Azərbaycanda gənc politoloq dövlətə xəyanətdə ittiham olunur
Bəhruz Səmədov dövlətə xəyanətdə ittiham olunur
Azərbaycanda gənc politoloq, Praqada Karl Universitetinin doktorantı Bəhruz Səmədov dövlətə xəyanət ittihamı ilə həbs edilib. O, ittihamları rədd edir və ölkəsinə qarşı xəyanət etmədiyini bildirir. Fəal deyir ki, “o, sadəcə sülh istəyir”.
- “Abzas Media işi” üzrə həbs edilənləri artıq 12 ilə qədər həbs gözləyir
- AXCP sədri Əli Kərimli böhtanda ittiham olunur
- İşçi hüquqları müdafiəçiləri məhkəmə qarşısında
Avqustun 23-də Bakının Səbail rayon Məhkəməsi Cinayət Məcəlləsinin 274-cü (dövlətə xəyanət) maddəsi ilə təqsirləndirilən Bəhruz Səmədov haqqında 4 ay müddətinə həbs qətikan tədbiri seçib.
Vəkili Zibeydə Sadıqovanın sözlərinə görə, istintaq Səmədovun həbs edilməsi zərurətini onun xaricdə təhsil alması və qaça biləcəyi ilə əsaslandırıb.
“Biz buna etiraz edərək Bəhruzun gizlənmək fikrində olmadığını qeyd etdik. O, günahsız olduğunu, heç vaxt vətənə xəyanət etmədiyini dedi. Sülhsevər insan olduğunu, xristianlığı qəbul etdiyini və bu dinin sülhü təbliğ etdiyini bildirdi. O, dedi ki, sadəcə sülh istəyir”.
Bununla belə, məhkəmə istintaqın vəsatətini təmin edib. Müdafiə tərəfi apellyasiya şikayəti verəcək.
Vəkilin bildirdiyinə görə, Səmədov həbsi zamanı təzyiqlərə məruz qaldığını bildirib və məhkəmə prokurorluğun bu işi araşdırması barədə qərar verib.
Bəhruz Səmədov avqustun 21-də axşam saatlarında evdən çıxdıqdan sonra yoxa çıxıb. Dostları və ailəsi onunla telefonla əlaqə saxlaya bilməyib. Daha sonra Səmədovun nənəsi Zibeydə Osmanova bildirib ki, özlərini Azərbaycan Dövlət Təhlükəsizliyi Xidmətinin əməkdaşları kimi təqdim edən şəxslər onlara gələrək mənzildə axtarış aparıblar. Osmanovanın sözlərinə görə, həmin şəxslər mənzildən nəvəsinin sənədlərini, kitablarını və kompüterlərini aparıblar.
Təxminən iki sutka ərzində hüquq-mühafizə orqanları Səmədovun saxlanması faktını nə təsdiq, nə də təkzib edib, ailəsinin və dostlarının sorğularına cavab verməyib.
Bəhruz Səmədov Mərkəzi Avropa Universitetinin Beynəlxalq Münasibətlər fakültəsinin məzunu, Karl Universitetinin siyasi elmlər fakültəsinin doktorantıdır. Gənc politoloq poststrukturalist və psixoanalitik nəzəriyyələrə əsaslanaraq Azərbaycanda hegemonluğu və siyasi diskursu öyrənir.
O, həmçinin OC Media nəşrinin və Bakı Araşdırmalar İnstitutunun müəllifidir. Azərbaycan hökuməti haqqında tənqidi yazıları ilə tanınır.
Səmədov həmçinin müxtəlif beynəlxalq təşkilatların həyata keçirdiyi sülh quruculuğu layihələrinin fəal iştirakçısıdır.
Avqustun 23-də Karl Universitetinin kollektivi Bəhruz Səmədovun həbsi ilə bağlı bəyanat yayıb.
Bəyanatda qeyd olunub ki, universitetin akademik ictimaiyyəti Sosial Elmlər fakültəsinin aspirantı Bəhruz Səmədovun Bakıda həbsi ilə bağlı xəbəri təşvişlə izləyir.
“Karl Universitetinin Sosial Elmlər Fakültəsinin rəhbərliyi Karl Universitetinin rəhbərliyi ilə birlikdə etibarlı mənbələrdən məlumat toplamaq üçün intensiv işləyir. Karl Universiteti həmçinin əməkdaşlıq xahişi ilə Çexiya Xarici İşlər Nazirliyi ilə əlaqə saxlayıb”, – sənəddə deyilir.
