Gürcüstan prezidenti: “Seçkilər qeyri-legitimdir, bu, Rusiyanın xüsusi əməliyyatı idi”
Gürcüstan prezidenti seçkilərin nəticələrini tanımır
Gürcüstan prezidenti Salome Zurabişvili oktyabrın 27-də axşam ölkə üçün kritik əhəmiyyət kəsb edən parlament seçkilərinin bitməsindən bir gün sonra brifinq keçirərək “seçkilərin tamamilə saxtalaşdırıldığını” bəyan edib.
Prezident seçki nəticələrini tanımadığını bildirib və hər kəsi oktyabrın 28-də saat 19.00-da parlament binası qarşısına simvolik etiraz aksiyasına – yeni seçilmiş parlamentin qeyri-legitimliyini bütün dünyaya çatdırmaq üçün toplaşmağa çağırıb.
Oktyabrın 26-da keçirilən parlament seçkiləri Gürcüstan üçün misilsiz əhəmiyyət daşıyır. Seçki nəticəsi ölkənin gələcək siyasi və geosiyasi kursunu müəyyən edir. Əhali rusiyayönlü hesab edilən hakim “Gürcü arzusu” partiyası ilə qərbyönlü müxalifət arasında seçim etməli idi.
MSK-nın məlumatına görə, “Gürcü arzusu” 53,056% səs toplayaraq seçkilərdə qalib gəlib. Müxalifətdən daha dörd siyasi qurum parlamentə daxil olub: “Dəyişiklik üçün Koalisiya” – 11,17%, “Birlik – Milli Hərəkat” – 9,85%, “Güclü Gürcüstan” – 8,99%, keçmiş baş nazir Giorgi Qaxariyanın “Gürcüstan naminə” partiyası – 8,22%.
MSK-nın məlumatları seçkilərin nəticələrindən sonra “Gürcü arzusu”na cəmi 40-42 faiz səs verən “exit-poll”un nəticələrindən çox fərqlənir.
Parlamentə daxil olan bütün müxalifət nümayəndələri seçki prosesində saxtakarlıqlar olduğunu bəyan edərək, mandat qəbul etməyəcəklərini və permanent küçə aksiyalarına hazırlaşdıqlarını bəyan ediblər.
Zurabişvili bəyan edib ki, seçkilər Rusiya metodlarına uyğun yeni texnologiyalardan istifadə edilməklə saxtalaşdırılıb.
Prezident bu bəyanatından əvvəl yeni parlamentə daxil olan dörd müxalif qüvvə ilə məsləhətləşmələr aparıb. Onların liderləri Salome Zurabişvilinin prezident administrasiyasının yerləşdiyi Tbilisidəki Orbeliani sarayında keçirdiyi brifinq zamanı onun arxasında dayanıblar. Bu, bir növ birlik nümayişi olub.
Brifinqdə iştirak etməyən yeganə şəxs parlamentə daxil olan “Gürcüstan naminə” partiyasının lideri Giorgi Qaxariya olub. Lakin bildirilib ki, onun partiyası da Zurabişvilinin bəyanatının ruhunu bölüşür və ona qoşulur.
“Bu seçkiləri tanımaq Gürcüstanın Rusiyaya tabe olmasını tanımaqla eynidir”
“Bu, müasir texnologiyalardan istifadə etməklə tam saxtalaşdırma, səslərin ələ keçirilməsi idi”, – Salome Zurabişvili deyib.
“Biz çox qeyri-adi bir şeyin şahidi olduq. Səlahiyyətlilər saxtakarlığı təmizə çıxarmaq üçün texnologiyadan istifadə etdilər. Bu, əvvəllər heç vaxt olmamışdı. Biz, əslində, xalqımıza qarşı aparılan Rusiya xüsusi əməliyyatının yeni formasının, hibrid müharibəsinin şahidi və qurbanlarıyıq.
Bu seçkiləri tanımaq Gürcüstanın Rusiyaya tabe olmasını tanımaqla eynidir. Bu, Rusiya tərəfindən işğalın yeni formasıdır. Biz bunu qəbul etməyəcəyik, heç kim Gürcüstanın Avropa gələcəyini əlindən ala bilməz”, – deyə Zurabişvili bildirib.
Prezident onu da qeyd edib ki, o, “ölkədə qalan yeganə müstəqil institutdur”.
Beynəlxalq ictimaiyyətə müraciət: “Bizi dəstəkləyin, bu seçkiləri tanımayın”
Prezidentin çıxışının mühüm hissəsi onun beynəlxalq tərəfdaşlara müraciəti olub. O, Qərbi “Gürcüstan xalqını dəstəkləməyə və seçkilərin nəticələrini tanımamağa çağırıb, çünki seçki baş tutmayıb, nəticələr qeyri-legitimdir və heç bir şey bu seçkiləri legitim edə bilməz”.
“Xaricdə hər kəs bilməlidir ki, Gürcüstanın gələcəyini qorumaq, bu regionda geosiyasi tarazlığı qorumaq Gürcüstan xalqını qorumaqdır, qeyri-legitim “Gürcü arzusu” hökuməti ilə əlaqələr qurmaq deyil”.
