Azərbaycan parlamentinin deputatı əxlaqsız qadınla görüşü haqda danışıb
Milli Məclisin deputatı, Azərbaycanın Ağsaqqallar Şurasının sədrinin feministlərin aksiyasına reaksiyası sosial şəbəkələrdə qızğın müzakirələrə səbəb olub. Parlament üzvü aksiyanı şərh edərkən Fransada əxlaqsız qadınla görrüşü haqda danışıb.
Pravda.az nəşrinə müsahibəsində Azərbaycan parlamentinin deputatı, ölkənin Ağsaqqallar Şurasının sədri Eldar Quliyev 2021-ci il martın 8-də Bakıda feministlərin məişət zorakılığına qarşı keçirdiyi aksiya ilə bağlı fikrini açıqlarkən Fransada bir görüşü haqda danışıb.
Deputat harada və kimlə görüşüb?
![](https://jam-news.net/app/uploads/2021/03/4c6e1eb2-074c-43c1-bd35-4fd54464787d.jpg)
“Bakıda qadınlar aksiya keçirməklə dünyada bizi biabır edirlər. Ayıb deyil zınqırovları da bağlayıb deyirlər ki, bizim namusumuzu küçəyə qoyublar, qadınların öldürülməsi siyasidir?! Heç görmüsünüz, hansısa qadın siyasi səbəbdən öldürülsün?! Bu yaşa gəlmişəm, Azərbaycanda hansısa qadının siyasi motivlə öldürülməsi faktı ilə rastlaşmamışam”, – deputat deyib.
“Bir dəfə Fransada bir xanımla söhbətləşirdik. Xanım dedi ki, ailəlidir, müəllim işləyir. Soruşdum ki, bəs burda neynirsən? Dedi, həftəsonları pul qazanmaq üçün gəlirəm.
Yəni oralarda bu mövzular artıq adi hal kimi qəbul edilir.
Bir daha təkrar edirəm, Azərbaycan qızlarının isməti bizim üçün çox önəmlidir”, – Eldar Quliyev qeyd edib.
Sosial şəbəkələrdə reaksiya
Deputatın müsahibəsi sosial şəbəkələrin Azərbaycan seqmentində dərhal bir nömrəli müzakirə mövzusuna çevrilib.
Xarakterik şərhlərin bir qismi:
“Yəqin o qadın ondan soruşub ki, sən burda neynirsən?”
“O, ora heç olmasa istirahət günləri gəlir, bunların əsəriyyəti isə vicdanını hər gün satır”.
“Fransada fahişəxanalar yoxdur, fahişəlik də cinayətdir. Deputat ya nəyisə qarışdırır, ya da sadəcə arzularının dili ilə danışır”.
“Biz öz dünya görüşümüzü heç kimə sırıya bilmərik”
![](https://jam-news.net/app/uploads/2021/03/iqbal-agazade.jpg)
“Azərbaycanda feministlərin də hər kəs kimi aksiya keçirməyə haqları çatır, lakin dünənki aksiyada səsləndirilən şüarların nə qədər aktual olması isə başqa məsələdir. Ümumiyyətlə, cəmiyyət buna nə qədər hazırdır, bu problemlər nə qədər doğru şəkildə qabardılır kimi suallar yaranır… Feministlər, sadəcə, bir qrupdur.
…Belə aksiyaların Azərbaycan xanımına yaraşmadığı kimi fikirlərə gəlincə isə, kimə nə yaraşdığını hər kəs özü müəyyən edir. Biz kiməsə deyə bilmərik ki, nəyisə danış, bu sənə yaraşır ya yaraşmır, nəyisə geyin, bu sənə yaraşır, ya yaraşmır.”, – Azərbaycan parlamentinin keçmiş deputatı, “Ümid” partiyasının lideri İqbal Ağazadə feministlərin aksiyasını belə şərh edib.