Azərbaycan əsgəri Qarabağda ermənilər tərəfindən saxlanılıb və casusluqda günahlandırılır

Tanınmamış DQR Milli Təhlükəsizlik Xidmətinin verdiyi məlumata əsasən, Ağdarə (Martakert) şəhərində mənzillərin birində avqustun 25-də Azərbaycan SQ-nin hərbçisi Cəmil Babayev aşkarlanıb. O, evdə olan uşaqları təhdid edib və yemək tələb edib. Dağlıq Qarabağın hüquq-mühafizə orqanları azərbaycanlı əsgəri saxlayıb və cinayət məcəlləsinin bir neçə maddəsi ilə haqqında cinayət işi qaldırılıb.

Babayev casusluqda, sərhədi qanunsuz keçməkdə, qeyd olunan mənzilin azyaşlı sakinlərini ölümlə təhdid etməkdə ittiham olunur. İstintaq gedir.

Azərbaycanın Müdafiə Nazirliyinin yaydığı bəyanatda hərbçi Cəmil Babayevin Gəncədəki hospitalın psixiatriya şöbəsini özbaşına tərk etdiyi qeyd olunub.

• Qarabağda atışma, Bakı sülhməramlıları günahlandırır, İrana nota verilib. Nə baş verir?
• Qarabağ: “Mənim həyatımda hər şey müharibə vaxtı yox, atəşkəsdən bir həftə sonra dəyişdi”

Ermənistan mənbələrindən informasiya

Tanınmamış Dağlıq Qarabağ Respublikası hökumətinin yanında informasiya qərargahından bildirilir ki, Ağdərə şəhərində Teryan küçəsində Azərbaycan SQ-nin hərbçisi Cəmil Babayev saxlanılıb.

Amma bu rəsmi informasiya yayılmazdan əvvəl Ermənistan mediasında Ağdərədə evlərin birinə azərbaycanlı əsgərin girdiyi haqda yazırdı. Bu zaman evdə iki yeniyetmə oğlan olub. Hərbçi uşaqları təhdid edib, yemək və siqaret tələb edib. Ona yemək veriblər, bundan sonra yeniyetmələrdən biri mağazaya gedib siqaret alacağına söz verib. O, evdən çıxıb və polis çağırıb.

Həbs edilən Cəmil Babayev indi tanınmamış DQR Milli Təhlükəsizlik Xidmətində saxlanılır.

Facebook-un Ermənistan seqmentinin istifadəçiləri ən yaxın Azərbaycan postunun iki kilomert məsafədə yerləşdiyi halda “azərbaycanlı əsgərin Ağdərənin yaşayış məntəqələrinə qədər necə gəlib çıxdığına heyrət edirlər”.

Azərbaycan mənbələrindən informasiya

“Azərbaycan Ordusunun müddətdən artıq həqiqi hərbi xidmət hərbi qulluqçusu əsgər Babayev Cəmil Natiq oğlu Gəncə hospitalının psixiatriya bölməsini özbaşına tərk edib”, – Azərbaycan Müdafiə Nazirliyinin mətbuat xidmətinin məlumatında deyilir.

“C.Babayev haqqında cinayət işi başlanılıb, araşdırma aparılır.

Ehtimal olunur ki, hərbi qulluqçumuz Rusiya sülhməramlılarının nəzarətində olan əraziyə keçib”, – məlumatda bildirilib.

Sosial şəbəkələrin Azərbaycan seqmentində istifadəçilər Qarabağda saxlanılan hərbçinin formasına diqqət yetiriblər. Məsələ burasındadır ki, onun əynində olan hərbi uniforma 1918-ci il – Azərbaycan Demokratik Respublikası zamanına aiddir.

“Deməli, insanlar öz dədə-baba torpaqlarına gedə bilmir: ya minaya düşürlər, ya da polis saxlayır. Amma hansısa psixi xəstə Gəncədən Ağdərəyə (!) gedir, əynində də yalnız muzeylərdə ola biləcək forma ilə”, – istifadəçilərdən biri hadisəni şərh edib.