Azərbaycanda “doğum evi”nin yanması nəticəsində 4 körpə həlak olub
Perinatal Mərkəzdə yanğın
Bakıda Respublika Perinatal Mərkəzində baş verən yanğında 4 körpə həlak olub. “Hərtərəfli araşdırma aparmaq üçün zamana ehtiyac var. Günahkarlar məsuliyyətə cəlb olunacaqlar”, – deyə Azərbaycanın baş prokuroru jurnalistlərə bildirib.
- “Qaydalara əsaslanan dünya nizamı qısamüddətli maraqların təmin olunmasına doğru dəyişir”. Bakıdan baxış
- 2023-cü ildə JAMnews-da Azərbaycandan hazırlanmış məqalələrin onluğu
- Azərbaycan-2023. İlin xülasəsi
Yanvarın 9-da gecə saat üç radələrində Respublika Perinatal Mərkəzində yanğın baş verib. Hadisə ilə bağlı ilk rəsmi açıqlamada yanğının tez bir zamanda söndürüldüyü, xəstəxanada olanların hamısının təxliyə edildiyi, tələfat olmadığı qeyd edilib. Amma təqribən bir saat sonra başqa bir rəsmi açıqlama gəlib və orada 4 körpənin meyitinin tapıldığı bildirilib.
“Baş Prokurorluğun rəhbər vəzifəli şəxslərinin iştirakı ilə hadisə yerinin müayinəsi aparılıb, eləcə də zəruri və təxirəsalınmaz istintaq hərəkətləri həyata keçirilib.
İlkin araşdırmalar zamanı müəyyən edilib ki, 3 nəfər tüstüdən zəhərlənmə səbəbilə Kliniki Tibbi Mərkəzin Toksikologiya şöbəsinə hospitalizasiya olunub. Onlara zəruri tibbi xidmətlər göstərilib, vəziyyətləri stabildir, ambulator müalicə üçün evə buraxılmaları nəzərdə tutulub.
Dərin təəssüf hissi ilə qeyd edirik ki, Mərkəzin Yenidoğulmuşların intensiv terapiya şöbəsində müalicə alan 4 uşağın meyiti aşkar olunub”, – Baş Prokurorluq, Fövqəladə Hallar Nazirliyi və Tibbi Ərazi Bölmələrini İdarəetmə Birliyinin (TƏBİB) birgə məlumatında deyilir.
Həmçinin qeyd olunur ki, faktla bağlı Baş Prokurorluğun İstintaq idarəsində Cinayət Məcəlləsinin 225.3 (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) və 314.3-cü (səhlənkarlıq iki və daha çox şəxsin ölümünə səbəb olduqda) maddələrilə cinayət işi başlanıb. Hazırda istintaq-əməliyyat tədbirləri davam etdirilir.
“İstintaqın gedişatı və nəticələri barədə ictimaiyyətə mütəmadi olaraq məlumatın verilməsi təmin ediləcək”, – birgə bəyanatda deyilir.
Baş prokuror Kamran Əliyev jurnalistlərin suallarını cavablandırarkən bildirib ki, hadisədə günahı olanlar ən qısa zamanda məsuliyyətə cəlb olunacaqlar:
“Təəssüf ki, dörd körpənin həyatını xilas etmək mümkün olmayıb. Onlar intensiv müalicə bölməsində, küvezlərdə olublar. Hərtərəfli araşdırma aparmaq üçün zamana ehtiyacımız var. Təqsirkarlar məsuliyyətə cəlb olunacaqlar”, – deyə baş prokuror bildirib.
