Məşhur azərbaycanlı vəkil bir il islah işləri cəzası aldı

Məşhur vəkil Aslan İsmayılov xuliqanlıqda ittiham olunub və bir il müddətinə əməkhaqqının 20%-nin tutulması şərtilə islah işlərinə məhkum olunub. Bundan başqa, o, 1500 manat məbləğində cərimə edilib. “Turan” agentliyi xəbər verir ki, vəkil özü işi saxtalaşdırılmış hesab edir.

Aslan İsmayılov necə məşhurlaşıb

Aslan İsmayılov Azərbaycanda ən məşhur hüquqşünaslardan biridir. 90-cı illərin əvvəllərində o, Prezident Aparatının hüquq şöbəsinin baş müşaviri olub. Onun adı tez-tez müxtəlif səs-küylü siyasi işlərlə bərabər hallanır. İsmayılov 1989-cu ildə Sumqayıt şəhərindəki erməni iğtişaşları ilə bağlı Bakıda keçirilmiş məhkəmə prosesində dövlət ittihamçısı kimi çıxış edib. Bundan sonra o, “Sumqayıt – SSRİ-nin süqutunun başlanğıcı” kitabını yazıb.

• Ermənistanda misli görünməmiş hadisə: ömürlük həbs cəzasına məhkum olunmuş şəxs azadlığa buraxılıb 

• Ötən amnistiyada Azərbaycandakı yüzdən artıq siyasi məhbusdan yalnız 12 nəfəri əfv olunub 

İttiham tərəfinin versiyası

İsmayılov barəsində cinayət işi 2017-ci ilin oktyabr ayında başlanıb. İttiham tərəfi iddia edir ki, Bakı şəhəri Binəqədi rayon məhkəməsi İsmayılovun “Müsavat” partiyasının başqanına qarşı iddia ərizəsini qəbul etməkdən imtina etdikdən sonra vəkil hakimi və məhkəmənin nümayəndəsini təhqir edib və qapını elə möhkəm çırpıb ki, o sınıb.

İsmayılovun versiyası

Vəkil hesab edir ki, bu işi baş prokuror Zakir Qaralov və dövlət başçısının köməkçisi Əli Həsənov sifariş ediblər. “Məni apteklərdə narkotik vasitələrin açıq satışı, Bakıda qanunsuz kazinoların fəaliyyət göstərməsi, Milli Onkologiya Mərkəzində korrupsiya haqqında bəyanatlarıma görə cəzalandırmaq istəyirlər”, – İsmayılov bildirib*.

Cari ildə bu İsmayılov barəsində verilmiş ikinci analoji hökmdür. İyul ayında o, bakılı restoran sahibi Mürvət Həsənova böhtan atması ittihamı ilə 1 il 6 ay müddətinə islah işlərinə məhkum olunmuşdu. İsmayılov həmin hökmü də “sifarişli” adlandırmışdı.