Azərbaycanlı müxalifətçi ay yarım ərzində ikinci dəfə həbs olunub

JAMnews

Bakı

Azərbaycan Xalq Cəbhəsi Partiyası (AXCP) sədrinin köməkçisi Faiq Əmirli ictimai qaydanı pozmaqda ittiham olunaraq 15 sutka inzibati həbs cəzasına məhkum edilib – “Kavkazskiy uzel” xəbər verib.

Əmirli son ay yarımda artıq ikinci dəfədir ki, həbs olunur – aprelin 8-də o, karantin rejimini pozduğu üçün 30 sutka inzibati həbs cəzasına məhkum edilmişdi. Bundan başqa, may ayı ərzində müxtəlif inzibati və cinayət ittihamı ilə AXCP-nin daha bir neçə üzvü həbs olunub. Partiya sədrinin müavini Gözəl Bayramlı hesab edir ki, hakimiyyət “AXCP-ə qarşı misilsiz repressiya kampaniyası aparır”.

Faiq Əmirli keçmiş siyasi məhbusdur. 2016-cı ildə o, dini ayrıseçkilik yaymaqda günahlandırılaraq 3 il 3 ay müddətinə azadlıqdan məhrum edilmişdi, bir ildən sonra isə şərti azadlığa buraxılmışdı. O zamandan bəri Əmirli müxtəlif inzibati ittihamlarla iki dəfə həbs edilib.

Mayın 24-də Ramazan Bayramı ilə əlaqədar olaraq Əmirli ailəsi ilə birlikdə Sabirabada, valideynlərinin məzarını ziyarət etməyə gedib. Yerli polis onu evdən şöbəyə dəvət edib, elə həmin gün məhkəməyə çıxarılaraq haqqında 15 sutka inzibati həbs cəzası qərarı verilib. Ona qarşı ictimai qaydaları pozmaqla bağlı ittiham irəli sürülsə də, məhz hansı ictimai qaydanı pozması aydınlaşdırılmayıb.

“Görünür ki, bizim fəalları ikinci dəfə həbs eləməyə başlayıblar. Martın sonundan inzibati qaydada 17 partiya üzvü həbs edilib, üç nəfər cinayət məsuliyyətinə cəlb olunub, bir nəfər isə psixiatrik xəstəxanaya qapadılıb. AXCP sədri faktiki olaraq ev dustaqlığındadır, aprelin 13-dən onun stasionar və mobil interneti kəsilib”, – Gözəl Bayramlı deyib.

Daxili İşlər Nazirliyindən hələ ki, Əmirlinin həbsini şərh etməyiblər. Daha əvvəl isə DİN müxalifətçilərin siyasi motivlərlə təqib edildiyini inkar etmişdi.