İlham Əliyev: “Biz sərhədləri müəyyən ediriksə, DQ-nın hansı statusundan söhbət gedə bilər?”
Azərbaycan prezidenti bildirib ki, Dağlıq Qarabağ ətrafında münaqişə həll edilib. Onun sözlərinə görə, ATƏT-in Minsk Qrupu öz fəaliyyətini başa vurub. “Əgər biz sərhədləri müəyyən ediriksə, DQ-nın hansı statusundan söhbət gedə bilər?” – İlham Əliyev ikinci Qarabağ müharibəsindən sonra Azərbaycanın nəzarəti altına qayıdan Zəngilan rayonunun Ağalı kəndində “Ağıllı kənd” layihəsinin birinci mərhələsinin açılışında çıxışı zamanı deyib.
- “Ermənistan və Dağlıq Qarabağ hərraca çıxarılıb”: Brüsseldə keçirilən Paşinyan-Əliyev danışıqlarına reaksiya
- Brüsseldə növbəti əyani Əliyev-Paşinyan görüşü: “Diskussiya məhsuldar oldu”
- Azərbaycanın anklav kəndlərinin taleyi sərhədlərin delimitasiyası prosesində həll olacaq – Bakıdan şərh
Azərbaycan prezidenti İlham Əliyev həmçinin Zəngilanda beynəlxalq hava limanının itikintisinin gedişatı ilə də tanış olub.
Azərbaycan 2020-ci il 44 günlük müharibədən sonra ölkənin nəzarəti altına qayıdan ərazilərdə üç aeroport tikməyi planlaşdırır. Onlardan birincisi – Füzuli Hava Limanı 2021-ci ilin oktyabrında istismara verilib. Zəngilan aeroportu bu ilin sonuna qədər işə düşməlidir. Laçın aeroportunun 2024-cü ildə istismara verilməsi nəzərdə tutulub.
“Dağlıq Qarabağ münaqişəsi həllini tapıb”
İlham Əliyev Zəngilan rayonunda smart-kəndin açılışında çıxışı zamanı bildirib ki, Dağlıq Qarabağ münaqişəsi tarixdə qalıb:
“Biz bu məsələni həll etmişik, Ermənistan istəsə də, istəməsə də bunu bütün dünya qəbul edir. Biz Dağlıq Qarabağ münaqişəsini həll etmişik. Dağlıq Qarabağ münaqişəsi həll olunub.
Qaldı ki, Dağlıq Qarabağ inzibati ərazisinə, bu ərazi Azərbaycan ərazisində yoxdur. Ona görə beynəlxalq qurumların leksikonunda Dağlıq Qarabağ sözü yoxdur və son Brüssel görüşü bunu bir daha göstərdi. Düzdür, Ermənistanda indi bu məsələ ilə bağlı yenə də hay-haray qaldırıblar və necə deyərlər, başlarını divara vururlar, amma bu, reallıqdır və onlar bu reallıqla barışmağa məcburdurlar”.
“Minsk Qrupu öz fəaliyyətini başa vurub”
“Minsk Qrupu öz fəaliyyətini başa vurub. Minsk qrupu ilə bağlı mən öz fikirlərimi demişdim, bir daha təkrar etməyə ehtiyac yoxdur və indi postmünaqişə dövrüdür.
Biz bu dövrdə yaşayırıq və postmünaqişə dövründə də biz gündəliyi diktə edirik və müharibədən keçən ilyarım ərzində nəyi istəmişiksə ona nail olmuşuq. Nəyi demişəmsə buna biz nail olmuşuq, ya da ki, nail oluruq.
Birincisi, bütün dünya, aparıcı ölkələr və aparıcı beynəlxalq təşkilatlar yeni reallıqları qəbul ediblər. Bu, çox vacib idi, çünki başqa cür də ola bilərdi. Bu, bizim çox böyük siyasi uğurumuzdur.
İkincisi, bizim gündəliyimiz artıq aparıcı beynəlxalq təşkilatlar tərəfindən əsas kimi götürülür”, – Azərbaycan prezidenti qeyd edib.
“Biz sərhədləri müəyyən ediriksə, DQ-nin hansı statusundan söhbət gedə bilər?”
Əliyev öz çıxışında Ermənistanla dövlət sərhədlərin delimitasiyası ilə bağlı danışıqlar məsələsinə də toxunub:
“Mən demişdim ki, biz Ermənistanla sərhədləri müəyyən etməliyik. Ermənistan bundan imtina edirdi, ilyarım imtina edirdi. Amma nəticə nə oldu? Mayın 24-də Azərbaycan-Ermənistan sərhədində komissiyaların birinci görüşü keçirildi. Bunun çox böyük mənası var.
Həm o nöqteyi-nəzərdən ki, biz bu sərhədləri müəyyən edəcəyik və bu, çox vacibdir. Çünki ermənilər o sərhədləri də zəbt etmişlər. Digər tərəfdən bu, avtomatik olaraq Ermənistanda revanşist, faşist qüvvələr tərəfindən Azərbaycana qarşı irəli sürülən ərazi iddialarına da rəsmən son qoyur.
Çünki əgər biz sərhədləri müəyyən ediriksə, hansı dırnaqarası “Dağlıq Qarabağ” statusundan söhbət gedə bilər?! Qarabağ zonası var, Qarabağ diyarı var. Bu, Azərbaycan ərazisidir və bütün dünya bunu qəbul edir.
Ona görə Azərbaycan-Ermənistan sərhəd delimitasiyası üzrə komissiyaların birinci iclasının çox böyük əhəmiyyəti var”.
Sülh sazişi və Zəngəzur dəhlizi haqda
“Biz demişdik ki, Ermənistan ilə Azərbaycan arasında sülh müqaviləsi imzalanmalıdır. Ermənistan bundan boyun qaçırmağa can atırdı. Çünki sülh müqaviləsi ölkələrin ərazi bütövlüyünün qarşılıqlı surətdə tanınması deməkdir. Amma nəticə etibarilə biz buna da nail olduq və artıq Azərbaycan öz işçi qrupunu müəyyən edib.
Daha bir vacib məsələ, Zəngəzur dəhlizinin açılmasıdır. Ermənistan hər zaman buna da maneçilik törətməyə çalışırdı. Amma yenə də, Brüssel görüşünün rəsmi açıqlamasına baxın, artıq həm dəmir yolu, həm avtomobil yolunun Mehridən, Zəngəzurdan keçməsi müəyyən olunub”, – İlham Əliyev bildirib.
“Ermənilərin Azərbaycanda yaşaması üçün heç bir problem yoxdur”
Azərbaycan prezidenti qeyd edib ki, ermənilərin istərsə Qarabağda, istərsə ölkənin başqa yerlərində yaşamasında heç bir problem görmür:
“Azərbaycanda bütün xalqların nümayəndələri rahat yaşayırlar, bütün hüquqlardan istifadə edirlər. Heç vaxt Azərbaycanda milli, dini zəmində ayrı-seçkilik olmayıb və olmayacaq. Ona görə Azərbaycanda yaşayan ermənilərin hüquqları, təhlükəsizliyi Azərbaycanda yaşayan digər xalqların təhlükəsizliyi, hüquqları qədər önəmlidir. Burada hansısa xüsusi imtiyazdan söhbət gedə bilməz.
Bir də ki, dünyada, Avropada təcrübə var. İndi Avropada müxtəlif konvensiyalar var. Həm Avropa Şurası ölkələri bu konvensiyalara qoşulublar, həm Avropa İttifaqı ölkələri çərçivəsində qaydalar və rəsmi sənədlər var. Orada hər şey göstərilib və biz bu ümumbəşəri trend, yəni, meyil məcrasında gedirik.
Ermənistan əgər hansısa xüsusi tələb irəli sürərsə bilməlidir ki, bizim də bir çox tələblərimiz ola bilər. Bax, buraya çox da uzaq olmayan məsafədə bizim qədim torpağımız Qərbi Zəngəzurdur.
Biz Ermənistana qarşı ərazi iddiası ilə çıxış etmirik ki? Etmirik. Amma əgər onlar bizə qarşı ərazi iddiası ilə çıxış edəcəksə, biz niyə etməməliyik? Tarix var. Hər kəs açsın baxsın kitablara, ensiklopediyalara: nə vaxt Qərbi Zəngəzuru bizdən ayırıb Ermənistana verdilər? 1920-ci ilin noyabrında”.
