Bakı bulvarında bu il də dəniz gəzintiləri mümkün olmayacaq
Bakı bulvarı – gəmi gəzintiləri
Bakı bulvarı. Günorta saatları. Hava günəşlidir. Bakı sakinləri qışın yorucu soyuğundan çıxıb yenidən bulvara üz tutublar. Ətrafda adamlar iki-iki, üç-üç Xəzər sahili boyu gəzişirlər.
Adətən belə havalarda insanlar bulvarın ən önəmli simvollarından sayılan gəzinti gəmilərilə səyahətə çıxa bilirdilər. Amma yenicə verilən rəsmi məlumata görə, bu il də şəhər sakinləri və qonaqlar Bakı bulvarının əvəzedilməz istirahətindən – dəniz gəzintilərindən yararlana bilməyəcəklər.
2022-ci ilin oktyabrına qədər arzu edənlər 5-10 manat arası ödəniş etməklə Xəzər dənizində 30 dəqiqə davam edən gəzintilərə çıxa bilirdi. Bu səyahətləri Dənizkənarı Bulvar İdarəsinin balansında fəaliyyət göstərən 60 nəfərlik “Şəfəq” və 450 nəfərlik “Mirvari” adlı iki gəzinti gəmisi həyata keçirirdi.
İki il yarımdır ki, bu gəmilər bulvar kənarında lövbər salıb, hərəkətsiz qalıblar.
Xəzərdə suyun səviyyəsi azalıb
Dənizkənarı Bulvar İdarəsinin Mətbuat Xidmətinin yaydığı məlumata görə, Xəzər dənizinin səviyyəsinin enməsi və suyun sahildən geriyə çəkilməsi ilə əlaqədar gəzinti gəmiləri müvəqqəti olaraq işləmir:
“Sərnişinlərin təhlükəsizliyinin təmin edilməsi məqsədilə hazırda gəzinti gəmilərinin işləməsi qeyri-mümkündür. Aidiyyatı qurumlarla müzakirələrdən sonra gəmilər üçün yeni marşrut xətti müəyyənləşə bilər. Biz də onun yenidən fəaliyyət göstərməsini istəyirik”, – açıqlamada deyilir.
“Gündə 30-40 adam gəmilərin taleyi barədə soruşur”
Sahilin gəmilərin dayandığı və sərnişinlərin platformaya qəbul edildiyi hissəsinə giriş-çıxış da məhdudlaşdırılıb. Uzaqdan “Mirvari” adlı gəzinti gəmisi gözə dəyir.
Ərazidə xidmət aparan bulvar mühafizəçilərindən biri deyir ki, az qala hər gün gəzinti gəmilərinin yenidən fəaliyyətə başlayıb-başlamayacağı ilə bağlı sualları cavablamalı olur.
“Əsasən havalar isinəndən sonra gündə azı 30-40 nəfər gəmilərin taleyi barədə soruşur. Ən çox da uşaqlarının təkidinə görə gəmiyə bilet axtaran valideynlər narazılıq edir. Çünki, həvəslə bulvara gəlib, sonra gəmilərin işləmədiyini görüb məyus olurlar. Açığı, bizə də dəqiq bir tarix, və ya marşrut xəttinin dəyişdiriləcəyilə bağlı məlumat verilmədiyindən bu sualları cavablamaqda çətinlik çəkirik”, – mühafizəçi deyir.
Elə paytaxt sakinləri və şəhər qonaqlarının bəziləri də gəzinti gəmilərinə böyük maraq olduğunu və onların fəaliyyətlərinin bərpa edilmədiyindən məyusluğunu dilə gətirir.
“Mən Bakıda yaşamıram. Qohumlarımın evinə bir-neçə həftəlik qonaq gəlmişəm. Hava da yaxşı idi, dedim bəlkə bulvarda gəmiyə bilet alaq. O da dedilər ki, gəmilər çoxdandır işləmir. Yolum bir də nə vaxt Bakıya düşər, bilmirəm. Amma ümid edirəm o vaxta qədər gəmilərin fəaliyyəti bərpa edilər”, – Bulvara gəzintiyə çıxan gənc qız danışır.
“Xəzərdə su səviyyəsinin artması gözlənilmir”
Ekspertlərin fikrincə, Xəzərdə su səviyyəsinin belə kəskin azalmasında qlobal iqlim dəyişikliyi böyük rol oynayır.
Ekoloq Sadiq Həsənovun sözlərinə görə, Xəzər dənizində su səviyyəsinin azalması 2000-ci ildən bəri artan xətt üzrə davam edir.
“Xəzər dənizi ümumiyyətlə dünya dəniz səviyyəsindən aşağıda yerləşir və 2000-ci ildən bəridir ki, bu azalma davam edir.
Bunun müxtəlif səbəbləri var. Təbii ki, əsas səbəblərdən biri qlobal iqlim dəyişikliyidir. Tempraturun yüksəlməsinə görə Xəzərdə buxarlanma həddən çox artıb. Eyni zamanda bütün ölkə üzrə su ehtiyyatları azalıb, kənd təsərüffatında isə su sərfiyyatı həddən çox artıb. Kür çayı Xəzərə çatmır. Hətta bəzi nöqtələrdə, əksinə, Xəzərin sualarının Kürə daxil olması müşahidə olunur.
Bundan başqa Xəzəri su ilə təmin edən əsas ehtiyatlardan biri də Volqa çayıdır ki, orada da suyun səviyyəsi xeyli aşağı düşüb.
Bütün bu amillər birləşib bu günkü mənzərəni yaradır”, – deyə ekoloq bildirir.
Sadiq Həsənov əlavə edir ki, yaxın zamanlarda Xəzərdə su səviyyəsinin artmasına ümid yoxdur.
“Mövzu ətrafında apardığım tədqiqatın nəticəsi belə oldu ki, Xəzərdə vəziyyət hələ bir müddət də belə qalacaq. Tədqiqat çərçivəsində araşdırdığım 20 elmi məqalənin cəmi birində Xəzərin su səviyyəsinin yaxın illərdə artacağına pozitiv yanaşılır. Digər 19 məqalə və peyk məlumatları isə göstərir ki, Xəzərdə suyun səviyyəsi nəinki artmayacaq, əksinə, azalmaqda davam edəcək. Çünki, dediyim kimi iqlim dəyişikliyi, əhalinin və dolayı yolla su sərfiyyatının artması Xəzəri suyla təmin edən ehtiyatların da azalmasına gətirib çıxaracaq”, – ekoloq deyir.
Görünən odur ki, Xəzərdə su səviyyəsi artmadıqca onun sahillərində gəmi gəzintilərinin də tezliklə bərpa edilməsi gözlənilmir. Paytaxt sakinləri hələ bir az da bu xidmətdən istifadə edə bilməyəcəklər.
