Bakıda ilk dəfə LGBTQİ+ problemlərindən bəhs edən yerli bədii film nümayiş olunub
Bakıda LGBTQİ+ problemlərinə həsr olunmuş ilk yerli bədii film nümayiş etdirilib. Filmin premyerası Bifobiya, Homofobiya və Transfobiya ilə Mübarizə Günündə baş tutub.
JAMnews-un əməkdaşı “Bədənimə günəş” bədii filminin yaradıcı heyəti ilə görüşüb, onun necə ərsəyə gətirilməsi ilə maraqlanıb.
- Azərbaycan regionlarında kuir fərdlər: onlar kimdir və necə yaşayırlar
- “Azərbaycan mənim üçün travmalardan ibarətdir”
- Azərbaycanda transgenderlərə qarşı fiziki zorakılığa çağırış edildi
“Minority Azərbaycan” layihəsi çərçivəsində “Bədənimə günəş” adlı bədii filmin premyerası mayın 17-də – Beynəlxalq Bifobiya, Homofobiya və Transfobiya ilə Mübarizə Günündə keçirildi.
Filmin rejissoru və ssenari müəllifi trans qadın Miray Dəniz İsmayıl, operatoru isə Nigar Səfərovadır. Filmin nümayişi “Baku Community Space” və Böyük Britaniyanın Azərbaycandakı səfirliyinin dəstəyi ilə baş tutub.
Bədii film lesbiyan cütlüyün, ailə həsrəti çəkən trans qadının və sevgilisi ilə münasibətləri qaydasında olmayan gey oğlanın hekayəsindən bəhc edir. Film boyunca tamaşaçılar onların çətinliklər qarşısında yaşadıqları duyğulara və aldıqları qərarlara şahidlik edir.
Filmin rejissoru və ssenari müəllifi Miray Dəniz deyir ki, Azərbaycanda kuir icma ilə bağlı hər hansı iş görmək çoxdan ağlında olub:
“Kuir icmadan müsahibələr alırdım, yazılar yazırdım. Amma bu, mənə bəs etmirdi. Düşündüm ki, kino ixtisasında təhsil alıram və Azərbaycanda LGBTQI+ mövzulu bədii film, demək olar ki, yoxdur. Olanlar isə çox qısadır. Qərara gəldim ki, tam metrajlı bədii film çəkim.
Dünyadakı LGBTQI+ mövzulu filmlərin əksəriyyətində aktyorlar “cis hetero” [heteroseksual – JAMnews] olur, bu isə mənim xoşuma gəlmir. Çünki hal-hazırda dünyadakı şərtlər o deyil ki, “cis hetero” rolunu kuir biri oynasın. Məsələn, trans qadınlar da “cis hetero” rolunu çox vaxt oynamır. Onda trans qadın rolunu niyə “cis hetero” qadın oynasın?! Şərtlər eyni olduğu halda bu haqda düşünmək olar.
Trans qadın rolunu kuir icmadan birinin oynamağı daha arzuolunan idi. Mən öz komandamı kuir insanlardan ibarət yığdım. Filmin hazırlanması bir neçə ay çəkdi. Mən həm filmin rejissoru, həm ssenaristi, həm texniki işlərdən məsuliyyət daşıyanı və ən əsas da baş aktyor idim. Rita rolunda oynayırdım. Çox xoşbəxtəm ki, belə bir film ərsəyə gətirdik. Xüsusilə də premyeranın belə xüsusi gündə baş tutmağı bizim üçün çox dəyərli idi”.
“Minority Azərbaycan” təşkilatının koordinatoru Gülnara Mehdiyeva bildirir ki, “ILGA Avropa”nın reytinqində LGBTQI+ hüquqları üzrə Azərbaycan ən axırıncı yerdədir. Artıq illərdir ki, Azərbaycan bu uğursuz yeri qoruyub saxlayır.
“Biz “Minority Azərbaycan” olaraq, LGBTQI+ mövzulu bütün formatda olan materialları hazırlamağı özümüzə hədəf seçmişik. İnanırıq ki, ideyalarımızı vizual üsulla daha yaxşı çatdıra bilərik”, – G.Mehdiyeva deyir.
Onun sözlərinə görə, 17 May günü illərdir qeyd olunur:
“Azərbaycanda mütəmadi şəkildə kuir icma zorakılığa, nifrət cinayətinə, qətllərə məruz qalır. Ən son Əvəz Hafizlinin nifrət cinayəti şəklində qətlə yetirilməsi, eyni zamanda müxtəlif bloqerlərin çox rahat şəkildə icmaya qarşı kütləvi zorakılıq çağırışları etməsi və bunun cəzasız qalması, müxtəlif xəstəxanaların LGBTQI+lara tibbi yardım göstərməkdən imtina etməsi kimi dəhşətli hallar il boyu baş verir.
Ötən il, bu il… Bunun fonunda hesab edirik ki, kuir icmaya dəstək vermək, icmanın öz sözünü çatdıra bilməyi üçün meydanlar yaratmaq çox vacibdir. Biz musiqi, film və s. üsullarla bunları çatdırmağı vacib sayırıq”.
Filmdə rol alan aktrisa Fərqanə Abdullanın sözlərinə görə, bu filmdə oynamaq təklifi alanda tərəddüd edib:
“Lakin ideya və rollar haqqında danışılanda xoşum gəldi, çünki mən filmdə özümü canlandırırdım, başqa bir rol aparmırdım. Bu, mənim üçün yeni bir persona deyildi.
Səhnədə özümə baxanda qəribə oldum. Oynayanda heç bir əziyyət çəkməmişdim. İzləyən zaman da kənardan bir növ özümü izləyirdim. Mənim həyatdakı rolum da budur. Kiməsə məsləhət vermək, kimisə müəyyən məsələlərdə agah etmək.
Qəşəng təcrübə və qəribə hiss idi. Düşünürəm ki, kaş film qısa zaman ərzində yox, daha rahat və uzun müddət ərzində çəkilərdi. O zaman texniki məsələlərə daha çox zaman ayıra və daha yaxşı işləyə bilərdik. Ən çox buna məyus oldum. Və kaş bir az daha çox büdcəmiz olardı ki, filmi tamaşaçıya daha yaxşı çatdıraq”.
