Azərbaycan müxalifətində qalmaqal – “Müsavat” partiyası hakimiyyətə loyallıqda günahlandırılır
Azərbaycanın ən uzunmüddətli müxalif partiyalarından biri – “Müsavat” bir neçə üzvü hakimiyyətlə dialoqa getdiyi üçün digər müxalif partiyalar tərəfindən tənqid edilir.
“Müsavat” özü ittihamları rədd edir və bildirir ki, bu insanlar partiya nümayəndəsi kimi yox, müstəqil şəkildə hərəkət ediblər.
Qalmaqalda keçmiş siyasi məhbus, jurnalist Əfqan Muxtarlı da iştirak edib.
- “Virusla sınaq” – Azərbaycan hökuməti və cəmiyyəti bu sınaqdan necə keçib?
- Türkiyədə LGBT: nazir hüquqşünaslara qarşı
Tam aydın təklif deyil
Azərbaycan hakimiyyəti 2020-ci il martın əvvəlində rəsmi şəkildə müxalifətə dialoq təklif edib. Mahiyyət etibarilə bu, əməkdaşlığa çağırışdır, amma hələ ki, məhz hansı formada əməkdaşlıqdan söhbət getdiyi məlum deyil.
Müxalifətçilər bu təklifə müxtəlif cür reaksiya veriblər.
Qeydiyyatdan keçməmiş “Respublikaçı Alternativ” partiyası təkliflə razılaşıb və bununla da çoxlarında özlərinə qarşı qəzəb doğurublar.
“Müsavat” Partiyası, Azərbaycan Xalq Cəbhəsi Partiyası və Demokratik Qüvvələrin Milli Şurası bir sıra şərt irəli sürüblər. Hökumət bu şərtləri qəbul etməyib, odur ki, dialoq da alınmayıb.
Azərbaycan hakimiyyəti uzun illərdən sonra ilk dəfə belə bir təkliflə çıxış edib. Müxalifətin rədd cavabı hakimiyyətdə qəzəb doğurub. Prezident İlham Əliyev öz çıxışlarında hakimiyyətlə əməkdaşlıq etmək istəməyən müxalifətçiləri “beşinci kolon” və “xalq düşməni” adlandırıb.
Müxalifət isə hakimiyyətlə dialoqdan yaxşı heç nə gözləmir – məruz qaldığı ənənəvi repressiyaları və təqibləri nəzərə alaraq. Yalnız Respublikaçı Alternativ bu məsələdə nikbindir.
Qalmaqallı görüş
İndi də mediada “Müsavat” partiyasının üzvü, Azərbaycan Qadın Haqları Müdafiəsi Cəmiyyətinin sədri Novella Cəfəroğlu və bir neçə həmkarının Prezident Administrasiyasının Siyasi Partiyalarla və Qanunverici Hakimiyyətlə Əlaqələr Şöbəsinin rəisi Ədalət Vəliyevlə görüşü haqda informasiya yayılıb.
Novella Cəfəroğlu partiyası ilə hakimiyyət arasında dialoq lehinə çıxış etdiyini inkar edir:
“Sözsüz ki, Müsavat Partiyası siyasi partiyalarla bağlı müzakirə aparılan bir görüşdən kənarda qala bilməz. Söhbət olub. Hər şey bizim rəhbərlikdən asılıdır, biz Müsavat Partiyasının sadə üzvləriyik. Çox istəyərdim ki, bu dialoq olsun”, – o deyib.
AXCP və DQMŞ bu hadisəni “Müavat”ın satqınlığı kimi qəbul edib.
“Müsavat” isə əmin edir ki, Cəfəroğlunun hərəkətlərinə görə heç bir məsuliyyət daşımır, bu haqda partiyanın heç bir məlumatı olmayıb və hakimiyyətlə danışığa getmək niyyəti yoxdur.
“Bizim belə bir görüşdən xəbərimiz yoxdur. Müsavat Partiyası tərəfindən adları keçən şəxslərə təmsilçilik üçün heç bir səlahiyyət verilməyib. Onlar görüşüblərsə, təmsil etdikləri QHT adından görüşüblər”, – “Müsavat” patiyası funksionerlərindən biri Səxavət Soltanlı bəyan edib.
Qalan müxalif partiyaların “Müsavata” inanmadıqlarını demək olmaz, amma məsələnin araşdırılmasını və Novella Cəfəroğlunun “özfəaliyyətinə” görə cəzalandırılmasını tələb edirlər.
Jurnalist hüquq müdafiəçisinə qarşı
Az əvvəl həbsdən azad edilən və dərhal Almaniyaya göndərilən jurnalist Əfqan Muxtarlı məsələyə kəskin reaksiya verib.
“Düşünürəm, Novellanın partiyada qalması artıq Müsavata açıq-aydın ləkədir”, – o öz fikrini ifadə edib.
Bunun cavabında Novella Cəfəroğlu Muxtarlını pul qaçaqmalçılığında və həbsdə olarkən hakimiyyətə azad edilməsi üçün yalvarmaqda günahlandırıb.
Qaçaqmalçılıq Azərbaycan hakimiyyətinin Muxtarlını həbs etmək üçün ona qarşı irəli sürdüyü ittihamlardan biridir. Hakimiyyət jurnalisti Gürcüstandan oğurlayıb ölkəyə gətirmişdi. Beynəlxalq hüquq müdafiə təşkilatları Əfqan Muxtarlını siyasi məhbus hesab edir və uzun müddət onun azad edilməsi üçün səy göstəriblər.
Bütün bunlar Azərbaycan müxalifəti arasında ilk münaqişə deyil. Hakimiyyətin dialoq təklifindən sonra bu münaqişələr daha da intensivləşib.
Respublikaçı Alternativ Partiyasının üzvü Erkin Qədirlinin 2020-ci ilin fevral seçkilərinin nəticələrinə əsasən parlamentə daxil olan yeganə müxalifətçi olması da vəziyyəti daha da gərginləşdirir.
