Gürcüstanda fövqəladə vəziyyət mayın 23-ə, avtomobillərin hərəkətinə qadağa isə aprelin 27-ə qədər uzadılıb

Pandemiyanın qarşısını almaq məqsədilə Gürcüstanda fövqəladə vəziyyət mayın 22-ə qədər  uzadılacaq.

Müvafiq fərmanı hökumətə təqdim etmək üçün Gürcüstan prezidenti Salome Zurabişvili imzalayıb.  Fərman baş nazir imzalayandan və parlament təsdiqləyəndən sonra qüvvəyə minəcək.

Həmçinin minik maşınlarından istifadəyə qoyulan məhdudiyyətin də müddəti aprelin 27-ə qədər uzadılıb.

Gürcüstanda aprelin 21-ə qədər 408 koronavirusa yoluxma halı qeydə alınıb. 4779 nəfər karantində, 561 nəfər isə stasionarda nəzarət altındadır. 95 nəfər sağalıb. Dörd nəfər ölüb.

Aprelin 24-də hökumət fövqəladə vəziyyət çərçivəsində tətbiq olunan məhdudiyyətlərin mərhələli ləğvi planını təqdim edəcəyinə söz verib.

“Yoluxma klasteri genişlənir və yoluxma mənbəyini müəyyən etmək getdikcə çətinləşir. Növbəti iki-üç həftədə biz ən mürəkkəb pik dövrünə daxil olacağıq”, – Gürcüstanın baş nazirinin mətbuat katibi İrakli Çikovani deyib.

Parlament müxalifəti fövqəladə vəziyyətin uzadılmasını dəstəkləmir

Müxalif “Milli hərəkat” fraksiyasının sədri Roman Qosiridze bəyan edib ki, əgər hakimiyyət iqtisadiyyatın xilası planını təqdim etməsə, onun fraksiyası fövqəladə vəziyyət rejiminin uzadılmasını dəstəkləməyəcək.

“İşsiz və vəsaitsiz qalan insanlar əmin olmalıdırlar ki, onların işığı, suyu kəsilməyəcək. Proqram lazımdır”, – Qosiridze bildirib.

Onun sözlərinə görə, partiyası səhiyyə sahəsində bütün tədbirləri dəstəkləyəcək, absurd məhdudiyyətləri isə yox.

• İki həftə təcrid şəraitində ən ağır olan nədir? Gürcüstandan hekayələr
• Patriarx: həyat da, ölüm də Tanrının əlindədir

Parlamentin müdafiə və təhlükəsizlik məsələləri üzrə komitəsinin sədri İrakli Sesiaşvili bəyan edib ki, aprelin 22-də iclas zamanı parlament çoxluğu yekdilliklə fövqəladə vəziyyət rejiminin uzadılması təklifini dəstəkləyəcək.

Pandemiyanın qarşısını almaq üçün Gürcüstanda martın 21-dən fövqəladə vəziyyət elan olunub, martın 31-dən isə 21:00-dan 6:00-a qədər komendant saatı tətbiq edilib.