Cənubi Osetiyanın adının dəyişdirilməsi ilə bağlı referendum təyin edilib

Cənubi Osetiya prezidenti Cənubi Osetiya Respublikasının adının dəyişərək “Cənubi Osetiya Respublikası – Alaniya Dövləti” adlandırılması ilə bağlı referendum təyin edib.

Leonid Tibilovun fərmanına əsasən Konstitusiyaya zəruri dəyişikliklərin edilməsi üçün səsvermə aprelin 9-da, prezident seçkilərilə eyni gündə  baş tutacaq.

Sual bu cür qoyulub:

“Cənubi Osetiya Respublikası Konstitusiyasının 1-ci maddəsinin 1-ci bəndinə dəyişiklik edilərək, onun aşağıdakı redaktədə ifadə olunması ilə razısınızmı: “1. Cənubi Osetiya Respublikası – Alaniya Dövləti Cənubi Osetiya Respublikası xalqının öz müqəddəratını təyin etməsi nəticəsində yaradılmış suveren demokratik hüquqi dövlətdir. Cənubi Osetiya Respublikası və Alaniya Dövləti adları bərabər mənalıdır””.

Cənubi Osetiya prezidenti bildirib ki, ”ölkə onu yaradanların adını daşımalıdır və Alaniya dövlətçiliyinin bərpa olunması ilə qədim Alaniya adı da yenidən doğulmalıdır”.

===========

Referendum qərarı Tbilisidə mənfi reaksiya doğurub. Gürcüstan prezidenti Georgi Marqvelaşvili xüsusi bəyanatında bildirib ki, “plebisit, seçkilər və ya xalqın iradəsinin ifadə olunduğu istənilən başqa fəaliyyət xarici ölkə tərəfindən işğal olunmuş, köklü əhalisinin böyük hissəsinin qovulduğu, etnik təmizləmə aparılmış və effektiv nəzarətin Rusiya Federasiyası tərəfindən həyata keçirildiyi ərazidə icra oluna bilməz”.

Marqvelaşvili Rusiyanı öz beynəlxalq öhdəliklərini yerinə yetirməyə, beynəlxalq aləmi isə Gürcüstanın suverenliyinin pozulması yönündə növbəti addımın qarşısını almağa səsləyib.

• Leonid Tibilov ilk dəfə referendum keçirib respublikanın adını dəyişib Alaniya qoymaq təşəbbüsü ilə 2015-ci ilin dekabrında çıxış edib.

• Alaniya orta əsrlərdə irandilli köçəri alan tayfaları və yerli qafqazlı tayfalar tərəfindən yaradılmış, I minillikdən XIV əsrin ortalarına qədər mövcud olmuş dövlətin adıdır. Qədim Alaniyanın tarixi irsinə osetinlərdən başqa Şimali Qafqazın digər xalqları da iddia edir.

• Hazırda Alaniya adı rəsmən yalnız bir respublikanın adında var – Şimali Osetiya – Alaniya Respublikası.

JAMnews-un təfərrüatlı və arqumentli materialı burda

Məqalədə ifadə olunmuş fikirlər müəllifin terminologiyasını və nöqteyi-nəzərini əks etdirir, redaksiyanın mövqeyilə üst-üstə düşməyə bilər.