Ermənistanın eks-prezidentini həbsdən azad edən hakimə qarşı cinayət işi qaldırılıb
Hakim David Qriqoryana qarşı cinayət işi qaldırılıb. Hakim kimi onun səlahiyyətləri müvəqqəti olaraq dayandırılıb.
Bir neçə ay əvvəl o, Ermənistanın eks-prezidenti Robert Koçaryanın həbsdən azad edilməsi ilə bağlı qərar qəbul etmişdi. Ermənistanın ikinci prezidenti konstitusiya quruluşunun devrilməsində ittiham olunur və Qriqoryanın qərarı ilə azad ediləndən təxminən bir ay sonra Koçaryan Apellyasiya Məhkəməsinin qərarıı ilə yenidən həbs edilib.
Prokurorluq xüsusi olaraq vurğulayıb ki, Qriqoryanın diqqət mərkəzinə gəlməsi qətiyyən Koçaryanın işi ilə bağlı deyil.
• Ermənistanın eks-prezidenti yenidən həbs edilib
Hakim nədə ittiham olunur?
Ermənistanın Ali Məhkəmə Şurası hakim David Qriqoryana qarşı cinayət işinin qaldırılması haqda qərar qəbul edib. O, vəzifə saxtakarlığı işi üzrə şübhəli şəxs qismində istintaqa cəlb olunub.
2019-cu il fevralın 8-də Serqo Panosyan adlı bir şəxs Qriqoryana qarşı şikayət ərizəsi verib. Baş Prokurorluqdan bildirilib ki, “vətəndaş cinayət işi çərçivəsində açıq vəzifə saxtakarlığı törədilməsi haqda informasiyanın yoxlanılması ilə əlaqədar ərizə ilə müraciət edib”.
Amma o zaman ilkin istintaq orqanı bu ərizə əsasında cinayət işi açmayıb. Yalnız bir neçə ay sonra, mayın 22-də məsələyə yenidən baxılıb. Nəticədə istintaqın üzə çıxardığı yeni vəziyyətə əsasən cinayət işi qaldırılıb.
Paralel olaraq Ermənistan mediasında Baş Prokurorluğun atdığı addımı hakimin Koçaryanın işini apraması ilə əlaqələndirən jurnalist məqalələri və ekspert rəyləri yer alıb.
Bundan sonra Baş Prokurorluq bəyan edib ki, Qriqoryanın diqqət mərkəzinə gəlməsi eks-prezidentin işi ilə qətiyyən əlaqədar deyil.
Hakimin otağında axtarış
Xüsusi İstintaq Xidməti iyulun 16-da hakimin otağında axtarış aparıb. Bundan sonra hakimin iş otağı möhürlənib.
Politik.am nəşri yazıb ki , hakimə və onun vəkilinə otağa girmək qadağan edilib:
“Xüsusi İstintaq Xidmətinin müstəntiqi otağın möhürlənməsini tələb edib və bunu otağın cinayət yeri olması ilə izah edib. Hansı cinayətdən söhbət getdiyi hələ aydın deyil. Məzuniyyətdən qayıdan hakim Qriqoryan baş verənlərdən təəccüblənib”.
Axtarışdan sonra hakim bildirib ki, onun iş kompüteri müsadirə olunub.
“Bu axtarışda təqib elementləri görürmü?” sualına hakim belə cavab verib:
“Mən hələlik heç nə deyə bilmirəm. Zamanı gələndə mən öz mövqeyimi bildirəcəm”.
Hakimə təzyiq?
Bəzi ekspertlər, o cümlədən də vəkillər – həm hakimi, həm də eks-prezidenti müdafiə edənlər güman edirlər ki, Qriqoryana və ümumilikdə Ermənistanın məhkəmə sisteminə təzyiq göstərilir.
Hakimin vəkili Georgi Melikyan istintaq orqanını hakimin ofisində axtarış aparılan zaman, o cümlədən də sənədlər və informasiya daşıyıcıları müsadirə edilən zaman kobud pozuntulara yol verilib.
Eks-prezidentin vəkili Hayk Alumyan da insidentdən kənarda qalmayıb. O, hakimin iş otağında aparılan axtarışı “ona qarşı təqib və primitiv təzyiq vasitəsi” kimi xarakterizə edib.
Onun sözlərinə görə, Milli Təhlükəsizlik Xidməti, Xüsusi İstintaq Xidməti və Prokurorluq eks-prezidentin işini batırıblar. Onlar Koçaryana qarşı irəli sürülən ittihamları əsaslandıra bilməyiblər. İndi bu strukturlar Koçaryanı həbsxana kamerasında saxlamaq üçün bütün mümkün mexanizmlərdən istifadə edirlər.
Dağlıq Qarabağın keçmiş ombudsmeni, Ermənistan ədliyyə nazirinin keçmiş müavini Ruben Melikyan bəyan edib ki, hakim David Qriqoryanın Robert Koçaryanın həbsdən azad edilməsi haqda qərarından sonra bu işə istənilən dövlət müdaxiləsi apriori məhkəmənin müstəqilliyinə qəsd kimi dəyərləndirilməlidir.
“Bu, məhkəmənin müstəqilliyinin istintaq sirrindən daha yüksək olduğu haldır”, – Ruben Melikyan Facebook səhifəsində yazıb .
Qriqoryanın işini niyə Koçaryanın işi ilə əlaqələndirirlər?
Mayın 18-də Qriqoryan konstitusiya quruluşunun devrilməsində ittiham olunan respublikanın keçmiş prezidenti Robert Koçaryanı Dağlıq Qarabağın keçmiş və indiki prezidentləri Arkadi Qukasyan və Bako Saakyanın zaminliyi əsasında həbsdən azad edib.
Bundan başqa, Qriqoryan Koçaryanın ittiham olunduğu konstitusiya quruluşunun devrilməsi ittihamının Konstitusiyaya zidd olub-olmadığını aydınlaşdırmaq üçün işi Konstitusiya Məhkəməsinə göndərib. O, Konstitusiya Məhkəməsi qarşısında Ermənistanın eks-prezidentlərinin ölkənin ali qanununa əsasən malik olduqları toxunulmazlıq institutu məsələsini qaldırıb.
Koçaryan işinin bütün təfərrüatları
2018-ci ilin iyulunda Robert Koçaryana qarşı 2008-ci il 1 mart işi üzrə konstitusiya quruluşunun devrilməsi ilə bağlı ittiham irəli sürülüb.
Söhbət 19 fevral 2008-ci il prezident seçkilərindən sonra baş verən hadisələrdən gedir. O zaman müxalifət namizədlərdən biri olan birinci prezident Levon Ter-Petrosyanın liderliyi altında etiraz aksiyalarına başlayıb. Müxalifətçilər Ter-Petrosyanın qələbəsində əmin idilər və seçki nəticələrinə yenidən baxılmasını tələb edirdilər. Mərkəzi Seçki Komissiyası isə səsvermə nəticələrinə əsasən Serj Sarqsyanı qalib elan etmişdi.
Nümayiş dağıdıldığı zaman silah tətbiq edilib, insanlar həlak olub. O zaman ölkə prezidenti hələ də Robert Koçaryan idi. MSK-nın məlumatına görə yeni seçilən Serj Sarqsyan hələ vəzifə başına keçməmişdi. Buna görə də indi Koçaryan nümayişin sərt dağıdılmasında və konstitusiya quruluşunun devrilməsində ittiham olunur.
“1 mart” işi üzrə istintaq 2018-ci il “məxməri” inqilabdan əvvəl ölü nöqtədən tərpənməmişdi. İnqilab lideri Nikol Paşinyanın rəhbərliyi altında yeni hökumət dərhal işə yenidən baxılmasına nail olub.
2018-ci il iyulun 28-də eks-prezident bu iş üzrə ilk dəfə həbs edilib. Amma iki həftədən sonra o, azad olunub. Apellyasiya Məhkəməsi birinci instansiya məhkəməsinin Koçaryanın həbsi ilə bağlı daha əvvəl qəbul etdiyi qərarı qanunsuz elan edib. Robert Koçaryanın eks-prezident kimi Konstitusiyada nəzərdə tutulmuş toxunulmazlıq hüququ buna əsas olub.
2018-ci ilin avqustunda Koçaryan azad ediləndən sonra Kassasiya Məhkəməsi noyabrın 15-də işi yenidən araşdırma aparılması üçün Apellyasiya Məhkəməsinə göndərib. 2018-ci il dekabrın 7-də Apellyasiya Məhkəməsi eks-prezidentin təkrar həbsi haqda qərar qəbul edib. Həmin gündən Ermənistanın ikinci prezidenti 2019-cu il mayın 18-ə qədər həbsxanada saxlanılıb. David Qriqoryan onun həbsdən azad edilməsi haqda qərar qəbul etdiyi həmin günə qədər.
Bundan sonra Baş Prokurorluq qərardan apellyasiya şikayəti verib. İyunun 25-də Apellyasiya Məhkəməsi Qriqoryanın qərarını ləğv edib. Nəticədə eks-prezident yenidən həbs olunub.
2019-cu ilin fevralından Koçaryana qarşı daha bir ittiham irəli sürülüb – o artıq həm də 927 milyon dram [3 milyon dollara yaxın] həcmində rüşvət almaqda təqsirləndirilir. Bu ittiham 2018-ci ilin noyabrında iş adamı Silva Ambartsumyanın keçmiş prezidentə qarşı irəli sürdüyü iddia ilə əllaqədardır.
Eks-prezident ona qarşı irəli sürülən ittihamların heç birini qəbul etmir və bunu siyasi sifariş və Ermənistanın hazırkı hakimiyyətinin, daha doğrusu, keçmiş müxalifətçi və hazırkı baş nazir Paşinyanın şəxsi qisası hesab edir.
