Azərbaycanda sosial şəbəkələrdə həkim çatışmazlığını müzakirə edirlər

Azərbaycanın ikinci şəhərində, Gəncədə, həkimlər virus ilə bacara bilmirlər və Bakıdan kömək istəyirlər – belə bir mesaj Bayram Pərdəşunas adında Facebook istifadəçisi yayıb.

“TƏBİB bizə kömək elə. Gəncə Təcili Yardım stansiyasında çağırışçı həkim çatışmır. Üç həkimimiz həlak olub. Bir neçəsi yoluxub. Bizə gənc həkimlər göndərin. Onların müqaviməti yüksəkdir. Həyatı təhlükəsi yoxdur. Bizlər 55 yaşdan yuxarı olanlarıq”.

Bakı medialarında isə ancaq bir nəfər – həkim Cəmşid Abbasovun koronavirusdan vəfatından məlumat olub.

Sosial şəbəkədə Bayram Pərdəşunasın bu statusu geniş yayılıb və qızğın müzakirələrə səbəb olub.

Bəzi şərhlər:

“Vəziyyət get-gedə daha da pisləşir. Özümüzü qorumasaq, millət olaraq fəsadlarını ağır çəkəcəyik”.

“Ailə tanıyıram ki, anaları reanimasiyada, 2 oğlu və gəlini isə karantində, tam səhlənkarlıqdan qaynaqlanır”.

TƏBİB-in (Tibbi Ərazi Bölmələrinin İdarəetmə Birliyi)  nümayəndəsi Vəli Əliyev mətbuat konfransında dedi ki məsələ araşdırılacaq:

“Tək Gəncə deyil, Bakıda, digər yerlərdə də kritik vəziyyətə şahid ola bilərik. Bəziləri evdə qalır, xəstəliyi gizlədirlər, bu da daha ciddi problemlərə yol açır. Çox insan tanıyıram ki, ailə üzvlərindən koronavirusa yoluxduqlarını gizlədir. Belə hallar isə yoluxmanı artırır. Yoluxma halı çox olsa, yüngül vəziyyətdə olan xəstələr məcburən evdə qalacaq”.

Azərbaycanda koronavirus infeksiyasına 336 yeni yoluxma qeydə alınıb, 183 nəfər sağalıb və evə buraxılıb.

Bugünədək ümumilikdə 9 218 nəfərin koronavirusa yoluxması müəyyən edilib, onlardan 5 113 nəfər sağalıb, 113 nəfər vəfat edib.

Hazırda virusa yoluxanlarım aktiv sayı 3 992 nəfərdir.

Rəsmi məlumata görə, son sutkada koronavirusla bağlı 5 600 test aparılıb, bununla da testdən keçənlərin sayı 368 254 nəfərə çatıb.