Qəbul imtahanlarının rekordçusu Azərbaycanda təhsildən imtina edib
700 bal toplayan Nigar Ağazadə
Bu il Azərbaycanda ali məktəblərə qəbul imtahanında ancaq bir abituriyent mümkün maksimum 700 balı toplaya bilib. Amma Bakı məktəblərindən birinin məzunu olan Nigar Ağazadə imtahan nəticələri elan olunandan bir neçə gün sonra təhsilini Türkiyədə davam etdirəcəyini bildirib.
Onun bu qərarı sosial şəbəkələrdə böyük müzakirələrə səbəb olub. Çoxları onu vətəndə yox, xaricdə təhsil almaq qərarına görə qınayıb, hətta təhqir etməkdən belə çəkinməyib. Ekspertlər isə Ağazadənin bu seçimini dəstəkləyirlər. Onların fikrincə, ölkəni tərk edərək gənclər öz etirazlarını bildirirlər.
- “Məni 500 manata satdılar”. Azərbaycan məhbəsində transgenderlər
- Bakıda manikür ustasının iş günü. Video
- “Səhlənkarlıq, yoxsa təxribat?” Yerevanda “Surmalu” ticarət mərkəzində partlayış
Bakı şəhəri 125 saylı məktəbin məzunu Nigar Ağazadə ali məktəblərə qəbul imtahanında mümkün maksimum 700 bal toplayıb. Bununla da o, imtahanda bütün suallara səhvsiz cavab verən yeganə abituriyent olub.
Amma imtahan nəticələri elan olunandan bir neçə gün sonra Azərbaycan Tibb Universitetinin yeni tələbəsi planlarının dəyişdiyini elan edib. O, Türkiyənin Ankara Universitetinin Tibb Fakültəsinin dəvətini qəbul edib.
“Əvvəllər mən xaricdə təhsil haqda düşünmürdüm. Amma bütün ölkədə birinci olandan sonra özümü sınamaq qərarına gəldim və alındı.
Türkiyədə tibb çox inkişaf edib və orada alacağım təhsil mənə lazım olacaq. Rezidenturanı isə Almaniyada keçməyi planlaşdırıram. Kardio-cərrah olmaq istəyirəm.
Əlbəttə, xaricdə təhsilimi başa vurduqdan sonra vətənə qayıdacağam”, – Ağazadə yerli mediaya müsahibəsində bildirib.
Tələbənin qərarı ilə bağlı ekspertlərin fikirləri üst-üstə düşür – onlar Nigarın seçiminə anlayışla yanaşırlar.
“Heç kim onunla heç maraqlanmayıb”
Tanınmış iqtisadçı Samir Əliyev abituriyentin seçimini qınayanları anlamaqda çətinlik çəkir:
“Əksəriyyət Nigarın bu addımı təqdir etsə də təəssüf ki, onu qınayanlar da oldu. Ancaq bir az dərinə getsək onu qınayanların nə qədər haqsız olduğunu görmək olar”, – o qeyd edib.
Əliyev hesab edir ki, bu uğura o, yuxusuz gecələri, stressli həyatı və ən əsası məqsədyönlü çalışmaları hesabına nail olub:
“Nigar balamız bunun üçün sosial şəbəkələrdən uzaq durub, toy şənliklərindən imtina etməyi bacarıb. Qarşısına qoyduğu hədəfə çatıb. Eyni zamanda oxuduğu məktəbin, təhsil aldığı müəllimlərin üzünü ağ edib. Daha çox Təhsil Nazirliyinin üzünü ağ edib, onun getdikcə pisləşən təhsil statistikasını nisbətən yaxşılaşdırıb.
Sonra nə baş verib? Heç nə. Nə yaşadığı rayon rəhbərliyi maraqlanıb, nə də Təhsil Nazirliyi. Adicə quru təbrik də edilməyib. Təhsil Nazirliyi Nigara dərs demiş müəllimlərin, yaxınlarının sosial şəbəkələrdəki haraylarını da eşitməyib, “bu uşağa vaxtında yiyə durun” kimi mesajlarını qulaq ardına vurub. Əvəzində Türkiyənin adlı-sanlı universitetləri onu axtarıb tapıb. Nəticədə Ankara Universitetinin təklifini qəbul edib. Bütün xərcləri də universitet öz üzərinə götürüb. Halbuki Nigarın arzusu ilkin olaraq Azərbaycanın universitetində təhsil almaq olub.
Bu gün Azərbaycan səhiyyəsi xarici ölkələrdə, o cümlədən Türkiyədə təhsil almış həkimlərin çiynindədir və onların hesabına getdikcə zəif olsa da irəliləyir. 10-20 il bundan öncə belə peşəkarlar yox idi. Nigar da gələcəkdə onlardan biri olacaq, ölkəyə qayıdıb insanlara xidmət edəcək. Bu gün onu qınayanlar sabah onun xidmətindən yararlananda bu günü yada salmadan deyəcəklər, yaxşı ki, təhsil üçün xaricə getmisən”, – Samir Əliyev sosial şəbəkədə yazıb.
“Gənclər bu yolla etiraz edir”
“Təhsili bitirdikdən sonra da xarici ölkələrdən birində qalıb işləsin, geri dönməsin”, – ölkədə akademik təhsil almış Elyar İslamoğlu Nigar Ağazadə üçün diləyib.
Hər il onlarla, yüzlərlə savadlı gənc ölkəmizi tərk edir, xarici ölkələrdə yaşamağa qərar verir. İslamoğlunun fikrincə, savadlı gənclərin ölkəni tərk etməsinin səbəblərini hamı yaxşı bilir:
“Vəzifə təyinatlarında qeyri-şəffaflıq, haqsızlıqlar, maaş azlığı, bütün sahələrdə rüşvət, bərbad nəqliyyat, keyfiyyətsiz kommunal xidmətlər, ədalətsiz məhkəmə sistemi, məmur özbaşınalığı və s. saymaqla bitməyən çoxsaylı problemlər.
Vəzifə təyinatlarına nəzər salın. Ən yüksək vəzifələrə kimlər təyin olunur: hansısa məmurun oğlu, qardaşı-bacısı oğlu, əmisi-xalasıoğlu, kürəkəni, kirvəsi və s.
Bəs elə bilirdiniz ki, trollara, yaltaqlara uzun-uzun tərifnamələr yazdırmaqla hər şeyin gözəl olduğuna gəncləri inandıra biləcəksiniz? Haqsızlığa susmayan, səsini çıxaran gənclərə iş yerindən, ailəsindən təzyiqlər etdirməklə, problemləri malalamaqla elə bilirdiniz gözəl nəticələr olacaq? Gənclər də belə etiraz edir: səssizcə ölkəni tərk etməklə. Bu beyin axınının nəticələri bir müddət sonra bütün ölkə üçün faciəvi olacaq.
Hazırda minlərlə gəncimiz xaricə köçməyin yollarını axtarır. Zamanında şans yarananda getmədiyim üçün çox peşmanam. Kirayədə, az maaşla, min bir haqsızlıqlarla üzləşərək əzab-əziyyətlə övlad böyüdürəm.
Heç kim Nigarı və onun kimiləri qınaya bilməz. Düzgün qərar veriblər”, – Elyar İslamoğlu qeyd edib.
