Azyaşlını öldürməkdə ittiham olunan məşqçiyə 19 il cəza verilib
Mehman Xəlilov – azyaşlını öldürən məşqçi
Ötən ilin aprel ayında Azərbaycanın Sumqayıt şəhərində sambo məşqində 7 yaşlı Fərid Bakarovun ölümündə ittiham olunan məşqçi Mehman Xəlilovun işi üsrə 6 aydır davam edən məhkəmə araşdırması sona çatıb. Hakim elan etdiyi hökmlə onu bu cinayətdə təqsirli bilib və 19 il müddətinə azadlıqdan məhrum edilməsinə qərar verib.
- Azərbaycanda yeni tendensiya – qadın jurnalistlər də həbs olunur
- AİHM Azərbaycanla bağlı daha 10 şikayətə baxıb
- Xədicə İsmayılova “Toplum TV işi” ilə bağlı dindirilib
Martın 19-da Sumqayıt Ağır Cinayətlər Məhkəməsində keçirilən prosesdə əvvəlcə müttəhim Mehman Xəlilovun son sözü dinlənilib. O, bildirib ki, uşağı qəsdən öldürməyib, bu hadisə məşq zamanı ehtiyatsızlıqdan baş verib:
“Fərid mənim ən sevdiyim tələbəm idi. Mən onu necə qəsdən öldürə bilərəm? Kameranın altında adam öldürərlər?! Mənə elə tərbiyə verilməyib ki, azyaşlını bilərəkdən öldürüm. Nəzərə alın ki, heç kim başına nə iş gələcəyini bilmir…”.
Nə baş verib?
Hadisə ötən il aprelin 29-da baş verib. Məşq zamanı ağır xəsarət alan 2016-cı il təvəllüdlü Fərid Bakarov Sumqayıt şəhər Uşaq Xəstəxanasına çatdırılsa da, onun həyatını xilas etmək mümkün olmayıb.
Hadisədən sonra sosial şəbəkələrdə videogörüntülər yayılıb. Həmin görüntülərdə sambo idman növü üzrə keçirilən təlim zamanı məşqçi azyaşlı tələbəyə zərbələr vurur, onu bir neçə dəfə qaldırıb yerə çırpır.
7 yaşlı Fərid Bakarov qardaşı ilə birlikdə iki ay imiş ki, Avropa Oyunlarının bürünc mükafatçısı olan Mehman Xəlilovun sambo məşqlərində iştirak edirmiş.
Hadisə vaxtı Fərid Bakarovun anası da orada olub.
Hadisədən sonra Mehman Xəlilova qarşı Cinayət Məcəlləsinin 126.3 (qəsdən bədənə ağır xəsarət yetirmə, ölümə səbəb olduqda) maddəsilə ittiham irəli sürülmüşdü. Lakin istintaq yekunlaşanda ittiham ağırlaşdırıldı və əməli qəsdən adam öldürməyə tövsif olundu.
Qapalı keçən proses, son söz və hökm
Qapalı keçən proses, son söz və hökm
Mehman Xəlilov son sözünü səsləndirərkən media və sosial şəbəkələri də ittiham edib. Onun sözlərinə görə, bu hadisə ictimaiyyət arasında yanlış yozulub və bu səs-küyün nəticəsində ona qarşı qəsdən adam öldürmə ittihamı irəli sürülüb.
“Mən idmançı kimi bu ölkənin bayrağını qaldıranda harda idiniz? Onda niyə çəkib yaymırdınız?!”, – deyə o gileylənib.
Hakimlər kollegiyası qısa müşavirədən sonra geri qayıdaraq, Mehman Xəlilovun 19 il azadlıqdan məhrum edilməsi barədə hökmü elan edib.
Sambo idman növü üzrə məşqçi olan 30 yaşlı Mehman Xəlilov Cinayət Məcəlləsinin 120.2.4 və 120.2.9-cu (xüsusi amansızlıqla və təqsirkar şəxs üçün aşkar surətdə köməksiz vəziyyətdə olan birini qəsdən öldürmə) maddələrilə təqsirli bilinib.
İttihama görə, Mehman Xəlilovun azyaşlının anası Aynurə Məlikova ilə şəxsi münasibətləri olub. O, uşağı bu üzdən qəsdən döyüb öldürüb.
Aynurə Məlikova da məhkəmədə iddia edib ki, Mehman Xəlilov ondan qisas almaq məqsədilə uşağını öldürüb.
Lakin Mehman Xəlilov bu ittihamları qəbul etmir. O, məhkəmədəki ifadəsində də deyib ki, hadisə məşq prosesində baş verib. Onun sözlərinə görə, uşağın bu cür məşq etdiyini anası da bilirmiş. Mehman Xəlilov hesab edir ki, əksinə, Aynurə Məlikova ondan qisas almaq üçün əleyhinə yalan ifadələr verib və həmin ifadələr əsasında da ona qəsdən adam öldürmə ittihamı irəli sürülüb.
Zərərçəkmişin hüquqi varisi qismində tanınan Aynurə Məlikova məhkəmə prosesinin qapalı keçirilməsini istəyib, o, jurnalistlərin iştirakına etiraz edib:
“Aramızda nə olubsa, bizə aiddir. Öz aramızdadır, özümüz bilirik”.
Onun vəsatəti əsasında məhkəmə araşdırmalarının qapalı keçirilməsinə qərar verilib. Dindirmələr, sənədlərin araşdırılması və s. qapalı iclaslarda aparılıb.
