Dünyada koronavirus: İspaniyada işə qayıdırlar, Çin epidemiyanın sürətlə yayıldığı Rusiya ilə sərhədi bağlayır. Foto
Rəqəmlər:
Aprelin 14-ə qədər bütün dünyada 1,9 milyondan çox insan COVID-19 virusuna yoluxub və ən azı 119 min insan bu virusdan ölüb.
Çində yeni xəstələnənlərin çoxu Rusiyadan gəlib
Çində əsas yoluxma mənbələri Rusiyadan qayıdan insanlar olub.
Son iki gün ərzində yalnız sərhədyanı ticarət mərkəzi olan Suyfınxe şəhəri vasitəsilə Çinə 409 nəfər gəlib. Onlardan 21 nəfər koronavirusa yoluxub.
Ümumilikdə əyalətdə 197 yoluxma halı qeydə alınıb, yoluxanların hamısı kənardan, əksəriyyəti də Rusiyadan gələnlərdir. Çin Rusiyadan bütün gələnlərə 14 günlük karantin tətbiq edir, Suyfınxe keçidi bağlanıb.
Rusiya səhiyyə sistemi gücünün son həddində işləyir
Rusiyada sutka ərzində 2,774 nəfər xəstələnib. Ümumilikdə ölkə üzrə xəstələrin sayı 21,102 nəfərə çatıb.
Bu rəsmi informasiyadır, yerli və əcnabi mütəxəssislər yoluxma hallarının xeyli daha çox olduğunu ehtimal edirlər, çünki minlərlə insana “stasionardankənar pnevmoniya” diaqnozu qoyulur.
Moskva epidemiya episentri olaraq qalır, burada sutka ərzində iki min nəfərə yaxın insan yoluxur. “Təcili yardım” maşınları 8-9 saat növbədə dayanır ki, xəstəni stasionara yerləşdirə bilsin.
Baş nazirin səhiyyəyə cavabdeh olan müavini Tatyana Qolikova “sistemin gücünün son həddində olduğu” haqda xəbərdarlıq edib.
- Pandemiya, Rusiya: xəstəlik partlayışı, qətiyyən hazır olmayan səhiyyə
- Şimali Qafqazda koronavirus: bütün regionlarda yoluxma var, İnquşetiya müftisi ölüb
- “Hesab edirəm ki, heç bir koronavirus yoxdu” – bunu sübut etmək üçün Vladiqafqazda xəstəxanaya hücum ediblər
Epidemioloqlar bildirirlər ki, Rusiya pandemiyanın inkişaf tempinə görə İtaliyaya yaxınlaşır, düz bir ay gecikdiyi halda.
Aprelin 15-dən Moskva sakinləri yalnız xüsusi buraxılışla hərəkət edə biləcəklər.
Bununla belə, digər regionlarda təcrid qaydaları tədricən yumşalır, amma ona görə yox ki, epidemioloji vəziyyət yaxşılaşır, sadəcə insanlara işləməyə icazə verilməsə, onlar tezliklə dolanışıq imkanlarını itirəcəklər.
Türkiyədə həbsxanalar boşaldılır
Türkiyə hakimiyyəti epidemiya şərtləri altında 90 min məhbusun həbsxanalardan buraxılması – əfv edilməsi və ya ev dustaqlığına keçirilməsi haqda elan edib.
Yerli media onların çoxunun “təşviş yaydıqları” üçün həbs olunan müxalifətçi, vətəndaş cəmiyyəti fəalları, jurnalistlər və blogerlər olduğuna diqqət çəkir.
- “Amma biznesi onsuz da bağlamayacağıq” – Türkiyə koronavirusun yayılması tempinə görə dünya birincisidir
- Belarusların fleşmobu: “Prezident sənin ölümün haqda nə deyərdi?”
- “Kimin yaşayacağına, kimin öləcəyinə qərar vermək – mənə öyrədilənlər bu deyildi” – Nyu Yorkdan olan həkimin hekayəsi
Türkiyədə aprelin 14-ə qədər 61,049 nəfər xəstələnib. 1300 nəfərə yaxın insan ölüb.
Ölkənin daxili işlər naziri Süleyman Soylu epidemiyanın yayılmasına görə, məsuliyyəti öz üzərinə götürüb, çünki onun sözlərinə görə, o, komendant saatına riayət olunmasını təmin edə bilməyib. Soylu istefa verib, amma Ərdoğan onun istefasını qəbul etməyib.
Digər Avropa ölkələrinin ardınca İspaniyada da insanlar işə qayıdır
İspaniya yoluxanların sayına görə Avropanın birinci, dünyanın isə üçüncü ölkəsidir.
Aprelin 14-ə olan məlumata görə, orada 172,541 nəfər yoluxub. 18 mindən çox insan ölüb.
Amma yeni yoluxanların və ölənlərin sayının kəskin azalması dinamikasının stabilliyi hakimiyyətə tədricən karantin tədbirlərini yüngülləşdirmək üçün əsas verib. Yalnız Madriddə və ərtaf ərazilərdə bu həftə 300 min nəfər işə qayıdacaq.
Hələlik söhbət yalnız “həyat əhəmiyyətli” müəssisələrdən gedir. Restoran, kafe, kinoteatr kimi obyektlər qapalı qalacaq.
Avstriya, Çexiya, Almaniyadan sonra İspaniya da karantinin yumşaldılmasına gedib.
Fransa mayın 1-dən məhdudiyyətlərin ləğvini elan edib – ilk olaraq məktəblər açılacaq.
ABŞ epidemiya pikini gözləyir
Bu həftə ABŞ-da epidemiya pikinin yaşanacağı gözlənilir – bundan sonra yeni yoluxma halları azalmağa başlayacaq.
Aprelin 14-ə olan məlumata əsasən, ABŞ-da 587,173 nəfər xastələnib, onlardan 23,644 nəfər ölüb.
Hakimiyyət qurbanların sayının 100 mindən 240 minə qədər ola biləcəyi haqda ilkin proqnoza düzəliş edib. İndi proqnoz 60 min nəfərdən ibarətdir.
Böyük Britaniya – ölkədəki bütün tibb işçilərinin üçdə biri koronavirusa yoluxub
Dövlət səhiyyə sistemində çalışan tibb işçilərinin total test edilməsindən əldə olunan nəticələr fövqəladə xəbər olub. Tibb işçilərinin üçdə birinin yoluxduğu təsdiqlənib.
Mütəxəssilərin bildirdiyinə görə, səbəb xəstəxana personalı üçün müdafiə vasitələrinin çatışmamasından ibarət ola bilər.
Aprelin 14-ə olan məlumata əsasən, Böyük Britaniyada 88,621 nəfər yoluxub, onlardan 11,329 nəfər ölüb.
