Gürcüstan Maliyyə Nazirliyinin İstintaq Xidməti bildirir ki, oktyabrın 24-də məhkəmə qərarı əsasında saxta “çağrı mərkəzləri” ilə əlaqəli olduğu ehtimal edilən bir neçə obyektdə axtarışlar aparıb.
Lakin məlum olub ki, axtarış aparılan obyektlər arasında Amerikanın “Atlantic Council” araşdırmalar mərkəzinin əməkdaşlarının mənzilləri də olub və onlar bunu təzyiq cəhdi kimi qiymətləndiriblər.
“Alınan məlumatlara görə, çağrı mərkəzlərinin fəaliyyəti apardığımız bu istintaqda əks olunan cinayət növü ilə bağlıdır, söhbət daha geniş miqyasda maliyyədən gedir. Bundan başqa, həmin obyektlərdə çalışan şəxslərin bəziləri əvvəlki dövrlərdə müəyyən edilmiş analoji kriminal çağırış mərkəzləri ilə əlaqəlidirlər”, – istintaq xidmətinin məlumatında deyilir.
Bildirilir ki, axtarışlar nəticəsində “təsbit edilmiş qaydada götürülmüş müəyyən məlumatları əks etdirən” müxtəlif avadanlıq, qurğu və sənədlər aşkar edilib.
İstintaq Xidmətindən araşdırmanın gedişi və nəticələri barədə vaxtaşırı ictimaiyyətə məlumat veriləcəyini bildirilib.
Tezliklə bəlli olub ki, axtarışlar Amerikanın “Concentrix” konsaltinq şirkətinin ofisində, həmçinin Amerikanın “Atlantic Council” araşdırmalar mərkəzinin əməkdaşları Sofo Gelava və Eto Buziaşvilinin mənzillərində aparılıb.
Sofo Gelava jurnalistlərə bildirib ki, müstəntiqlər onun şəxsi kompüterini, şəxsi telefonunu, həmçinin ərinin və azyaşlı oğlunun noutbuklarını götürüblər.
Gelava axtarışın Rusiyanın Gürcüstandakı dezinformasiya və təsir əməliyyatları ilə bağlı apardığı araşdırma ilə əlaqəli olduğu fikrindədir.
Vəkil Şota Tutberidze isə diqqəti ona yönəldir ki, axtarış qərarında qanunun tələb etdiyi kimi istintaqın məhz nə axtardığı göstərilməyib.
