İşçi hüquqları müdafiəçisi 3 il azadlıqdan məhrum edilib
“İşçi Masası”nın həbs edilən üzvləri
Azərbaycanda işçi hüquqlarının müdafiəçisi məhkəmənin hökmü ilə 3 il müddətinə azadlıqdan məhrum edilib. “İşçi Masası” Həmkarlar İttifaqları Konfederasiyasının üzvü Elvin Mustafayev narkotik vasitələri satış məqsədi olmadan qanunsuz olaraq xüsusilə külli miqdarda əldə etməkdə ittiham təqsirli bilinib. O, ittihamları rədd edib. Həmin təşkilatın haqqında oxşar ittihamla cinayət işi qaldırılan ikinci üzvünün məhkəməsi hələ də davam edir.
- Azərbaycan məhkəməsi tanınmış hüquq müdafiəçisinin məhkumluğunu ləğv etməyib
- Azərbaycanda qeydiyyat problemi – kütləvi cərimələr
- Gürcüstanın baş naziri istefa verib
Yanvarın 31-də Bakı Ağır Cinayətlər Məhkəməsində “İşçi Masası” Həmkarlar İttifaqları Konfederasiyasının üzvü Elvin Mustafayevin cinayət işi üzrə məhkəmə prosesi başa çatıb. Məhkəmə onu xüsusilə külli miqdarda narkotik vasitələrin qanunsuz əldə edilməsi ittihamı ilə 3 il müddətinə azadlıqdan məhrum edib.
Yanvarın 31-də Bakı Ağır Cinayətlər Məhkəməsində “İşçi Masası” Həmkarlar İttifaqları Konfederasiyasının üzvü Elvin Mustafayevin cinayət işi üzrə məhkəmə prosesi başa çatıb. Məhkəmə onu xüsusilə külli miqdarda narkotik vasitələrin qanunsuz əldə edilməsi ittihamı ilə 3 il müddətinə azadlıqdan məhrum edib.
Mustafayev ötən il avqustun 4-də saxlanılıb. Ona qarşı Cinayət Məcəlləsinin 234.4.3-cü (satış məqsədi ilə külli miqdarda narkotik vasitələri əldə etmə, daşıma, saxlama) maddəsi ilə ittiham irəli sürülüb. Daha sonra bu maddə 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri külli miqdarda əldə etmə, saxlama, istehsal etmə, emal etmə, daşıma) maddəsi ilə əvəz edilib.
Gənc aktivist ittihamları rədd edərək bunu həmkarlar ittifaqı daxilində ictimai fəaliyyəti ilə əlaqələndirib. Müdafiə tərəfi məhkəmədən fəala bəraət hökmü çıxarılmasını istəyib. Hökmdən apellyasiya şikayəti veriləcək.
Ayxan İsrafilov. Foto: açıq mənbələr
Yanvarın 30-da Bakı Ağır Cinayətlər Məhkəməsində “İşçi Masası”nın Cinayət Məcəlləsinin 234.1-1-ci (narkotik vasitələrin saxlanması və yayılması) maddəsi ilə təqsirləndirilən digər üzvü Ayxan İsrafilovun işi üzrə məhkəmə prosesi davam etdirilib. Bu maddə ilə onu 3 ildən 8 ilədək həbs gözləyir.
İsrafilov da Mustafayev kimi ötən ilin avqustunda həbs edilib. O da ittihamı qəti şəkildə rədd edir və həbsini ictimai fəaliyyəti ilə əlaqələndirir.
Məhkəmə iclasında Nərimanov rayon polis idarəsinin iki əməkdaşı şahid qismində dindirilib. Onlardan biri Vüsal Həsənov ifadəsində bildirib ki, İsrafilovun narkotik vasitə saxlaması haqda məlumatla bağlı onun yaşadığı ünvana gedib.
Lakin İsrafilov məhkəmədə bildirib ki, Z.Həsənov onun evinə gəlməyib və onunla polis bölməsində görüşüblər. Aktivistin sözlərinə görə, ona fiziki təzyiq göstərən, etirafını tələb edən də məhz Həsənov olub.
Vəkil Fariz Namazlı polis əməkdaşından saxlanarkən İsrafilovun motosikletinə niyə baxış keçirmədiklərini soruşub. Bu barədə polis əməkdaşı bildirib ki, onun məlumatına görə, narkotik vasitə İsrafilovun üzərində olub.
Dindirilən digər polis əməkdaşı Fariz Nağıyev İsrafilovla eyni məktəbdə oxuyub. Polis əməkdaşı İsrafilova onun üzərində narkotik tapıldığını etiraf etməyi məsləhət görüb, işi kiçik doza ilə “bağlayacağını” və fəalın cəmi üç il həbslə “canını qurtaracağını” vəd edib.
İsrafilov həmçinin ifadəsində bildirib ki, ona fiziki təzyiq göstərilərkən və üzərindən narkotik maddənin “aşkar edilməsi”nin videoçəkilişi aparılarkən təyin olunmuş dövlət vəkili onun yanında olub, lakin müdafiəçi baş verənlərə heç bir şəkildə müdaxilə etməyib.
Müdafiə tərəfi vəsatət qaldıraraq təyin olunmuş vəkilin avqustun 11-də və 12-də idarədə olduğunun yoxlanılması üçün Nərimanov RPİ-nin və müvəqqəti saxlanma təcridxanasının videokameralarının qeydə aldığı görüntüləri tələb edib.
Bu vəsatət həmin vəkilin İsrafilova cəmi bir dəfə qısa müddətlik baş çəkdiyini sübut etmək üçün verilib.
Növbəti məhkəmə iclası fevralın 27-nə təyin edilib.
Hazırda “İşçi Masası”nın iki üzvü və sədri həbsdədir. Həmkarlar İttifaqları Konfederasiyasının sədri Afiyəddin Məmmədov tanımadığı şəxsi bıçaqlamaqda ittiham olunur. O, bildirir ki, ona böhtan atılıb və bu cinayət işi tamamən quramadır.
Hər üç şəxs hüquq müdafiəçiləri tərəfindən siyasi məhbus kimi tanınır və onlar hesab edirlər ki, fəalların həbsinin əsl səbəbi kuryer xidməti işçilərinin hüquqlarını müdafiə etməyə yönəlmiş fəaliyyətləri olub.
