Bu gün, oktyabrın 3-də Gürcüstanın Konstitusiya Məhkəməsi şifahi dinləmədə iqtidar partiyasının prezidentin impiçmenti barədə müraciətini dəyərləndirir. Media bu prosesi tarixi hadisə adlandırıb.
Prezident özü dinləmələrdə iştirak etməyəcək.
Məhkəmə iclasının başlamasına bir neçə saat qalmış prezident Salome Zurabişvili yazıb ki, onu prezident aparatının əməkdaşları Tamar Çuqoşvili və Maya Kopaleişvili təmsil edəcək.
“Qoy nə olacaqsa olsun, amma hər şey yaxşı olacaq”, – prezident Zurabişvili “TV Pirveli”yə deyib.
İşin əsas müzakirəsi bu gün saat 12:00-da başlayıb. Bundan əvvəl, Gürcüstan Konstitusiya Məhkəməsinin sədri Merab Turava “Formula” telekanalına müsahibəsində dinləmənin bir gündən çox davam edə biləcəyini bildirmişdi.
2023-cü il sentyabrın 1-də hakim “Gürcü arzusu” partiyasının prezidentə qarşı impiçment proseduruna başladığı məlum olub. Bildirilib ki, prezident hökumətin razılığı olmadan bir neçə dəfə xarici ölkələrə səfər edərkən konstitusiyanı kobud şəkildə pozub.
Xüsusilə, söhbət üç işgüzar görüşdən gedir: avqustun 31-də Almaniya Federativ Respublikasının prezidenti ilə, sentyabrın 1-də Avropa Şurasının sədri ilə və sentyabrın 6-da Fransa prezidenti ilə.
Zurabişvili bildirib ki, o, öz vəsaiti hesabına xarici səfərlər edir və Gürcüstana Aİ üzvlüyünə namizəd statusunun verilməsi üçün xaricdə lobbiçilik edir.
Konstitusiya Məhkəməsinin sədri Merab Turava jurnalistlərə deyib ki, “Gürcüstan prezidentinin Konstitusiya Məhkəməsinin iclasında iştirakı gözlənilən idi”.
“Onun əvəzinə nümayəndələrin iştirakı mükəmməl qərarın qəbuluna mane ola bilər. Prezidentin nümayəndələri onun səfərləri ilə bağlı ətraflı məlumat verə bilməyəcək və yalnız hüquqi suallara cavab verəcəklər”, – Turava bildirib.
Bundan əlavə, Turava jurnalistlərə bildirib ki, Konstitusiya Məhkəməsi bugünkü işin nəticəsindən qane olmasa, prezident sabah, oktyabrın 4-də keçiriləcək iclasa şəxsən dəvət olunacaq.
Konstitusiya Məhkəməsi hakim partiyanın bəyanatı ilə razılaşarsa, impiçment məsələsi parlamentdə səsverməyə çıxarılacaq. Təsdiq üçün 100 səs lazımdır və hakim partiya uğur qazanmaq üçün müxalifət deputatlarını öz tərəfinə çəkə bilməlidir.
“Gürcü arzusu”nun bəzi müxalifət nümayəndələrini öz sıralarına cəlb edərək impiçment üçün lazım olan 100 səsi toplaya biləcəyi müxalifət daxilində istisna edilmir.
