhmədli, Musabəyli, İşıqlı, Dədəli kəndlərini və Füzuli şəhərini işğaldan azad edib! Füzuli bizimdir və qələbə bizimlədir.
• Bu qələbə bizə gələcək döyüşlərdə böyük taktiki imkanlar təmin edir.
• Bir daha Ermənistanın faşist rəhbərliyinə müraciət edirəm: torpaqlarımızı könüllü tərk edin. Onsuz da orda sizin iziniz də qalmayacaq, heç olmasa canınızı qurtararsız.
• Heç bir qüvvə qarşımızda dura bilməz. Biz öz torpaqlarımızı azad edəcəyik və bundan sonra atəşkəs elan edə bilərik.
• İndiyə qədər heç kim Ermənistanı və bu ölkənin rəhbərliyini  Xocalıda və bu günlərdə törətdiyi hərbi cinayətlərə görə cəzalandırmayıb. Biz özümüz onları cəzalandıracağıq.
• Paşinyan deyirdi ki, “Qarabağ Ermənistandır”. Gəl Hadruta, Füzuliyə və Cəbrayıla. Niyə daha bunu demirsən?
• Paşinyanın öz əməllərinə görə cavab verəcəyi gün yetişib
• Qarşımıza yeddi şərt qoymuşdu. Bundan sonra qoy öz şərtlərini. Sən bizim torpaqlarımızı tərk etməlisən.
• Biz ərazilərimizi istənilən yolla qaytaracağıq. Azərbaycan xalqının təhqir olunması Ermənistan rəhbərliyinə baha başa gələcək.

Azərbaycan Fövqəladə Hallar Nazirliyinin mətbuat xidmətinin məlumatına görə, erməni hərbi qüvvələrinin Gəncə şəhərinə raket zərbəsi nəticəsində həlak olanların sayı 13 nəfərə çatıb, daha 52 nəfər yaralanıb.

Ermənistanın Müdafiə Nazirliyinin mətbuat katibi bildirib ki, ənənəvi gərginliyə baxmayaraq, gecə ərzində əhəmiyyətli əməliyyat-taktiki dəyişiklik baş verməyib:

“Səhər erkən düşmən qüvvələri növbəti dəfə humanitar atəşkəs rejimini pozaraq dinc yaşayış məntəqələri istiqamətində raket zərbələrini davam etdirib. Ən güclü zərbələr Stepanakert və Şuşanın mülki infrastrukturuna endirilib”.

Dağlıq Qarabağ ombudsmeni Artak Beqlaryan əlavə olaraq bildirib ki, yaşayış məntəqələri atəşə tutulub, ilkin məlumatlara əsasən, iki nəfər dinc sakin xəsarət alıb:

“Xoşbəxtlikdən insanlar sığınacaqlarda olub, böyük itkilərin qarşısı alınıb… Azərbaycan hərbi cinayətləri davam etdirir, beynəlxalq ictimaiyyətin korluğu da davam edir”.

Foto: Reuters

“Oktyabrın 16-sı gün ərzində və 17-nə keçən gecə cəbhənin Ağdərə-Ağdam və Füzuli- Hadrut-Cəbrayıl istiqamətlərində əməliyyat şəraiti gərgin olaraq qalıb.

Qoşunlarımız düşmənin əvvəlcədən hazırlanmış müdafiə hədlərini müxtəlif istiqamətlərdə yarmağa, onu tutduğu mövqelərdən sıxışdıraraq çıxarmağa və irəliləməyə nail olub”, – Azərbaycan Müdafiə Nazirliyinin mətbuat xidməti bildirib.

“Humanitar atəşkəs rejimini kobudcasına pozan Ermənistan silahlı qüvvələri bu gün səhər saatlarından başlayaraq Tərtər, Ağdam, Bərdə və Ağcabədi rayonlarının ərazilərini atəşə tutur”, – Azərbaycan Müdafiə Nazirliyinin mətbuat xidmətinin məlumatında deyilir.

Qarabağda döyüşlərin 21-ci günü.

• Oktyabrın 16-da bütün gün ərzində və oktyabrın 17-ə geçən gecə raket atəşi və yerüstü əməliyyatlar davam edib.

• Azərbaycanın Gəncə şəhərinə endirilən raket zərbəsi nəticəsində ən azı 13 nəfər dinc sakin həlak olub – prezidentin köməkçisi Hikmət Hacıyev bildirib. Onun məlumatına görə, şəhərə SCUD ballistik raketi ilə atəş açılıb. Oktyabrın 10-da Gəncəyə ilk raket zərbəsi zamanı 10 nəfər dinc sakin həlak olmuşdu.

• Azərbaycan hərbçiləri Qarabağın Martuni şəhərini və bir neçə kəndini raket atəşinə tutub, bir nəfər dinc sakin həlak olub – Qarabağ ombudsmeni məlumat verib.

• Azərbaycanın rəsmi məlumatına əsasən, sentyabrın 27-də qarşıdurma başlayandan dinc sakinlərdən ən azı 60 nəfər həlak olub, 250 nəfərdən çox yaralanıb. Hərbçilər arasında itkilər haqda məlumat verilmir.

• Ermənistan tərəfinin rəsmi məlumatına əsasən, sentyabrın 27-də qarşıdurma başlayandan 604 nəfər hərbçi və 33 nəfər dinc sakin həlak olub.

• Ermənistan silahlı qüvvələri Naxçıvan Muxtar Respublikasının [Ermənistan əraziləri ilə əhatələnmiş Azərbaycan eksklavı] ərazisinə zərbə endirib – Azərbaycanın Müdafiə Nazirliyi bildirib. Ermənistanın Müdafiə Nazirliyi bu məlumatı təkzib edib və bunu “Azərbaycanın münaqişə coğrafiyasını genişləndirmək cəhdi” adlandırıb.

• Avropa İnsan Haqları Məhkəməsi Azərbaycan üzərinə iki erməni hərbi əsirin həyat və sağlamlıq hüququnu təmin etmək və oktyabrın 22-ə qədər hər ikisinin səhhətilə bağlı məlumat təqdim etmək öhdəliyi qoyub.

• Sosial şəbəkələrdə əsirlərlə qeyri-insani davranışı əks etdirən video yayılıb, Azərbaycan hərbçilərin erməni əsirləri öldürdüyü iddia olunur. Ermənistan ombudsmeni bildirib ki, bütün sübutları beynəlxalq strukturlara təqdim edəcək. Azərbaycanın Baş Prokurorluğu bu kadrları saxta adlandırıb.

• Azərbaycanın Müdafiə Nazirliyi Qarabağın Hadrut qəsəbəsindən yeni video yayıb və bildirilib ki, bu qəsəbə Azərbaycan ordusunun nəzarəti altındadır. Ermənistan tərəfi isə hələ də qəsəbnin Ermənistan silahlı qüvvələrinin nəzarətində olduğunu bildirir.

• Azərbaycan ordusu Qarabağ ətrafında Xocavənd rayonunun daha üç kəndini [1990-cı illərin əvvəllərində yaşanan Qarabağ müharibəsindən sonra Ermənistan silahlı qüvvələrinin nəzarəti altında olan] nəzarət altına alıb – Azərbaycan prezidenti Twitter hesabında bildirib. Azərbaycanın rəsmi məlumatına əsasən, ümumilikdə 53 yaşayış məntəqəsi azad edilib.

• Ermənistanın Müdafiə Nazirliyi bəyan edib ki, Qarabağın müdafiə ordusu oktyabrın 10-da Moskvada tərəflər arasında imzalanan humanitar atəşkəsə riayət etməyə hazırdır və beynəlxalq ictimaiyyəti bəyan edilmiş atəşkəsə rəğmən döyüşlərin davam etməsində kimin günahkar olduğunu açıq bildirməyə çağırıb.

• Yunanıstan XİN rəhbəri Yerevanda Ermənistanın xarici işlər naziri ilə görüşüb və bildirib ki, “Türkiyənin Qarabağ münaqişəsinə müdaxiləsinin qarşısı alınmalıdır”.

• 2020-ci il oktyabrın 16-də Qarabağda baş verən hərbi əməliyyatlarla bağlı xəbərlər, reportajlar, foto/video

Azərbaycan prezidentinin köməkçisi Hikmət Hacıyevin “Twitter” hesabında yazdığına görə, Gəncəyə ikinci raket zərbəsi nəticəsində 10 nəfərdən çox mülki şəxs öldürülüb, 40-dan çox yaralı var.

Hacıyev qeyd edir ki, şəhərə SCUD raketləri atılıb, “onlardan sıx yaşayış olan rayonlara, mülki şəxslərə qarşı istifadə olunması Ermənistanın siyasi liderlərinin tam mənəviyyatsızlığının və şizofrenik düşüncəsinin təzahürüdür”.