Gürcüstanda təhsil. Son rəqəmlər nə deyir?

Gürcüstanın Milli Statistika Xidməti ali və peşə təhsili sahələrinin əsas göstəricilərini əks etdirən 2018-ci il üzrə hesabatını təqdim edib.

JAMnews hesabatdan maraqlı məqamları seçib:

Ali təhsil müəssisələrinin sayı

Gürcüstanda ümumilikdə 63 ali təhsil müəssisəsi var, onlardan 19-u dövlət, 44-ü isə özəldir. Bütün təhsil müəssisələrinin 62 faizi Tbilisidə yerləşir.

Tələbələrin sayı

2018-2019-cu tədris ilində Gürcüstanın ali təhsil müəssisələrinə 41 600 nəfər tələbə qəbul olub.

Onlardan 27800 nəfəri dövlət, 13800 nəfəri isə özəl universitetlərə qəbul olub.

•Gənc gürcünün portreti

•Gürcüstanda ən az əməkhaqqı təhsil sahəsindədir

•Gürcüstanda hər beş ailədən biri borc götürdüyü pulla nahar hazırlayır

Ümumilikdə isə Gürcüstanda bu il 147 min 700 nəfər tələbə qeydiyyatdan keçib (ötən illə müqayisədə 2,7 faiz çox). Bu o deməkdir ki, Gürcüstanın təxminən 4 faizi tələbədir.

Tələbələrin 65 faizi dövlət ali təhsil müəssisələrində, 35 faizi isə özəl ali təhsil müəssisələrində təhsil alır.

Gürcüstan tələbələrinin 50,2 faizi qadın, 49,8 faizi kişidir.

Ali məktəb məzunları sırasında da qadınlar daha çoxdur. 2018-ci ilin göstəricilərinə görə, Gürcüstanın ali məktəblərini ümumilikdə 24300 nəfər bitirib, onlardan 57,4 faizi qadınlar, 42,6 faizi isə kişilərdir.

Yaş

Gürcüstanda birinci kurs tələbələri əsasən 19 yaşındadır.

Xaricdə təhsil alanlar

2018-ci ildə müxtəlif tədris proqramları ilə Gürcüstandan 673 tələbə digər ölkələrə yola düşüb (2017-ci illə müqayisədə 91 tələbə çox).

Dövlət ali məktəbləri özəllərə nisbətən xaricə 2 dəfə daha artıq tələbə göndərib.

Gürcüstandakı əcnəbi tələbələr

2018-19-cu tədris ilində Gürcüstanda 12200 əcnəbi tələbə təhsil alıb, əvvəlki illə müqayisədə 21,4 faiz çox.

Müəllimlərin sayı

Gürcüstanın ali məktəblərində 9400 professor və müəllim çalışır, 2017-ci illə müqayisədə 15 faiz çox. Burada da qadınlar çoxluq təşkil edir – 53,8 faiz, kişilərin sayı 46,2 faizdir.

1106 nəfər doktorantdan 60,8 faizi qadın, 39,2 faizi kişilərdir.

Peşə təhsili

2018-ci ildə Gürcüstanda 118 peşə məktəbi qeydə alınıb, onlardan 39-u dövlət, 79-u isə özəldir. Bu, 2017-ci illə müqayisədə daha azdır. Həmin il peşə məktəblərinin sayı 125 idi.

2018-ci ildə peşə məktəblərində 11800 tələbə qeydiyyata düşüb. Ali məktəblərdən fərqli olaraq bu seqmentdə qadınlara nisbətən kişilər çoxluq təşkil edir – 52 faiz 48 faizə qarşı.

Tələbələrin əksəriyyəti ixtisas olaraq mühəndis proqramlarını (31,6 faiz), səhiyyə proqramlarını (15,8 faiz), biznesin idarə olunması (15 faiz), aqrar elmlərlə bağlı proqramları (14,5 faiz) seçirlər.

_______

• Statistika Xidmətinin məlumatına görə, Gürcüstanda işsizlik səviyyəsi 12,7 faiz təşkil edir ki, bu da regionda ən yüksək göstəricidir. İşsizlər arasında kişilər qadınlardan daha çoxdur.