Koronavirusun “delta” və “alfa” ştammları Azərbaycana çatdı

13 iyul 2021-ci il tarixində Azərbaycanda ilk dəfə koronavirusun “delta” ştammına 31, “alfa” (Britaniya) ştammına isə 9 yoluxma halı qeydə alınıb. Səhiyyə Nazirliyi vətəndaşları fəal şəkildə peyvənd olunmağa çağırıb. Vaksinlər yeni ştammlardan qoruyurmu? Həkimlər nə deyir?

• Karantinin uzadılması və vaksinasiya prosesi: Ermənistanda koronavirusla bağlı vəziyyət pisləşir?
• “Ocağa” gəlməyin: Azərbaycan-Rusiya sərhədində nə baş verir?
• Bakıda səs-küylü həbslər: koronavirus xəstəxanasına yerləşdirilmək neçəyədir?

“Bir ildən uzun müddətdir davam edən SARS-CoV-2 pandemiyası bütün dünyada mühüm səhiyyə problemi olmaqla birlikdə sosial və iqtisadi cəhətdən də ciddi çətinliklər yaratmaqdadır. SARS-CoV-2 infeksiyasına qarşı aparılan tədbirlər, peyvəndlənmənin təşkili və effektivliyinin öyrənilməsi baxımından ölkəmiz dünyada ön sıralardadır. Koronavirusların mutasiyaları nəticəsində son zamanlar meydana çıxan yeni variantlar bütün dünyada ciddi narahatlıq doğurur. Ölkəmizdə epidemioloji vəziyyətin nəzarətdə saxlanılması üçün görülən tədbirlər çərçivəsində Milli Hematologiya və Transfuziologiya Mərkəzinin Genetik Diaqnoz Mərkəzində SARS-CoV-2 virusunun genetik variantlarına dair mütəmadi analizlər aparılır.

Aparılan araşdırmaların növbəti mərhələsində son dövrdə ölkə xaricindən gələn şəxslərdən alınmış nümunələrdən 31-də B.1.617 (Delta) variantı, 9-da B.1.1.7 (20 Alpha V1, Britaniya) variantı aşkar olunub”, – Səhiyyə Nazirliyinin, İcbari Tibbi Sığorta üzrə Dövlət Agentliyinin və Tibbi Ərazi Bölmələrini İdarəetmə Birliyinin (TƏBİB) birgə açıqlamasında deyilir.

Ölkədə səhiyyənin vəziyyətinə cavabdeh olan bu təşkilatlar vətəndaşları fəal şəkildə peyvənd olunmağa çağırıblar.

“Dünyada və ölkəmizdə aparılan tədqiqatlardan əldə olunmuş nəticələrin təhlili bir daha göstərmişdir ki, virusun yeni və sürətlə yayılan təhlükəli variantlarından qorunmağın ən effektiv yolu vaksinasiyadır. Bu gün ölkəmizdəki sabit epidemioloji vəziyyət üçün aparılan vaksinasiyaya borcluyuq. Bir daha bütün vətəndaşlarımızı vaxt itirmədən vaksinasiya olunmağa çağırırıq”, – əhaliyə müraciətdə bildirilir.

COVID-19 ilə bağlı vəziyyət

Bir aydan çoxdur ki, Azərbaycanda koronavirus infeksiyası ilə bağlı vəziyyət sabitdir. Doğrudur, son günlərdə sutkalıq yoluxma sayında bir qədər artım nəzərə şarpır, lakin həkimlərin sözlərinə görə, vəziyyət kifayət qədər idarəolunandır.

Hazırda bütün ölkə üzrə aktiv koronavirus xəstələrinin sayı təxminən 1600 nəfərdir.

Azərbaycanda vaksinasiya

13 iyul 2021-ci il tarixinə olan məlumata əsasən, Azərbaycanda vaksinin birinci dozası ilə ölkə əhalisinin 24,9 faizi peyvənd olunub. Əhalinin 16,6%-i isə vaksinin hər iki dozasını alıb.

Hazırda ölkədə koronavirusa qarşı dörd vaksin növü əlçatandır.

Ekspert rəyi

Həkim Süleyman Nəzərovun sözlərinə görə, koronavirusun özü kimi, onun ayrı-ayrı ştammları da az öyrənilib.

“Hamı anlamalıdır ki, mütəxəssislər də əksər hallarda sona qədər yoxlanılmamış məlumatları paylaşırlar. Bunun səbəbi isə sadədir: infeksiya yenidir, sona kimi öyrənilməyib, vaksinlərlə bağlı vəziyyət isə, ümumiyyətlə, tragikomikdir.

Bəzən mənim həmkarlarım da vaksinlərin təsir müddətindən, onların bu və ya digər ştammlara təsirindən danışırlar. Bütün bu məlumatar koronavirusun özünə aid olmayan orta statistik informasiyalara əsaslanır”, – ekspert JAMnews-a müsahibəsində deyib.

“Qəbul edilmiş beynəlxalq standartlara əsasən, vaksinin keyfiyyəti barədə yalnız onun meydana gəlməsindən 5 il sonra danışmaq olar. Məhz bu dövr ərzində yeni vaksinin bütün sınaq mərhələləri başa çatır. lakin koronavirusa qarşı vaksinlər çox yenidir, onlardan ən “köhnəsi”nin heç bir ili tamam olmayıb. Bu səbəbdən də, onların keyfiyyətləri barədə danışmaq üçün çox tezdir. Bunun üçün, sadəcə olaraq, kifayət qədər məlumat yoxdur.

Lakin yaranmış vəziyyətdə biz nə məsləhət görə bilərik? Yalnız peyvənd olunmağı. Çünki bu, vəziyyətdən hələlik yeganə çıxış yoludur. Mən indi mövcud olan vaksinləri “batan adam üçün saman çöpü” adlandırmazdım. İnsanların kütləvi şəkildə vaksinasiyaya cəlb edildiyi ölkələrdə onlar artıq müsbət statistika nümayiş etdirirlər. Buna görə də, vaksindən başqa heç nə tövsiyə edə bilmərik. Hazırkı anda bu real olaraq bizi xilas edə biləcək yeganə çarədir”, – Nəzərov əlavə edib.