Bakı İcra Hakimiyyəti sahibsiz itləri kütləvi şəkildə güllələməyə başlayıb

Sumqayıt şəhər sakini 5 yaşlı Zeynəb Mikayılzadə iyulun sonunda sahibsiz itin dişləməsi nəticəsində dünyasını dəyişib. Bu xəbər Bakı və Sumqayıt küçələrində sahibsiz itlərin kütləvi şəkildə güllələnməsinə səbəb olub.

Bu, 2017-ci ildə itin dişləməsinin ölümə səbəb olduğu yeganə faktdır. Amma Səhiyyə Nazirliyi Gigiyena və Epidemiologiya Mərkəzinin rəhbəri Rita İsmayılovanın sözlərinə görə, bu ilin səkkiz ayı ərzində Azərbaycanda 6500 nəfəri heyvan dişləyib, bunların 90 faizində söhbət məhz sahibsiz itlərdən gedir.

Avqustun ilk yarısında bir çox Bakı sakini sahibsiz itlərə qarşı əsl “ovun” şahidi olub. Şəhər icra hakimiyyətinin əməkdaşları xüsusi furqonlarda gələrək insanların, o cümlədən də uşaqların gözləri qabağında heyvanları güllələyir. Üstəlik itlərin cəsədləri elə olduğu yerdə qalır, isti günün altında iylənir. “Ovçuların” sözlərinə görə, cəsədlərin yığılmasına meriyanın başqa xidməti cavabdehdir.

“Bu gün Bakıda yenidən itləri güllələməyə başlayıblar. Həmişə olduğu kimi gülləyə tuş gələn ən dinc və insanlara etibar edən heyvanlar olub. İtlərin qətliamı süni seçimə gətirib çıxarır və nəticədə ən vəhşi, insanlara ən dözümsüz olanlar sağ qalır”, – Bakı sakini Nigar Ağayeva Facebook səhifəsində yazır.

Bu kampaniya sosial şəbəkələrdə də geniş müzakirələrə səbəb olub. Şərh yazanlardan çoxu heyvanların güllələnməsini pisləyib, amma şəhər hakimiyyətinə haqq qazandıranlar da az deyil. Budur, bir neçə şərhi təqdim edirik:

“Sahibsiz itlərin çoxalmasını nəzarətdə saxlamaq üçün yeganə yol sterilizasiya və axtalamaqdır. Digər tədbirlər nəticə vermir. Bizim ölkədə nemçə onilliklər şəhərin küçələrində itləri güllələyiblər. Əgər bu, effektli vasitə olsaydı, problem əlli il əvvəl həll olunardı”.

“Sterilizasiya və axtalama sahibsiz heyvanların çoxalması problemini 7 il ərzində həll edir. Axtalanmış və sterilizə edilmiş itlər artıq aqressiv olmur və insanlar üçün heç bir təhlükə törətmirlər. Heyvanları güllələyəndə qalanlar dəhşətli templə çoxalırlar. Təbiətən belə qurulub. Ətrafda itlər azalıbsa dişi it doqquzdan çox küçükləyə bilər”.

“Müxtəlif olimpiadalar və Formula 1 keçirən ölkə bu problemi həll edə bilmir. İnkişaf etmiş Avropa ölkələrini nümunə götürürlər, amma orda bircə dənə olsun sahibsiz it, ya pişik yoxdur. Elə ruhən bizə yaxın olan Türkiyə və ya Gürcüstanı götürün. Bu məsələdə nə qədər irəli gediblər. Bizimkilər sadəcə bu məsələ ilə məşğul olmaq istəmirlər. Bilmirəm, daha nə qədər insan dişlənməli və sahibsiz it öldürülməlidir ki, dövlət nəhayət, bu işə bir əncam çəksin”.

“Mən də heyvanları sevirəm və onlara qarşı zorakılığı qəbul etmirəm. Zooparklara və akvariumlara nifrət edirəm. Amma bu, o demək deyil ki, şəhər vəhşi meşəyə çevrilməlidir. Sahibsiz itlərə ciddi nəzarət olunmalıdır, onlar insanların yaşadıqları ərazilərdən uzaqlaşdırılmalıdırlar. Sən demə, dövlət sahibsiz itlərlə mübarizəyə vəsait ayırıb. Həmkarım lkin Muradov yazır ki, Bakı şəhər İcra Hakimiyyəti hər öldürülmüş itə görə 28 manat (15 avroya yaxın) ödəyir”.

Bakı şəhəri İcra Hakimiyyətinin Sahibsiz Heyvanlarla Mübarizə İdarəsinin sahə rəisi Ərəstin Əmiraslanov bildirir ki, “İlin sonuna qədər Bakıda sahibsiz itlərlə bağlı problem həll olunacaq. Hazırda bu istiqamətdə iş aparılır. İnsanlar küçələrdə sahibsiz itlərə rast gələcəklər, amma onlar nömrələnəcək, sterilizə olunacaq, aşı ediləcək və insanlar üçün təhlükəsiz olacaqlar”.

“İtlər xüsusi vasitələrlə tutulur. Zor tətbiq edilmədən onları sahibsiz heyvanlarla mübarizə üzrə xüsusi sahəyə gətirirlər. Baytarlar itləri müayinə edir. Əgər itlərdə quduzluq kimi insanlar üçün təhlükəli xəstəliklər aşkarlanırsa, onlar öldürüldükdən sonra yandırılırlar. Sağlam itləri isə yedizdirir, təmizləyir və bəsləyirik. Bundan başqa, itlər tutulur və sterilizə edilir ki, çoxala bilməsinlər. Bundan sonra onlar nömrələnir və küçəyə buraxılırlar”, – APA agentliyi Əmiraslanovdan sitat gətirib.