Amerikalı konqresmenlər İvanişviliyə qarşı maliyyə sanksiyaları tələb edirlər
İvanişviliyə qarşı maliyyə sanksiya
ABŞ-ın Helsinki Komissiyası kimi tanınan Avropada Təhlükəsizlik və Əməkdaşlıq Komissiyasının üzvləri ABŞ dövlət katibi Entoni Blinkenə ünvanlanmış məktub dərc edərək, gürcü oliqarxa və Gürcüstanın hakim “Gürcü Arzusu” partiyasının yaradıcısı Bidzina İvanişvili və onun çevrəsinə qarşı fərdi maliyyə sanksiyalarının tətbiqini tələb ediblər.
Məktubda qeyd olunur ki, Bidzina İvanişvili “Gürcüstanın Avropa yolundan sapması və ölkənin getdikcə avtoritar idarəçiliyə keçməsi səbəbindən xüsusi tənqid hədəfinə çevrilib”.
26 iyul tarixli bu məktubu “Foreign Press”in müxbiri Aleks Raufoğlu sosial şəbəkələrdə yayıb.
Məktubu ABŞ-ın həm Demokratik, həm də Respublikaçı partiyalarının konqresmenləri: Co Wilson, Steve Cohen, Richard Hudson və Mark Wiese imzalayıblar. Onlar Blinkeni Gürcüstana qarşı “daha sürətli və daha güclü addımlar atmağa” çağırırlar.
Məktubda deyilir ki, Gürcüstandakı mövcud siyasi vəziyyətlə əlaqədar olaraq, Gürcüstan hökumətinin üzvlərinə qarşı tək viza məhdudiyyətləri kifayət deyil və “əsas korrupsiya və zərərli təsir mərkəzlərinə” – Bidzina İvanişvili və onun yaxın ətrafına qarşı maliyyə təsiri zəruridir, çünki bu insanlar gürcü xalqının iradəsini və azadlığını məhdudlaşdırmamalıdırlar.
Məktubda “Gürcü arzusu”ndan “avtoritar və antidemokratik hökumət” kimi bəhs edilir və qeyd olunur ki, bu hökumətdən gürcü xalqı təcili olaraq qorunmalıdır.
“Hadisələrin tempi və şiddəti Gürcüstan xalqını qorumaq üçün əlavə tədbirlərin məqsədəuyğun və təcili olduğunu göstərir. Aydın olmalıdır ki, ölkə daxilində korrupsiyanın və bədxah təsirin əsas daşıyıcıları müstəqil olaraq və ya digər anti-Qərb qüvvələrlə ittifaqda gürcü xalqını ovlamaqda sərbəst olmamalıdırlar və qəsdən demokratiyaya hücum etməməlidirlər”, – məktubda deyilir.
Məktubda həmçinin bütün dünyada fəaliyyət göstərən və konqresmenlərin fikrincə, “Gürcü arzusu”nun qara pullarının mənbəyi olan və vətəndaş cəmiyyəti nümayəndələrini, fəalları, müxalifətçiləri və onların ailələrini təqib etmək və qorxutmağa xidmət edən “fırıldaqçı zəng mərkəzləri”nə də toxunulur. Konqresmenlər bu zəng mərkəzlərinin Gürcüstandakı korrupsioner məmurlarla onların Rusiyadakı “həmfikirləri” arasında əlaqə olduğunu da düşünürlər.
“Biz hesab edirik ki, Dövlət Departamenti ABŞ və dost ölkələrin hüquq-mühafizə orqanları ilə əməkdaşlıq edərək, beynəlxalq miqyasda oxşar zəng mərkəzləri şəbəkəsinə qarşı onların fəaliyyətinin qarşısını almaq üçün təcili, tez və dərhal sistemli tədbirlər görməlidir”, – konqresmenlər deyirlər.
Məktubda qeyd edilir ki, tələb olunan sanksiyalar MEGOBARI qanun layihəsinə tam uyğundur. Konqresmen Joe Wilson tərəfindən də dəstəklənən qanun layihəsi və ya akt, siyasi liderlərə və “Gürcü arzusu” hökumətinin üzvlərinə qarşı sanksiyalar, habelə biznes nümayəndələri və Gürcüstanın hüquq-mühafizə və təhlükəsizlik orqanlarının əməkdaşlarına məhdudiyyətlər tətbiq edəcək.
“Bu tədbirlər Gürcüstanda demokratik prosesləri, insan haqlarının müdafiəsini və qanunun aliliyini gücləndirəcək və bir daha vurğulayacaq ki, ABŞ Gürcüstanın Avro-Atlantik inteqrasiyasını qətiyyətlə dəstəkləyir və avtoritar rejimlərin, xüsusən də Rusiyanın təsirinə qarşıdır”, – məktub müəllifləri qeyd edirlər.
MEGOBARI Aktı haqqında ətraflı
İyulun 11-də ABŞ Konqresinin Nümayəndələr Palatasının Xarici Əlaqələr Komitəsi Qərb tərəfdaşlarının fikrincə, Gürcüstanda ölkənin Avropaya inteqrasiyasına və onun demokratik tərəqqisinə mane olan “xarici agentlər” qanununun qəbul edilməsinə cavab olaraq MEGOBARI Aktına səs verib.
“Xarici agentlər haqqında” qanunun qəbul edilməsində bu və ya digər şəkildə məsul olan şəxslərə qarşı sanksiyalardan əlavə, MEGOBARI Aktı Gürcüstanın “demokratik, Qərb kursunu gücləndirəcəyi təqdirdə” ona dəstək vəd edir.
Gürcüstanın baş naziri İrakli Kobaxidze iyulun 31-də jurnalistlərlə söhbətində deyib ki, “MEGOBARI Aktı” şantaj üzərində qurulub və bu, əks nəticə verir.
“Xüsusilə xaricdən dəstəklənən bir hökumətin bu ölkədə yaratdığı vəziyyəti kökündən dəyişdirən hökumətə münasibətdə şantaj dili ilə danışmaq düzgün deyil (o, Mixail Saakaşvili hökumətini nəzərdə tutur – JAMnews)”.
“Şantaj və təhdid əvəzinə, münasibətlərin bərpası ilə bağlı sağlam söhbət etməliyik”, – deyən Kobaxidze sanksiyalar mövzusu ilə ümumiyyətlə maraqlanmadığını bildirib.
