Azərbaycan parlamenti tənqidçi bloqerə müsahibəsinə görə deputatın cəzalandırılmasını tələb edir
Vahid Əhmədovun Mehman Hüseynova müsahibəsi
Milli Məclisin deputatı Vahid Əhmədov tənqidçi bloqer Mehman Hüseynova açıq müsahibə verib. Əhmədov bloqerlə söhbətində ölkədəki korrupsiyanı və bəzi deputatların fəaliyyətini tənqid edib. Müsahibə parlamentdə hiddətə səbəb olub və Əhmədovun həmkarları onun cəzalandırılmasını tələb ediblər. Deputat Milli Məclisin intizam komissiyası qarşısında cavab verməli olacaq.
- Azərbaycan Laçın yolunun girişində nəzarət-buraxılış məntəqəsi quraşdırıb. Bakı və Yerevandan məlumat və şərhlər
- Onlarla Gürcüstan vətəndaşı Sudanda, döyüş bölgəsində qalıb
- “Hər zaman istəmişəm üzlərdə gülüş yarada bilim”. Aktyorun foto-hekayəsi
Nə baş verib?
Ötən həftə deputat Vahid Əhmədov tanınmış tənqidçi bloqer Mehman Hüseynova müsahibə verib. Deputat səmimi müsahibəsində Azərbaycan cəmiyyətinin bəzi problemlərinə toxunub.
O, Azərbaycan dövlətinin hələ də regionlarda işsizlik problemini həll edə bilmədiyini və bu səbəbdən də rayon sakinlərinin iş və çörək dalınca Bakıya axışdığını bildirib.
Hüseynovun ölkə iqtisadiyyatında inhisarçılığın səbəbləri ilə bağlı sualını cavablandıran Əhmədov qeyd edib ki, nə qədər ki, məmurlar paralel bizneslə məşğuldurlar, inhisarçılığın kökünü kəsmək mümkün deyil. Deputat onu da bildirib ki, Azərbaycan parlamentinin özündə bizneslə məşğul olan deputatlar çoxdur, baxmayaraq ki, bu, qanunla qadağandır:
“Pul qazanmaq istəyirsən, istefa ver, get bizneslə məşğul ol. Amma yox, onlar inzibati rıçaqlardan, oturduqları kresloların onlara verdiyi imtiyazlardan istifadə edirlər”.
Vahid Əhmədov həmçinin razılaşıb ki, xeyli sayda vətəndaşın pensiyası və maaşı onların normal yaşamasına imkan vermir. “Təqaüdçülərə belə pul verilməlidir ki, onlar yaşasınlar, xalq arasında dediyimiz kimi sürünməsinlər”.
Millət vəkili vurğulayıb ki, Azərbaycanda “kölgə” iqtisadiyyatının çox böyük payı var. Onun fikrincə, bu fenomen olmasaydı, ölkənin dövlət büdcəsinin həcmi iki dəfə çox ola bilərdi.
Əhmədov ölkənin siyasi həyatındakı problemlərə də toxunub. O qeyd edib ki, ədalətli seçkilərdə həm iqtidar, həm də AXCP və Müsavat kimi radikal müxalifət partiyaları həqiqətən də səs toplaya bilər.
Azərbaycanın xarici siyasətindən danışan millət vəkili bildirib ki, hazırda ölkənin əsas problemi Qarabağ məsələsinin başa çatdırılması, işğaldan azad edilmiş ərazilərin bərpa olunmasıdır.
“Bizi dost olmayan ölkələr – Ermənistan, Rusiya, İran əhatə edir. Hətta qardaş və ən yaxın dövlət hesab etdiyimiz Türkiyənin də Azərbaycanda öz maraqları var”, – deyə Vahid Əhmədov əlavə edib.
Vahid Əhmədov kimdir?
Vahid Əhmədov 1991-ci ildə Azərbaycanın Müstəqillik Aktının hazırlanmasında iştirak edib, müstəqilliyin lehinə səs verib. 1991-ci ildə SSRİ-nin saxlanmasının əleyhinə səs vermiş 43 istiqlalçı deputatdan biridir.
Elçibəy hakimiyyəti dövründə (1992-ci il) Baş nazirin birinci müavini təyin olunub.
76 yaşlı Vahid Əhmədov 2005-ci ildən ardıcıl olaraq Azərbaycan parlamentində təmsil olunur. O, 1990-1995-ci illərdə də Azərbaycan parlamentində yer alıb.
2020-ci ilin növbədənkənar parlament seçkilərində təkrar 52 saylı Quba seçki dairəsindən Milli Məclisə mandat alıb.
Parlamentdən reaksiyalar
Milli Məclisin bu gün keçirilən plenar iclasının böyük hissəsi Vahid Əhmədovun müsahibəsinin təfərrüatlarının müzakirəsinə sərf olunub.
Millət vəkili, Milli Məclisin İntizam Komissiyasının sədr müavini Fəzail Ağamalı Əhmədovu tənqid edərək bildirib ki, onun müsahibəsi “Milli Məclisə kölgə salır, həm də dövlətin apardığı siyasətə şübhə toxumu səpir”:
“Vahid Əhmədov ölkə prezidentinin sosial siyasətinə kölgə salır. Belə çıxır ki, uzun illər həyata keçirilən sosial siyasət heç bir nəticə verməyib. Onun bu müsahibəsi Milli Məclisin nüfuzuna da xələl gətirir, onun legitimliyi sual altına alınır. Azərbaycanda yalnız 3 nəfərin Milli Məclisə seçkilərdə ədalətli səs qazandığını söyləyir, digər parlament üzvlərinin səs qazanmasını şübhə altına alır”.
“Mən bütün suallara cavab verilməsi üçün İntizam Komissiyasının sədr müavini kimi xahiş edirəm ki, məsələnin İntizam Komissiyasında müzakirə olunması üçün müvafiq tapşırıqlar verilməsinə imkan yaradasınız”, – Meydan TV-nin məlumatına görə Ağamalı qeyd edib.
Hakim Yeni Azərbaycan Partiyasından olan deputat Siyavuş Novruzov bloqer Mehman Hüseynovla bağlı xoşagəlməz sözlər deyib:
“Bu gün Azərbaycana qarşı olan adamlara müsahibə verməyə nə ehtiyac var? Milli Məclisdə 30-dan artıq qeydiyyatdan keçən jurnalist, televiziya kanalları var. Hər biri də deputatların çıxışlarını, rəylərini yayır, hamı da qulaq asır. Dələduzun birinə müsahibə vermək nəyə lazımdır? Nə milliyyəti məlumdur, nə təhsili var, bu kimdir? Bunun hansı sənəti var, niyə ondan qorxursunuz, nədən qorxursunuz? Gərək, belə şeylərdən uzaq olaq, belə şeylərə diqqət edək”.
Vitse-spiker Fəzail İbrahimli Vahid Əhmədovun cəzalandırılmasını təklif edib:
“Vahid müəllim tələyə düşən oğlan deyil. Nə edirsə, bilərəkdən edir, nə danışırsa, bilərəkdən danışır. Bu, təsadüfi hadisə deyil. İnsanların heysiyyatına toxunmaq səlahiyyətini sizə kim verib?
Deyirsən ki, buradakı 3 nəfərdən başqa hamı saxtakardır. Niyə mənim heysiyyatıma toxunursan? Deyirsiniz ki, dövlətin yanındasınız. Parlament də dövlətin bir qoludur.
Adama deyərlər ki, bəyənmirsən, oturma da. Sənin vicdanın bu şeylərə dözmürsə, açıq şəkildə mandatını qoy, get. De ki, özümlə bacarmadım.
Sizin maddi durumunuz hamıdan yaxşıdır. Vəzifəniz, statusunuz var. Adamdan soruşarlar, nə istəyirsən? Nədir səni qane etməyən?
Azərbaycan parlamentində oturub, onun ünvanına bu cür ifadə işlədən hər bir kəs cəzasını almalıdır. O cümlədən, İntizam Komissiyasında bu məsələyə baxılmalıdır”, – deyə İbrahimli çıxışını yekunlaşdırıb.
Spiker Sahibə Qafarova müzakirə olunan məsələyə Milli Məclisin İntizam Komissiyasında baxılmasını təklif edib.
Vahid Əhmədov necə cavab verib?
Deputat Vahid Əhmədov isə müvafiq komissiyada məsələsinə baxılmasına etiraz etmədiyini deyib:
“Həm Milli Məclisdə, həm də mətbuatda hamıya aydındır ki, mən hansı mövqedə olmuşam. Burada Fəzail Ağamalı elan etdi ki, mənim məsələmə İntizam Komissiyasında baxılsın, etiraz etmirəm, baxsınlar. Mən bütün suallara cavab verməyə hazıram”.
