İlkin məlumata görə, "Gürcü Arzusu" bütün bələdiyyələrdə qalib gəlir
Gürcüstanda bələdiyyə seçkilərinin ilkin nəticələri
Gürcüstanda yerli özünüidarəetmə orqanlarına seçkilər başa çatıb. Mərkəzi Seçki Komissiyasının ilkin məlumatına görə, hakim “Gürcü Arzusu” partiyası bütün bələdiyyələrdə qalib gəlir.
Yalnız “Gürcü Arzusu” namizədlərinin irəli sürüldüyü dairələrdə partiya, təbii olaraq, 100 faiz səs qazanıb.
Mərkəzi Seçki Komissiyasının ilkin hesablamalarına əsasən, “Gürcü Arzusu” partiyası Gürcüstanda açılmış 3 061 seçki məntəqəsindən 2 279-nun (yəni 74,453%) nəticələrinə görə 80,783% səs toplayıb.
“Gürcü Arzusu” birinci yerdədir (80,783%), onu “Lelo – Güclü Gürcüstan” (6,775%), “Qaxaria Gürcüstan üçün” (3,872%), “Girçi” (3,291%) və “Gürcüstan üçün Mühafizəkarlar” (2,765%) partiyaları izləyir. Digər partiyaların dəstəyi 1 faizdən azdır.
Tbilisidə seçki məntəqələrinin 99 faizində səslər sayılıb və nəticələr belə bölünüb:
- “Gürcü Arzusu” (70,179%),
- “Lelo – Güclü Gürcüstan” (10,034%),
- “Girçi” (7,488%),
- “Gürcüstan üçün Mühafizəkarlar” (4,329%),
- “Qaxaria Gürcüstan üçün” (3,192%).
Paytaxtda digər partiyalar 1 faiz və ya daha az səs toplayıb.
Mərkəzi Seçki Komissiyasının məlumatına görə, seçkilərdə 1 milyon 438 min 116 seçici iştirak edib ki, bu da ümumi seçicilərin 40,93 faizini təşkil edir. 2021-ci ildə keçirilən əvvəlki bələdiyyə seçkilərində iştirak faizi 51,92, yəni 1 milyon 815 min 776 nəfər olmuşdu.
Mərkəzi Seçki Komissiyasının nümayəndəsi Natiya İoselianinin sözlərinə görə, seçki günü sakit və təhlükəsiz şəraitdə keçib. O həmçinin bildirib ki, dairə seçki komissiyasına əsasən foto və video çəkiliş qaydalarının pozulması, seçki məntəqələrinin təşkilindəki nöqsanlar və bu kimi digər hallar üzrə 24 şikayət daxil olub.
Tbilisi meri seçkilərinin nəticələri
- Mərkəzi Seçki Komissiyasının ilkin məlumatına əsasən, “Gürcü Arzusu” partiyasının Tbilisi meri vəzifəsinə namizədi Kaxa Kaladze 71,557% səs toplayıb.
- “Lelo – Güclü Gürcüstan” və “Qaxaria Gürcüstan üçün” partiyalarının namizədi İrakli Kupradze 12,459%,
- “Girçi” partiyasının namizədi Yaqo Xviçia 7,528%,
- “Gürcüstan üçün Mühafizəkarlar” partiyasının namizədi Zurab Maxaradze isə 4,121% səs qazanıb.
“Gürcü Arzusu” partiyasının nümayəndələri qələbəni partiyanın ofisində qeyd ediblər. Partiya üzvlərinə onun liderləri, o cümlədən fəxri sədr, oliqarx Bidzina İvanişvili müraciət edib.
O, qələbəni təsirli adlandıraraq, müxalifətin “fəlakətli məğlubiyyətə” uğradığını bildirib.
“Onlar [müxalifət] bizi axmaq kimi göstərməyə, hakimiyyəti saxlaya bilməyən bir kütləyə çevirməyə çalışırlar, amma artıq bizim arxamızda qalıblar. İndi də seçkilərdə fəlakətli şəkildə uduzduqları halda, küçələrdə nəsə etməyə cəhd edirlər. Ancaq xoşbəxtlikdən, gürcü xalqının müdrikliyi burada da özünü göstərdi. Baxın, onların [etirazçıların] sayı nə qədərdir. 80 faiz insan hakim partiyanı dəstəkləyib, amma 10 min nəfər dövlət çevrilişi etməyə çalışır? Bu, ağlasığmazdır”, – deyə İvanişvili bildirib.
Gürcüstanda bələdiyyə seçkilərinin ilkin nəticələri
