"Lelo – Güclü Gürcüstan" alyansı seçkiyə gedir. Qalan müxalifət isə bunu sərt tənqid edir və boykotda israr edir
Gürcüstanda müxalifətin seçkilərdə iştirakı
Gürcüstanda müxalifətdən 4 oktyabr bələdiyyə seçkilərində iştirakla bağlı ilk açıq bəyanat səsləndirilib. “Lelo – Güclü Gürcüstan” koalisiyasının liderlərindən biri İrakli Kupradze 5 iyulda keçirdiyi xüsusi brifinqdə bildirib: “Bu seçkilərdə iştirak etməklə biz diktaturaya, Gürcüstandakı rus rejiminə qarşı mübarizənin daha bir əsas cəbhəsinə daxil oluruq.”
Digər bir neçə müxalif partiya və koalisiya dərhal bu bəyanata reaksiya verərək partiyanın qərarını “təəssüf doğuran” adlandırıb.
4 oktyabr tarixinə təyin olunmuş yerli idarəetmə orqanlarına seçkilər Gürcüstanda yeni bir siyasi gərginlik yaradıb. Onsuz da iqtidarda olan “Gürcü Arzusu” ilə müxalifət arasında kəskin qarşıdurma yaşanırdı. Bu dəfə isə qarşıdurma müxalifətin daxilində inkişaf edir. Seçkilərdə müxalifətin iştirak edib-etməməsi məsələsi həm də qərbyönlü ictimaiyyəti iki yerə bölüb, orada da gərgin debatlar gedir.
Səkkiz müxalif partiya seçkiləri boykot edəcəklərini bəyan edib. Onların əsas arqumenti budur ki, seçkilərdə iştirak real siyasi nəticələrə gətirib çıxarmayacaq, çünki onların fikrincə, “Gürcü Arzusu” artıq bütün səviyyələrdə hakimiyyəti ələ keçirib, siyasi repressiyalar gedir, vətəndaş cəmiyyəti və müstəqil media aktiv şəkildə sıradan çıxarılır. “Müxalifətin bu kontekstdə seçkilərə qatılması rejimin normallaşdırılmasına xidmət edəcək,” – deyə boykot tərəfdarları bildirir.
Üç müxalif partiya isə fərqli mövqe tutur və seçkilərdə iştirak edəcəklərini bildirir. Onların əsas arqumenti budur ki, seçkilər vəziyyəti dəyişmək, tərəfdarları səfərbər etmək və “Gürcü Arzusu”na meydanı verməmək üçün şansdır. “Güclü Gürcüstan” koalisiyasının səkkiz ay həbsə məhkum edilmiş lideri Mamuka Xazaradze müxalifəti birləşməyə, birlikdə qarşıdan gələn seçkilərə qatılmağa və “Gürcü Arzusu”nun bütün səviyyələrdə sistemli şəkildə möhkəmlənməsinin qarşısını almağa” çağırıb.
Bələdiyyə seçkilərini boykot edəcəyini açıqlayan səkkiz partiya və alyans: “Vahid Milli Hərəkat”, “Federalistlər”, “Azadlıq Meydanı”, “Avropa Gürcüstanı”, “Aqmaşenebeli Strategiyası”, “Droa”, “Axali”, “Girçi – Daha çox azadlıq”.
Seçkilərdə iştirak tərəfdarı olan üç partiya və alyans: “Lelo – Güclü Gürcüstan”, “Qaxariya – Gürcüstan naminə”, “Girçi” (Yaqo Xviçia).
“Lelo – Güclü Gürcüstan” nə deyir
“Bizim öz planımız, öz yolumuz var və bu yol xalqın maraqlarına uyğundur. Heç kim, xüsusən də “Gürcü Arzusu” bizi bu yoldan çəkindirə bilməz. Qətiyyətli, yorulmaz mübarizə bu gün Bidzina İvanişvili [oliqarx, “Gürcü Arzusunun” yaradıcısı] və Gürcüstandakı rus rejiminə qarşı yeganə yoludur.
Biz bu meydanda mübarizəni seçirik. Bu seçkiləri yerli adlandırmaq cinayətdir. Bu, faktiki seçkilərdə mübarizədir. Biz faktiki hökumətlə faktiki seçkilərdə mübarizə aparacağıq və bu mübarizə sonadək, qələbəylə bitənə qədər davam edəcək”, — “Lelo – Güclü Gürcüstan” alyansının baş katibi İrakli Kupradze bildirib.
“Güclü Gürcüstan” koalisiyasının iki lideri: Mamuka Xazaradze və Badri Caparidze keçmiş hökumətin (Mixail Saakaşvilinin prezidentliyi dövrünün) fəaliyyəti ilə bağlı araşdırma aparmaq üçün “Gürcü Arzusunun” parlamentdə yaratdığı müvəqqəti komissiya ilə əməkdaşlıq etmədiklərinə görə səkkiz aylıq həbs cəzasına məhkum olunublar.
Bu səbəbdən ümumilikdə altı müxalifət lideri həbsdədir, bir neçəsi isə saxlanılıb və hökm gözləyir.
“Bu, “Lelo”nun mənəvi ölümüdür” — digər müxalif qüvvələrdən sərt tənqid
“Vahid Milli Hərəkat» alyansının lideri Tina Bokuçava:
“Bu, çox kədərli haldır. Həddindən artıq. Mübarizə və müqavimət əvəzinə “Lelo” kompromis və rejimlə əməkdaşlıq yolunu seçdi.
Bu qərarı öz adı ilə çağırmaq lazımdır. Bu, ümumi mübarizəyə xəyanətdir. Bu, ölkəni xilas etmək uğrunda mübarizə deyil, rejimlə fəxri ikinci yeri almaq üçün sövdələşmədir.
Mən inkar etmirəm ki, Mixail Kavelaşvili (“Gürcü Arzusu”ndan prezident) artıq “Lelo”nun həbsdə olan liderlərini onların müraciətini gözləmədən əfv edəcək. Bu, sübut olunmuş Rusiya taktikasıdır: mənəviyyatsız kompromisə sürükləmək, sonra isə ən hiyləgər və amansız şəkildə ifşa etmək.
Bu gün biz “Lelo”nun mənəvi ölümünü gördük. Siyasət mənəviyyatsız yaşaya bilməz. Buna görə də oktyabrda onların seçki ölümünü də görəcəyik.
Siyasi məhbuslara azadlıq! Əvvəl-axır biz qalib gələcəyik!”
Tina Bokuçava 4 iyulda Mixaiil Kavelaşvilinin etdiyi bəyanatı nəzərdə tutur. O, həbsdə olan müxalifət liderlərinə əfv üçün müraciət etməyi təklif edib və vəd edib ki, onlar yerli özünüidarə orqanlarının seçkilərində iştirak etməyi vəd edərsə, müraciətləri nəzərə alınacaq. Kavelaşvili bildirib ki, onun fikrincə, bütün müxalifət partiyalarının bu seçkilərdə iştirak etməsi və tam seçki kampaniyası aparması vacibdir.
“Dəyişikliklər uğrunda Koalisiya”nın liderlərindən biri Elene Xoştaria: “Parlament seçkilərində “Lelo” dörd faiz aldı, belə az sayda tərəfdarla nə edə bilərlər? Dəqiqdir ki, Gürcüstanın taleyini müəyyən edə bilməzlər.
Onlar zəifdir, yoxsa satqındır, bunu tarix qiymətləndirəcək. Bizim isə çox işimiz var və biz mütləq onunla məşğul olacağıq.
İvanişvili bu ölkəni öz pulları ilə sındıra bilmədi, bu isə həqiqətən gülməlidir.”
“Azadlıq Meydanı” siyasi partiyası:
“Biz “Lelo – Güclü Gürcüstan”ın qondarma seçkilərdə iştirak qərarı ilə razılaşmırıq. Bu onların qərarıdır, amma bütün digər müxalifət üçün siyasi riskdir.
Buna baxmayaraq, biz yaxın aylarda daxili müxalif arenada mübarizəyə vaxt ayırmaq niyyətində deyilik. Bizim əsas hədəfimiz Rusiya partiyası olan “Gürcü Arzusu”dur.
“Azadlıq Meydanı” fəal boykotun və alternativ, demokratik, inklüziv siyasi prosesin təşkilinə fokuslanacaq.”
“Federalistlər” partiyasının lideri Tamar Çerqoleişvili:
“Rejimin tanınmaması üzrə kampaniyamızın hədəfi təkcə rejim yox, həm də onun köməkçiləri olacaq.
Biz seçicilərimizi intellektual təhqir etməyə imkan verməyəcəyik. Biz düzgün olmayan hər şeyə qarşı yönələcəyik.”
Gürcüstanda müxalifətin seçkilərdə iştirakı
