Ermənistan əmək müqavilələrinin bağlanması üçün rəqəmsal sistemin tətbiqinə başlayır
Ermənistanda elektron əmək müqavilələri tətbiq edilir
Ermənistan hökuməti əmək müqavilələrinin bağlanması üçün rəqəmsal platformanı işə salmağa hazırlaşır. 2026-cı il yanvarın 1-dən ölkədə bütün əmək müqavilələri müstəsna olaraq elektron formada bağlanacaq. Lakin 2025-ci ilin iyul ayından işəgötürənlər könüllü olaraq elektron müqavilələr imzalamağa başlaya bilərlər.
Əmək və Məşğulluq Departamentinin rəhbəri Jora Sarkisyan bu mövzuda təşkil olunmuş mətbuat konfransında artıq müvafiq infrastrukturun təmin edilməsi prosesinə başlanıldığını açıqlayıb. O, jurnalistləri əmin edib ki, platforma bütün vətəndaşların məlumatlarının məxfiliyini təmin edəcək.
“Hər kəs yalnız öz müqavilələrini görəcək. İnsanlar digər işçilərin müqavilələrini görə bilməyəcəklər. İşəgötürən də yalnız işçilərinin müqavilələrini görəcək. Özü də işçisinin başqa işəgötürənlərlə bağladığı müqavilələri görməyəcək”.
- “Ukrayna mövzusu mühüm olsa da, ABŞ və Rusiya arasında danışıqların sadəcə bir hissəsidir”. Bakıdan baxış
- 13 illik fasilədən sonra Azərbaycanın Suriyadakı səfirliyi yenidən fəaliyyətə başlayıb
- Ruben Vardanyan məhkəmənin suallarına cavab verməkdən imtina edib
Sistem mərhələli şəkildə tətbiq olunacaq
Əmək və Məşğulluq İdarəsinin rəisi yeni qaydaların mərhələli şəkildə qüvvəyə minəcəyini bildirib. İlkin olaraq işəgötürənlər və onların işçiləri könüllü olaraq rəqəmsal sistemə qoşula bilərlər. Bu tələb gələn ilin əvvəlindən məcburi olacaq.
İşəgötürənlərin elektron əmək müqavilələri bağlaya biləcəyi platforma hələ də yekunlaşmaq üzrədir.
“Əmək müqaviləsi üçün bir şablon olacaq, yəni işəgötürənin müvafiq məlumatları daxil etməli olduğu müəyyən məcburi sahələr olacaq. İstənilən halda sistem çevikdir. Əgər işçinin və ya işəgötürənin müqaviləyə daxil etmək istədiyi müddəalar və ya iş şəraitilə bağlı məlumat varsa, onları əlavə edə biləcəklər”, – Jora Sarkisyan bildirib.
Eyni platformadan istifadə etməklə, bağlanmış əmək müqavilələrinə xitam vermək və ya onlara dəyişiklik etmək mümkün olacaq.
Qərar artıq işlə təmin olunmuş vətəndaşlara da şamil edilir
Onlayn platforma istifadəyə verildikdən sonra işəgötürənlər yeni olmayan işçilər, yəni 2026-cı il yanvarın 1-dən əvvəl ştata götürülənlər haqqında məlumatları daxil etməlidirlər. Bunun üçün onlara əlavə vaxt veriləcək – 2026-cı ilin sonuna qədər:
“İşçilərlə əmək müqavilələri məlumatların sistemə daxil edilmə tarixi göstərilməklə bağlanacaq. Ancaq müqavilədə bu işçinin, məsələn, 2001-ci ildə işə götürüldüyü göstəriləcək”.
Jora Sarkisyanın sözlərinə görə, elektron sistem yalnız həmin vaxta qədər müqavilələri ləğv edilmiş işçilər üçün məlumatların daxil edilməsini tələb etməyəcək.
İstənilən halda bütün vətəndaşların elektron imzaya ehtiyacı olacaq. Lakin hökumət bunun heç bir çətinlik yaratmayacağına inanır.
“Artıq bir çox vətəndaşlar mobil operatorların təqdim etdiyi elektron imzadan istifadə edərək gəlirlərini bəyan edirlər. Bu o deməkdir ki, rəqəmsal müqavilələrinizə baxmaq və onları imza ilə təsdiqləmək üçün heç bir əlavə hərəkət tələb olunmayacaq”, – deyə əmək və məşğulluq şöbəsinin müdiri düşünür.
Müqavilənin bağlanması prosesi aşağıdakı kimi təşkil olunacaq. Əvvəlcə işəgötürən onu rəqəmsal platformada tamamlayacaq və altına öz elektron imzasını qoyacaq. İşə götürülən şəxs daha sonra e-poçt vasitəsilə bildiriş alacaq. O, müqavilənin mətnini oxumalı və sənədi öz elektron imzası ilə təsdiqləməlidir.
Müsbət cəhətləri: sənədləşmə işləri azalacaq, işçilər qeydiyyatsız qalmayacaq
Jora Sarkisyana görə, bu dəyişikliklər sənədləşdirmə həcminin kəskin azalmasına səbəb olacaq və işəgötürənlər daha az hərəkət etməli olacaqlar:
“İşəgötürən işçi ilə elektron platformada əmək müqaviləsi bağladıqdan sonra onun qeydiyyata alınması üçün Dövlət Gəlirləri Komitəsinə müraciət etməyə ehtiyac qalmayacaq. Qeydiyyat üçün müraciətə müqavilənin məzmunundan asılı olaraq avtomatik baxılacaq”.
Üstəlik, işə müraciət edənlər üçün elektron müqavilə bağlamaq problemlərdən qaçmağa kömək edəcək. Sarkisyanın dediyi kimi, elə hallar olur ki, işəgötürən müqaviləni kağız üzərində tərtib edir, lakin işçinin qeydiyyatı üçün müvafiq orqanlara ərizə təqdim etmir:
“Belə çıxır ki, kağız müqavilənin heç bir hüquqi qüvvəsi yoxdur, sadəcə kağızdır. Artıq belə problemlər olmayacaq”.
