“Ermənistanın yenidən silahlanması bütün region üçün təhlükədir”. Bakıdan şərh
Bakı və Yerevandan bəyanatlar
Azərbaycan Prezidentinin köməkçisi Hikmət Hacıyev rəsmi Bakının Ermənistanın davam edən silahlanmasından narahatlığını ifadə edib. Ermənistanın baş naziri Nikol Paşinyan isə bildirib ki, onun ölkəsi də digər dövlətlər kimi xaricdən silah almaq hüququna malikdir.
“İşğalçının yenidən silahlanması bütün region üçün təhlükə yaradır”. Bunu hər iki tərəfin bəyanatlarını JAMnews-a şərh edən azərbaycanlı siyasi şərhçi Hacı Namazov deyib. Ekspert Azərbaycan və Ermənistan münasibətlərində digər aktual mövzulara da toxunub.
- Milli Məclisdə çoxluq yenə də YAP nümayəndələrindən formalaşıb
- “Uzaq boz ada” – Pirallahıdan reportaj
- “TIR” sürücüləri xaricə yük daşımaq üçün icazə ala bilmədiklərini deyirlər
Ermənistanın silahlanması haqda
“Azərbaycan Ermənistanı işğalçı ölkə hesab edir və belə bir bəyanat üçün kifayət qədər faktlar var.
Qonşu ölkə 30 ilə yaxın Qarabağın böyük hissəsini və Azərbaycanın bir sıra digər rayonlarını işğal altında saxlayıb. Çox uzun müddət ermənilər manipulyasiya edirdilər ki, guya Qarabağda ancaq “müdafiə ordusu” adlandırdıqları silahlılar var və onların Ermənistanla heç bir əlaqəsi yoxdur.
Amma bu yaxınlarda Qarabağda ləğv edilmiş separatçı rejimin keçmiş rəhbərləri etiraf etdilər ki, həmin “müdafiə ordusu” həmişə Ermənistan Müdafiə Nazirliyinə tabe olub. Yəni Ermənistan Silahlı Qüvvələrinin tərkibində olub.
Azərbaycan ərazilərinin Ermənistan tərəfindən işğalının daha bir bariz nümunəsi 2020-ci il noyabrın 10-da üçtərəfli bəyanatın imzalanmasından sonra erməni silahlı qüvvələrinin bircə atəş belə açılmadan üç rayondan çıxarılması faktıdır. Bu sənədi isə Ermənistanın baş naziri şəxsən imzalayıb.
Belə faktlar çoxdur və kimin işğalçı olduğu heç müzakirə mövzusu belə deyil. İşğalçının təkrar silahlanması isə bütün region üçün təhlükə yaradır”.
Ləğv edilmiş “DQR”in keçmiş rəhbərlərinin son bəyanatları haqda
“Biz Qarabağdakı separatçı rejimin keçmiş başçılarının Azərbaycan ərazisində qeyri-qanuni qurumun elan olunduğu günlə bağlı revanşist bəyanatlarının şahidi olduq.
Şübhəsiz ki, bu bəyanatlar yerli auditoriyaya hesablanıb, belə çıxışlar beynəlxalq arenada heç kimə maraqlı deyil. Amma Ermənistanın işğalından əziyyət çəkən Azərbaycan üçün bu cür bəyanatlar anlaşılan suallar yaradır.
Aydındır ki, Şahramanyan fikirlərinə önəm verilən, müsahibələr alınan, virtual olsa da “vəzifəsi” olan mühüm şəxs olaraq qalmaq istəyir.
Onun açıqlamalarının mahiyyətinə gəlincə, bəli, Qarabağ erməniləri doğulub boya-başa çatdıqları yerlərə qayıda bilərlər. Bu insanlar, sadəcə, xüsusi sayt vasitəsilə Azərbaycanın rəsmi orqanlarına müraciət etməlidirlər və bu sayt onlar hələ Qarabağda olanda artıq işləyirdi. Heç kim onları qovmayıb, qanun çərçivəsində evlərində qalmağa təşviq ediliblər. Onlar isdə hazırkı nəticəni seçdilər.
Yeri gəlmişkən, hətta Paşinyan son çıxışında Qarabağ ermənilərinin Azərbaycanı tərk etmələrini Ermənistanda iddia etdikləri kimi “məcburi köçürmə” adlandırmadı. Hər şeyin öz adı var, hər şey bu yaxınlarda bütün dünyanın gözü qarşısında baş verib. Heç kim heç kimi nəyəsə məcbur etməyib. Tam əksinə, rəsmi Bakı Qarabağ ermənilərini evlərini tərk etməməyə çağırıb.
Ermənilər bütün bunları yaxşı bilirlər, başqa variant da yoxdur. Revanşizmi unutmaq lazım olacaq”.
“Zəngəzur dəhlizi” haqda
“Ermənistanda deyirlər ki, üçtərəfli bəyanat guya qüvvəsini itirib, onun bəndlərinin heç biri artıq etibarlı deyil. Bu, yumşaq desək, faktların təhrifidir.
Bəyanatı imzaladıqdan sonra Azərbaycan özünə aid olan bütün bəndləri yerinə yetirib. Laçın yolu işləyirdi, silahlı qüvvələr öz mövqelərində qalmışdılar. Təbii ki, Azərbaycan ərazisinin bir hissəsini Ermənistanla birləşdirən yoldakı hərəkəti videomüşahidə vasitəsilə nəzarətdə saxlayırdı. Sonra isə məntiqə və razılaşma şərtlərinə tamamilə zidd olan vəziyyət ortaya çıxdı.
Ermənistan Qarabağdakı separatçı rejimi silahlandırmaqda davam edirdi və Azərbaycana məxsus təbii sərvətlər Qarabağdan Ermənistana daşınırdı. Bakıdan dəfələrlə xəbərdarlıqlar edildi, lakin buna məhəl qoyulmadı. Bundan sonra baş verənləri hər kəsin çox yaxşı bilir.
Niyə bunları sadalayıram? 2022-ci ilin sonuna kimi, iki il ərzində Azərbaycan üçtərəfli bəyanatda nəzərdə tutulmuş öhdəlikləri ardıcıl olaraq yerinə yetirib. Ermənistan isə Rusiyanın FTX-nin Azərbaycanın əsas hissəsinin qərb rayonlarını Naxçıvan Muxtar Respublikası ilə birləşdirən yola nəzarət etməli olduğu yeganə 9-cu bəndi yerinə yetirmədi. Bu yol heç vaxt çəkilmədi, bəyanatın bu nöqtəsi uzun müddət xatırlanmadı.
İndi də onlar Ermənistan tərəfinin razılaşmaları pozmasından və bunun Azərbaycanın beynəlxalq səviyyədə tanınmış ərazisi üzərində suverenliyini tam bərpasına gətirib çıxarmasından sonra baş verənləri manipulyasiya etməyə çalışırlar”.
