Gürcüstan və Türkiyə arasında ilk növbədə aqrar sahədə olmaqla ticarət sadələşdiriləcək
Gürcüstan və Türkiyə arasında ticarətin liberallaşdırılması
Gürcüstan və Türkiyə kəndtəsərrüfatı məhsulları və xidmət sahəsində tariflərin qarşılıqlı liberallaşdırılması niyyətini açıqlayıblar. İki ölkə arasında 2007-ci ildə imzalanan və bəzi malların idxal/ixrac rüsumundan azad edilməsini nəzərdə tutan “Azad ticarət haqda Sazişə” bu iki əsas dəyişikliyin əlavə olunması planlaşdırılıb.
Razılaşma Ankarada Gürcüstan-Türkiyə arasında azad ticarət sazişi çərçivəsində yaradılan komitənin 12-ci iclasında əldə edilib.
Ankara görüşündə Gürcüstan nümayəndə heyətinə rəhbərlik edən iqtisadiyyat nazirinin müavini Gennadi Arveladze deyib ki, bu dəyişikliklər olandan sonra Gürcüstanın kəndtəsərrüfatı məhsullarının Türkiyəyə ixracının artacağı gözlənilir. Türkiyə məhsullarının idxalının yüksəlməsi və bunun yerli bazara təsiri perspektivlərini nazir müavini şərh etməyib.
Komitənin növbəti iclasının 2021-ci ilin sonunda Tbilisidə keçirilməsi planlaşdırılıb. O vaxta qədər ekspertlər səviyyəsində onlayn rejimdə məsləhətləşmələr davam edəcək.
2020-ci il yanvar-may aylarında Gürcüstan və Türkiyə arasında mal dövriyyəsi 561,507 milyon dollar təşkil edib. 2021-ci ilin beş ayı ərzində bu göstərici 35 faiz artaraq 758 053 milyon dollara çatıb.
Mal dövriyyəsilə birlikdə idxal və ixrac da artıb.
Gürcüstana Türkiyədən idxal
2021-ci ildə Gürcüstan Türkiyədən 624,743 milyon dollarlıq mal alıb ki, bu da 2020-ci ilin analoji dövrü ilə müqayisədə 30,2 faiz çoxdur.
Gürcüstanın Türkiyədən idxal siyahısında ilk yerlərdə dayananlar:
- On və daha artıq sayda insanın daşınması üçün nəzərdə tutulan avtomobillər;
- Hazır məhsul;
- Dərmanlar;
- Borular;
- Qara metallardan metal konstruksiyalar.
Gürcüstandan Türkiyəyə ixrac
2021-ci ilin yanvar-may aylarında Gürcüstan Türkiyədə 133 290 milyon dollarlıq məhsul satıb ki, bu da 2020-ci ilin analoji dövrü ilə müqayisədə 63 faiz çoxdur.
Gürcüstandan Türkiyəyə ixrac siyahısında ilk yerlərdə olanlar:
- Köynək, trikotaj, maşın və ya əl toxuması geyim;
- Kostyum və geyim dəsti;
- Ferro ərintilər;
- Külçə, o cümlədən də qara metalların;
- Karbonatlı poladdan yarımfabrikatlar.
