Hakimiyyəti tənqid edən azərbaycanlı jurnalist polisi adam oğurluğunda və işgəncə verməkdə günahlandırıb

Hakimiyyəti kəskin tənqid edən jurnalist və bloger İsmayıl İslamoğlu polis əməkdaşlarını onu üç gün şöbədə qanunsuz saxlamaqda, işgəncə verib, təhdid etməkdə günahlandırıb. Polis bütün bunları tamamən inkar edir və əksinə, bildirir ki, yoxa çıxmış jurnalisti tapıb və evinə qaytarıb.

Nə baş verib? İki ziddiyyətli versiya

İsmayıl İslamoğlu Kanal-13 internet telekanalında xəbər proqramı aparır. Oktyabrın 26-da onun yaxınları Facebook-da İsmayılın yoxa çıxdığı haqda məlumat yayıblar: evə getmək üçün işdən çıxıb, amma gedib çatmayıb. Yaxınları polisə ərizə ilə müraciət ediblər, üç sutka ərzində yoxa çıxmış jurnalist haqda heç bir məlumat olmayıb. Dördüncü gün axtarışlara vəkil Bəhruz Bayramov da qoşulub. İsmayılın saxlandığını ehtimal edən vəkil müxtəlif polis idarələrinə və məhkəmələrə sorğu göndərməyə başlayıb. Amma hər yandan bildirilib ki, onlarda məlumat yoxdur.

• Ermənistanda ömürlük məhkum azadlıqdakılara məktub yazır 

• Cənubi Qafqaz və Rusiya Stalin repressiyalarının qurbanlarını xatırlayırlar 

• Azərbaycandakı siyasi məhkumlar məhbəs həyatından danışırlar 

Amma tezliklə jurnalist üzə çıxıb və Facebook səhifəsində video-müraciət yayıb. O, bildirib ki, oktyabrın 26-da mülki geyimli iki şəxs onu saxlayıb, Bakıdakı polis idarələrindən birinə gətirib, orada üç gün tutublar.

“Məni pis sözlərlə təhqir edir və döyürdülər, başıma sellofan paket keçirir, bir neçə saat ayaqüstə saxlayırdılar. Yalnız məni yox, yaxınlarımı da təhdid edirdilər, sonra (hakimiyyətin) tənqidini dayandırmağı və mənə edilənlər haqda susmağı əmr etdilər”, – İslamoğlu deyib.

O, baş prokuror və daxili işlər nazirinə şikayət ünvanlayaraq, bu hadisənin adam oğurluğu kimi kvalifikasiya edilməsini və günahkarların cəzalandırılmasını tələb edib.

Amma Bakı şəhər Baş Polis İdarəsindən jurnalistin saxlanması ilə bağlı informasiyanı təkzib ediblər. Polislərin versiyasına görə, onlara jurnalsitin yoxa çıxması ilə bağlı ərizə daxil olub və onlar axtarışa başlayıblar. Tapanda isə profilaktik söhbət üçün baş idarəyə dəvət ediblər, sonra isə ərizənin daxil olduğu 28-ci polis şöbəsinə təhvil verilib.

Hüquq müdafiəçiləri və həmkarlarının fikri

Bir çox hüquq müdafiəçiləri İslamoğlunun sosial şəbəkədəki stauslarına görə təzyiqə məruz qaldığı ilə razılaşır.

“Görünür ki, hakimiyyət fəallara qarşı yeni təzyiq metoduna əl atıb. Onları rəsmən həbs etmirlər, amma qısa müddətə saxlayıb, qorxudurlar”, – Siyasi Məhkumların Müdafiəsi Mərkəzinin əlaqələndiricisi Oqtay Gülalıyev deyir və əlavə edir ki, bu, ilk belə hadisə deyil.

Bu yaxınlarda İslamoğlu robot Sofiyanın Azərbaycana dəvət edilməsini və prezident İlham Əliyevlə görüşünün televiziyada nümayişini lağa qoyub. Müstəqil Turan telekanalının rəhbəri, siyasi mühacir Qənimət Zahidin fikrincə, onun saxlanmasına da elə bu səbəb olub.

Artıq bir sıra azərbaycanlı jurnalist və bloger müxtəlif cinayət əməllərində ittiham olunaraq saxlanılıb, həbs edilib və mühakimə olunublar. Cəmiyyət və müxtəlif beynəlxalq hüquq müdafiə təşkilatları bunu onların peşəkar fəaliyyəti ilə əlaqələndirirlər. Onların arasında 2017-ci ildə Gürcüstanda oğurlanan Əfqan Muxtarlı da var. Muxtarlının sözlərinə görə, onu Gürcüstanın kriminal polisinin geyimində olan adamlar oğurlayıb.