"Erməni əsirlərin azad edilməsi Tramp administrasiyası üçün prioritetdir" – Vardanyanın vəkili
Tramp və erməni əsirlərin azadlığı
“ABŞ administrasiyasına müraciətimiz tamamilə aydın idi: xristian-erməni əsirlərin azad olunması ilə bağlı razılaşma [sülh sazişinin] irəliləməsi üçün ilkin şərt olmalıdır və bu, [seçkiqabağı] administrasiyanın mövqeyi idi,” – deyə, qondarma “Dağlıq Qarabağ Respublikasının” dövlət naziri Ruben Vardanyanın amerikalı vəkili, insan haqları müdafiəçisi Cared Genser “Catholic News Agency“yə müsahibəsində bildirib.
Vəkil həmçinin bildirib ki, məhbusların azad olunması yeni ABŞ administrasiyasının “əsas prioriteti”dir.
Onun sözlərinə görə, “bizə deyildi” ki, əsirlərin azad edilməsi “prezident Trampın nəhayət sülh sazişinə razılıq verməsi” üçün ilkin şərt olmalıdır. Bu mesajı ABŞ administrasiyasına kimin ötürdüyünü isə Genser açıqlamayıb.
O, hazırda Azərbaycanda digər tanınmamış respublika liderləri ilə birlikdə mühakimə olunan keçmiş “Dağlıq Qarabağ Respublikasının” dövlət naziri Ruben Vardanyanın vəkili kimi çıxış edir. İnsan haqları müdafiəçisi uzun müddətdir Vardanyanın hüquqlarının pozulmasından bəhs edir. O, “yüksək nüfuzlu siyasi məhbusun” maraqlarını təmsil etdiyini vurğulasa da, verdiyi qiymətləndirmələr bütün digər əsirləri də əhatə edir.
“Catholic News Agency” erməni əsirlər mövzusunda ABŞ Dövlət Departamentindən də açıqlama istəyib. Agentliyin əldə etdiyi cavabda sadəcə bildirilir ki, bütün saxlanılan şəxslərin hüquqları qorunmalıdır:
“Əgər onlara qarşı cinayət ittihamları irəli sürülübsə, onlara ədalətli məhkəmə araşdırması üçün bütün zəmanətlər verilməlidir”.
- “Ter-Petrosyan, Köçəryan və Sarkisyan da qanun qarşısında cavab verməlidir”. Bakıdan baxış
- Bakının fikri: “Azərbaycanda erməni məhbusların müdafiəsi minlərlə şəhidin hüquqlarının tapdalanmasıdır”
- Sülh fürsətindən necə yararlanmaq olar? Tomas de Vaal Ermənistan-Azərbaycan razılaşması haqqında
- Azərbaycanla Ermənistan arasında sülh sazişi niyə imzalanmır? Bakı və İrəvanın baxışları harada toqquşur?
Azərbaycanda tanınmamış “Dağlıq Qarabağ Respublikasının” 8 keçmiş lideri mühakimə olunur:prezidentlər Arkadi Qukasyan, Bako Saakyan, Araik Arutyunyan, parlament sədri David İşxanyan, dövlət naziri Ruben Vardanyan, Müdafiə Ordusunun komandanı Levon Mnatsakanyan, onun müavini David Manukyan və xarici işlər naziri David Babayan.
Onlar soyqırımı, terrorçuluq və dinc əhalinin zorla köçürülməsini təşkil etməkdə ittiham olunurlar. Onlara ömürlük həbs cəzası verilə bilər. Lakin ittiham olunanlar cinayət işinin materialları ilə tam şəkildə tanış olmaq imkanından belə məhrum edilib.
Keçmiş dövlət naziri Ruben Vardanyanla bağlı iş ayrıca araşdırılır. O, artıq iki dəfə “məhkəmə tamaşasına” etiraz olaraq aclıq aksiyası elan edib.
Qarabağın keçmiş liderləri 2023-cü ilin sentyabrında, tanınmamış respublikada aparılan “antiterror əməliyyatı”ndan sonra həbs olunublar. Azərbaycan hakimiyyəti bu əməliyyatı 100 mindən çox erməninin 10 aylıq blokadasından sonra həyata keçirib. Hərbi əməliyyatlar bitdikdən və Laçın dəhlizi açıldıqdan sonra bütün erməni əhalisi doğma torpaqlarını tərk edib.
“Tramp xristian-erməni əsirləri müdafiə etməyi vəd etmişdi”
Beynəlxalq vəkil Cared Genser Donald Trampın seçkiqabağı verdiyi vədləri xatırladıb. Xüsusilə, o, erməni-xristianların müdafiəsini vəd etmiş, 2023-cü ilin sentyabr hadisələrini “etnik təmizləmə” kimi qiymətləndirərək pisləmişdi. İnsan haqları müdafiəçisi Tramp administrasiyasını həmin vədləri yerinə yetirməyə çağırıb.
Vəkilin sözlərinə görə, onun müdafiə etdiyi Ruben Vardanyan – Ermənistan Apostol Kilsəsinin davamçısı – həbsdə İncil oxumaq imkanından belə məhrum edilib:
“Bu fakt göstərir ki, Vardanyan və digər liderlər yalnız tanınmamış respublikanın nümayəndələri olduqları üçün yox, həm də xristian olduqları üçün təqib olunurlar”.
Vəkil təsadüf hesab etmir ki, “etnik təmizləmədən” sonra Azərbaycan “erməni kilsələrini və mədəni irsi” məhv edir.
Məhbuslar sülh sazişinə qurban gedə bilər
Genserə görə, əgər Ermənistan-Azərbaycan sülh sazişi çərçivəsində “bütün problemlər aşkarlanmaz, müzakirə olunmaz və tam şəkildə həll olunmasa”, bu, sülhün mümkün olmayacağı mənasına gəlir:
“Əgər sülh sazişi bağlanarsa, lakin Dağlıq Qarabağ məsələsi və ya erməni-xristian əsirlərin problemi hələ də həll edilməmiş qalarasa, təəssüf ki, onlar bu sazişə qurban gedə bilərlər”.
Vəkil qeyd edir ki, bu məsələlər nə sülh müqaviləsinin mətnində, nə də Bakı və Yerevanın ikitərəfli gündəliyində yer alır.
“Yeni ABŞ administrasiyası Əliyevi şoka sala bilər”
İnsan haqları müdafiəçisi Tramp administrasiyasını Azərbaycan prezidenti İlham Əliyevi – “diktator” adlandıraraq – “şoka salmağa” çağırıb. Amma bunun üçün hansı konkret üsulların tətbiq olunmalı olduğunu açıqlamayıb:
“Diktatorlar siyasi məhbusları ancaq məcbur qalanda azad edirlər. Onlar bunu heç vaxt səxavət və ya humanist səbəblərlə etmirlər. Bu yalnız o zaman baş verir ki, diktator bir və ya bir neçə siyasi məhbusu həbsdə saxlamağın qiymətinin artıq onlardan gələn faydanı aşdığını hiss edir”.
Tramp və erməni əsirlərin azadlığı
