Dinc sakinlərin qətliamı. Rusiyanın Ukraynadakı əməllərinin araşdırılması. Foto

JAMnews

Ukraynada dinc əhalinin kütləvi qətliamının fotoları

Aprelin 3-dən bütün dünyanın əsas mövzularından biri Ukraynanın Kiyev vilayətinin Buça və digər yaşayış məntəqələrinin Rusiya qoşunları tərəfindən işğalı zamanı dinc əhalinin qətliamını əks etdirən fotolardır.

Fotolarda insanların öz maşınlarında öldürüldüyü, yandırıldığı, tanklarla əzildiyi əks olunub. Əlləri bağlı, ənsələrindən güllə ilə qətl edilən insanların meyitləri də tapılıb.

İlk olaraq fotoları France Presse agentliyi dərc edib.

Ukraynanın baş prokuroru İrina Venediktova bildirib ki, aprelin 4-ə qədər Rusiya ordusundan azad edilmiş Kiyev vilayətinin rayonlarından 410 mülki vətəndaşın cəsədi məhkəmə-tibbi ekspertizasına göndərilib.

Ərazilərdə minalardan təmizləmə işləri aparılır – Venediktova deyib ki, söhbət həm də Rusiya hərbçiləri tərəfindən cəsədlərin minalanmasından gedir.

“Onları niyə öldürüblər? Küçədə velosiped sürən adam nə edib? Qadınlar sırğalarını qulaqlarından çıxardıqdan sonra niyə boğulublar?”

“Mən hər bir rus əsgərinin anasının Buçada, İrpendə, Qostomeldə öldürülən insanların cəsədlərini görməsini istəyirəm. […] Qadınlar uşaqların gözü qarşısında necə zorlana və öldürülə bilərdi? Hətta öldürüləndən sonra da meyitləri təhqir edilib? Niyə tanklarla insanların cəsədlərini əziblər? Ukraynanın Buça şəhəri sizin Rusiyaya nə etmişdi? Bütün bunlar necə mümkün ola bilərdi?” — Ukrayna prezidenti Vladimir Zelenski videomüraciətində deyib.

“Mən istəyirəm ki, Rusiya Federasiyasının bütün rəhbərləri öz əmrlərinin necə yerinə yetirildiyini görsünlər. Və həmrəy məsuliyyət. Bu qətllərə, bu işgəncələrə, partlayışlarla qoparaq küçələrə səpələnən əllərə-qollara görə. Əlləri bağlı insanların başlarına açılan atəşlərə görə. Rusiya dövləti indi belə qəbul ediləcək.

Rusiya “saxta və səhnələşdirilmiş qətllər” haqda

Rusiya Müdafiə Nazirliyi hərbçilərinin Ukraynada dinc əhaliyə qarşı törətdiyi qırğınları əks etdirən fotoları “təxribat” və “səhnələşdirilmiş” adlandırıb.

Rusiya Müdafiə Nazirliyi bildirib ki, rus qoşunları martın 30-da şəhəri tərk edib. Hesabatda cəsədlərin ölümdən “ən azı dörd gün sonra” olmalı olduğu kimi görünməməsi ilə bağlı “xüsusi narahatlıq” ifadə edilib.

Rusiyanın hökumətyönlü mediası “səhnələşdirilmiş videolar” haqqında arqumentlər yayır. Xüsusilə də bildirilir ki, kadrların birində yol kənarında yatan meyitin guya əli tərpənir. Arxa güzgüdən görünən digər cəsəd isə guya qalxıb oturur.

Rusiyanın “Mediazona” nəşri bu xəbərlərə dair araşdırma və sübutlu təkzib dərc edib. Avtomobilin ön şüşəsindəki cızıqdan yaranan parıltı “əlin tərpənməsi”, arxanı göstərən güzgüdəki görüntü təhrifi isə “meyitin oturması” kimi qələmə verilib.

Rusiya aprelin 4-də “Ukraynalı radikalların Buçada dəhşətli təxribatı ilə əlaqədar” BMT Təhlükəsizlik Şurasının iclasını tələb edib.

Dünyanın reaksiyası

BMT-nin Baş Katibi Antonio Quterreş Buçada mülki şəxslərin qətl faktları ilə bağlı dəlillərdən “dərin sarsıldığını” bildirib və müstəqil araşdırma aparılmasına, günahkarların məsuliyyətə cəlb edilməsinə çağırıb.

Qərb ölkələri Ukraynada dinc əhalinin öldürülməsinə görə Rusiyaya qarşı yeni sanksiyalar tətbiq etməyi planlaşdırır. Bunu Avropa Şurasının sədri Şarl Mişel, Almaniya kansleri Olaf Şolz, Böyük Britaniyanın baş naziri Boris Conson bəyan edib.

Hadisə ilə bağlı bir çox Avropa liderləri açıqlamalar verib. Fransa prezidenti Emmanuel Makron “Rusiya hakimiyyəti bu cinayətlərə görə cavab verməli olacaq”, deyib.

ABŞ dövlət katibi Entoni Blinken bildirib ki, Dövlət Departamenti Rusiya ordusunun Ukrayna vətəndaşlarına qarşı törətdiyi vəhşilikləri sənədləşdirməyə kömək edəcək. Dövlət Departamentinin sözçüsü Ned Prays, “Çox yaxında ABŞ Rusiyaya qarşı əlavə tədbirlər görəcək”, deyə qeyd edib.