Gürcüstanda nə və niyə baş verir? Bakıdan baxış
İlqar Məmmədov Gürcüstandakı vəziyyət haqqında
Gürcüstanda parlamentin “xarici agentlər” haqqında qanunu qəbul etməsinə qarşı kütləvi etirazlar davam edir. Qonşu ölkədə baş verənlər Azərbaycanda da maraqla izlənilir.
“Oktyabrda bu ölkədə parlament seçkiləri keçiriləcək. Vəziyyətin gərginləşməsinə yol açan qanunun seçki ərəfəsində qəbulu cəhdi qəribə və şübhəlidir. Hökumət 6 ay gözləyə də bilərdi, amma müxalifətin əlinə bilərəkdən mövzu verdi, özü də prezident bu məsələdə müxalifətin tərəfində ola-ola. Görəsən niyə?” -“Respublikaçı Alternativ” partiyasının sədri, keçmiş siyasi məhbus İlqar Məmmədov yazır.
- Gürcüstan: “Xarici agentlər qanunu”na etiraz edən fəal Lazare Qriqoriadis azadlığa buraxılıb
- Aİ nümayəndəsi Gürcüstanda “xarici agentlər haqqında” qanun layihəsi ilə Aİ Direktivi arasındakı fərqi izah edir
- Gürcüstan parlamenti “xarici agentlər haqqında” qanunu birinci oxunuşda qəbul edib
·
“Gürcüstanda vətəndaş cəmiyyətini sıxacağı iddia edilən qanunun qəbuluna qarşı kütləvi meydan etirazlarının Azərbaycana təsiri və nəticəsi nə ola bilər?
Xeyr, bizdə on minlərlə insan 2013-cü ildə qəbul olunmuş oxşar qanunlara etiraz üçün meydanlara axışan deyil. Baxmayaraq ki, hazırda vətəndaş cəmiyyəti fəallarının davam edən həbsinə şəraiti məhz 2013 qanunları yaradıb. Siyasi-ictimai azadlıq mövzuları burda hələ maraqsızdır. İqtisadiyyatda fırlanaraq hər kəsə azdan-çoxdan çatan neft-qaz pulları iqtisadiyyatın canında nisbətən azalmayınca, vəziyyət bu baxımdan dəyişməyəcək.
Qayıdaq Gürcüstana. Oktyabrda bu ölkədə parlament seçkiləri keçiriləcək. Vəziyyətin gərginləşməsinə yol açan qanunun seçki ərəfəsində qəbulu cəhdi qəribə və şübhəlidir. Hökumət 6 ay gözləyə də bilərdi, amma müxalifətin əlinə bilərəkdən mövzu verdi, özü də prezident bu məsələdə müxalifətin tərəfində ola-ola. Görəsən niyə?
Əlbəttə, bütün bunlar Gürcüstanın daxili işidir. Mən hadisələrə ancaq Azərbaycanın maraqları baxımından qiymət verməyə çalışıram.
Tutaq ki, qanun qəbul edildi və prezident söz verdiyi kimi ona veto qoydu. Vetonu parlament aşa da bilər, amma nəticədə prezident öz vəzifəsini itirəcək. Bu cür siyasi dramın tərkibində meydan hərəkatı da varsa, hökumətin də istefası ehtimalı da yaranır.
Buna isə Moskva və onun gürcü, abxaz, osetin tərəfdarları, heç şübhəsiz, durub mat-mat baxmayacaq. Hökumətin getməsini çevriliş kimi görəcəklər. Onsuz da rus təhlilçilər bir səslə deyir ki, 2008-də ordumuz Gürcüstanı gərək tərk etməzdi.
Sonrakı hadisələr daha da dramatikdir. Rusiya ordusu təzəcə yığdığı qiymətli döyüş təcrübəsi ilə Gürcüstanı qısa vaxt ərzində hər hansı adla zəbt edir və Rusiya Ermənistanla faktiki həmsərhəd olur. Ermənistandakı Paşinyan hökuməti çox ciddi seçim qarşısında qalır. Nəticə etibarı ilə, Azərbaycan da yeni vəziyyətə uyğunlaşmalı olur.
Sözün qısası, Gürcüstandakı indiki gərginliyin demokratik etiraz formalarına baxmayaraq, təməlində Rusiyanın çox bacarıqlı strateji hesablaması dura bilər. Doğrudan da, gərginlik yaratmaq, ya da yaratmamaq haqda qərar Rusiya ilə isti münasibəti ilə fərqlənən İvanişvili hökumətinin əllərində idi. Hökumətin son illərdə ciddi uğurları olduğu yerdə bu uğurlar üzərindən kampaniya aparıb 6 aydan sonrakı seçkidə mövqeyini möhkəmlətmək əvəzinə, niyə məhz gərginliyi seçdi?
Ruslar çoxdan şikayət edirdi ki, Qərb onlara qarşı Gürcüstanda ikinci cəbhə açmağı planlayır. Ola bilər, ruslar fikirləşir ki, ikinci cəbhə onlar üçün narahat vaxtda açılınca, qoy elə indi, rahat vaxtda açdıraq və məsələni kökündən həll edək. Yox, işdir, qanun birtəhər qəbul olunsa və vəziyyət sakitləşsə, onda yavaş-yavaş Qərbin Gürcüstanda maliyyələşdirdiyi çevrələri tədricən neytrallaşdırıb, Gürcüstanla istədiyimiz tipdə qonşuluğa nail olarıq”, – “Respublikaçı Alternativ” partiyasının sədri, keçmiş siyasi məhbus İlqar Məmmədov Telegram kanalında yazıb.
