Gürcüstan Avropa İttifaqının beş ölkəsi ilə sərhədləri açır. Amma oradan reys yoxdur

Koronavirus pandemiyasına görə təxminən beş ay əvvəl sərhədlərini bağlayan Gürcüstan Avropa İttifaqının beş ölkəsi üçün sərhədləri açır.

Bu ölkələr Almaniya, Fransa, Latviya, Litva və Estoniyadır. Bu beş ölkənin vətəndaşları Gürcüstana yalnız təyyarə ilə gələ bilər, amma mütəmadi reyslər hələ də bərpa olunmayıb.

Ölkə sərhədləri hələ də qapalı qalır. Gürcüstan sərhədini keçərkən bu ölkələrin vətəndaşları xüsusi elektron forma doldurmalı və öz əlaqə məlumatlarını, son 14 gün ərzində səfər tarixçəsini, o cümlədən də Gürcüstana gəldikləri zaman harada olacaqlarını qeyd etməlidirlər.

• Şərh: Gürcüstanda loukosterlərin əks-inqilabı
• Maska, baryer, bahalaşma. Koronavirusdan sonra Gürcüstanda turizm necə olacaq?

Onlar sərhəddə termoskrininqdən keçəcək. Temperaturu 37 dərəcədən yüksək olanlar aeroportdaca ona PCR koronavirus testi ediləcək.

Bu beş ölkənin vətəndaşları məcburi karantinə yerləşdirilməyəcək. Amma əgər onlar bura gələnə qədər Aİ-ə daxil olmayan və ya yüksək yoluxma riskli ölkələrdə səfərdə olublarsa, ikigünlük karantin onlar üçün məcburi olacaq. Xüsusi yaradılmış çağırı mərkəzi Gürcüstana gələn hər kəslə fəal əlaqə saxlayacaq.

Niyə məhz bu beş ölkə?

Çünki məhz bu ölkələr eyni şərtlərlə – yəni karantin keçmədən Gürcüstanın üzünə öz sərhədlərini açıblar.

Hazırkı mərhələdə Aİ-nin Gürcüstanla sərhədləri açmayan ölkələri bunlardır: Avstriya, Belçika, Bolqarıstan, Danimarka, Norveç, Malta, Finlandiya, İsveçrə, Çexiya, Slovakiya və Macarıstan.

İtaliya, Kipr, İslandiya və Sloveniya Gürcüstanla sərhədlərini açmağa hazır olduqlarını bildiriblər, amma ölkəyə gələn Gürcüstan vətəndaşları 14 günlük məcburi karantindən keçməli olacaqlar.

Gürcüstan üzünə sərhədlərini açmayan Avropa İttifaqı ölkələrinin vətəndaşları üçün qarşılıqlı şəkildə öz sərhədlərini açmır. Gürcüstanı yaşıl siyahıya salan, amma məhdudiyyətlər tətbiq edən ölkələrin vətəndaşları üçün isə  eyni cür məhdudiyyətlər qüvvədə olacaq – ölkəyə daxil olduqları zaman onlar 14 günlük məcburi karantindən keçməli olacaq və bunun xərcini də özləri ödəyəcəklər.

Bu qaydalar xaricdə olan Gürcüstan vətəndaşlarına da şamil edilirmi?

Gürcüstan vətəndaşları Aİ ölkələrindən vətənə qayıtdıqdan sonra 14 günlük məcburi karantin keçəcəklər. Karantin həmçinin Almaniya, Fransa, Latviya, Litva və Estoniyadan gələnlərə şamil ediləcək.

Əcnəbi vətəndaşlardan fərqli olaraq, dövlət vətənə qayıdan Gürcüstan vətəndaşlarının karantin xərclərini öz üzərinə götürəcək.

Gürcüstana necə uçmaq olar?

Gürcüstana hazırda mütəmadi beynəlxalq reyslər yoxdur və çətin ki, avqusta qədər bərpa olunsun.

Təyyarələr Gürcüstanın qeyd-şərtsiz sərhədlərini açdığı Aİ-nin beş ölkəsinə də uçmur. Hazırda bir neçə aviaşirkətlə – Lufthansa, AirBaltic və AirFrance – bu beş ölkəyə mütəmadi reyslərin bərpa olunması ilə bağlı danışıqlar aparılır.

Lufthansa ilə artıq razılıq əldə edilib – avqustdan bu aviaşirkət həftədə iki dəfə Tbilisi-Münhen reysi həyata keçirəcək. Minlərlə Gürcüstan vətəndaşı mütəmadi reyslər olmadığı üçün hələ də ölkəyə qayıda bilmir.

Wizzair və Myway Airlines iyulda Polşadan, İspaniyadan, İtaliyadan, Yunanıstandan və Fransadan uçuşlar həyata keçirləcək. Bu reyslərə biletlərin qiyməti Gürcüstan vətəndaşları üçün 200 avrodan baha olmayacaq. Digər xərclər dövlət tərəfindən qarşılanacaq.

Bundan başqa, Gürcüstanın Airzena Georgian Airways aviaşirkəti Vyana, Amsterdam və Tel-Avivdən kommersiya yönlü çarter reysləri həyata keçirir. Amma xaricdə yaşayan vətəndaşlar Gürcüstanın bu şirkətindən çox şikayət edir.

Facebook bu reyslərə biletlərin elan olunmuş 200 avrodan çox baha olduğu və bu biletləri praktiki olaraq almaq mümkün olmadığı ilə bağlı narazı şərhlərlə doludur. İndiyə qədər Gürcüstana bütün reysləri ancaq Airzena Georgian Airways şirkəti həyata keçirirdi.

Amma çoxsaylı şikayətlərdən sonra hakimiyyət xarici şirkətlərlə danışıqlara başlayıb və nəticədə Wizzair və Myway Airlines şirkətləri də çarter reysləri həyata keçirəcəklər. Həmçinin Qatar Airways də iyulda bir reys reallaşdıracaq və bunun da sayəsində 105 nəfər Dohadan Gürcüstana qayıda biləcək. Gürcüstanın hökumət administrasiyasının məlumatına əsasən, koronavirusla bağlı vəziyyət mütəmadi olaraq dəyişir və digər Aİ ölkələri ilə əlaqələrin bərpa olunması ətrafında danışıqlar aparılır, buna görə də, ölkəyə giriş qaydaları hər iki gündən bir yenidən nəzərdən keçiriləcək.