Qarabağ “mübahisəli ərazi”dirmi? - Kreml mesaj verir, Bakı cavab qaytarır
Medinskinin Qarabağı “mübahisəli ərazi” adlandırması
Rusiya Prezidentinin köməkçisi Vladimir Medinskinin Qarabağı “mübahisəli ərazi” adlandırması Azərbaycan Xarici İşlər Nazirliyindən tutmuş siyasi ekspertlərə qədər bir çox şəxslərin sərt reaksiya verməsilə nəticələnib.
9 iyun tarixində “Russia Today” kanalına verdiyi müsahibədə Rusiya Prezidentinin köməkçisi, Tarix Təhsili üzrə Komissiyanın rəhbəri Vladimir Medinski Ukrayna müharibəsini Qarabağ məsələsi ilə müqayisə edib.
“Əgər Rusiya-Ukrayna cəbhəsində münaqişə sadəcə atəşkəslə dayandırılarsa və real sülh əldə olunmasa, bu vəziyyət Ermənistanla Azərbaycan arasında mübahisəli bölgə – Qarabağ kimi olacaq”, – deyə o bildirib.
Medinskinin bu bəyanatı Azərbaycanda rəsmi narazılığa səbəb olub. XİN-in mətbuat katibi Ayxan Hacızadə mövzuya münasibət bildirərək qeyd edib ki, Qarabağ heç zaman “mübahisəli ərazi” olmayıb və Rusiya özü də bu bölgəni Azərbaycanın tərkib hissəsi kimi tanıyıb. Onun sözlərinə görə, belə bir müqayisə yersiz və təxribat xarakterlidir:
“Azərbaycan heç zaman başqa ölkənin ərazisini işğal etməyib. 2020-ci və 2023-cü illərdə Azərbaycan yalnız öz suveren ərazilərində əməliyyatlar keçirib və beynəlxalq hüquqa əsaslanan mövqeyini bərpa edib”.
“Kreml Bakıya mesaj göndərir“
Bu açıqlamanın ardınca Rusiya Xarici İşlər Nazirliyinin nümayəndəsi Mariya Zaxarova məsələni yumşaltmağa çalışaraq bildirib ki, Medinski tarixi və sosial aspektləri vurğulayıb, onun sözləri kontekstdən çıxarılıb.
Ancaq politoloq Elxan Şahinoğlu bununla razılaşmır. Onun sözlərinə görə, Medinskinin fikirləri təsadüfi dil sürüşməsi deyil, Kremlin son dövrlər artan mesajlarının tərkib hissəsidir. Şahinoğlu Rusiyanın “RİA Novosti” agentliyində yayımlanan və adının çəkilməsini istəməyən Kremlin mənbəsinə istinad edən “Moskva Bakının Rusiyanın yeni regionları və Krımı tanımasına ümid edir” mətnli xəbəri də bu kontekstdə qiymətləndirir:
“Bu, Azərbaycanın Rusiya tərəfindən Ukraynadan qoparılmış əraziləri, o cümlədən Krımı tanıması üçün dolaylı təzyiqdir. Kreml həm rəsmi ağızlarla, həm də dövlət mediası vasitəsilə Bakıya mesaj göndərir”.
Elxan Şahinoğlunun fikrincə, bu mövqe Rusiyanın Azərbaycana qarşı təxribatlarının davam edəcəyinin göstəricisidir. Onun sözlərinə görə, belə bir yanaşma sərgiləyən dövlət nə strateji tərəfdaş adlana bilər, nə də Xankəndidə konsulluq xidməti açmasına icazə verilməlidir.
- Azərbaycan-Rusiya münasibətlərinin soyuqlaşması: Təyyarə qəzası sükutu, parad boykotu və hakimiyyətin “ehtiyat məsafəsi”
- ABŞ və Avropa Rusiyanın Ukraynada apardığı müharibəni dayandırmaq üçün fərqli planlar təklif ediblər
- Azərbaycan–Rusiya münasibətləri: Təyyarə vurulması ilə geosiyasi münaqişə
“Qarabağla Donbas arasında fərq var”
Keçmiş xarici işlər naziri Tofiq Zülfüqarov isə açıqlamasında Medinskinin çıxışını “lazımsız və əsassız” adlandırır:
“Azərbaycan məsələsi beynəlxalq hüquq çərçivəsində artıq həll olunub. Kiminsə fərdi fikri bizim üçün əhəmiyyət kəsb etmir. Medinski sadəcə öz mövqeyinə arqument uydurmağa çalışır”.
Zülfüqarov qeyd edir ki, Azərbaycan 1994-cü ildən başlayaraq öz mövqeyini atəşkəs və danışıqlar çərçivəsində formalaşdırıb, lakin Ermənistan bu şərtləri illərlə qəbul etməyib.
Elxan Şahinoğlu da bu müqayisəni qətiyyətlə rədd edir:
“Azərbaycan Qarabağı işğaldan azad edib. Rusiya isə Donbası işğal edib. İki hal arasında bərabərlik işarəsi qoymaq həm tarixi, həm hüquqi, həm də siyasi baxımdan yanlışdır”.
Medinskinin Qarabağı “mübahisəli ərazi” adlandırması
