Bayraqlar, şüarlar və meyvələr: xaricdə erməli-azərbaycanlı münaqişəsinə nə səbəb olur?
Ermənistan və Azərbaycan arasında hərbi toqquşmalardan sonra ötən həftə müxtəlif ölkələrdə yaşayan ermənilər və azərbaycanlılar arasında münaqişəli vəziyyətlər silsiləsi yaşanmağa başlayıb.
“Moskvada ərik müharibəsi”
Rusiyada ermənilərlə azərbaycanlılar arasında ötən həftənin sonunda Moskvanın “FoodSity” bazarında yaşanan münaqişəni belə adlandırırlar. Bu bazar əslən Azərbaycandan olan biznesmenlər Qod Nisanov və Zaxar İliyevə məxsusdur.
Cümə günü bazar rəhbərliyi erməni yüklərinə kompleks ərazisinə daxil olmağa qadağa qoyub. “Food Sity” administrasiyası atdığı addımı təhlükəsizlik tədbiri kimi izah edib.
Tez xarab olan məhsulla – əsasən ərik və gilasla dolu 50-dən çox yük maşın bazara buraxılmayıb. Məhsulun bir hissəsini xilas etmək mümkün olub – Moskvanın digər ticarət mərkəzləri, məsələn, etnik erməni olan biznesmen Samvel Karapetyana məxsus olan “Buxta” bazarı qəbul edib.
Rusiyanın “Novaya qazeta” nəşrinin yazdığına görə, bazarda “ərik müharibəsinin” izləri ilk baxışdan gözə dəymir. Milli zəmində münaqişənin nəticələrini yalnız erməni mağazaların üzərində lövhələrin olmaması xatırladır, səsgücləndirici ilə reklam da səsləndirilmir. Ermənistandan gətirilən məhsulların satıcıları kəskin azalan satışdan şikayətlənirlər.
Hərçənd onlar bildirirlər ki, qalan məsələlərdə isə bazar administrasiyasının münasibəti tam hörmət çərçivəsindədir, qonşu pavilyonlardakı azərbaycanlı həmkarlarla da münaqişə yoxdur. “İşləyirik və bütün millətlərdən olan hər kəslə işləyirik, bunun fərqi yoxdur”. Azərbaycanlı satıcılar da təxminən eyni şeyi deyirlər.
Ermənistandan gələn yük maşınları ilə bağlı hadisədən sonra növbəti gün Moskva Ticarət və Xidmət Departamentinin rəhbəri Aleksey Nemeryuk bəyan edib ki, Ermənistandan gələn malların “Food Sity” bazarında satılması üçün artıq heç bir problem yoxdur. Ermənistanın Rusiyadakl səfiri Vardan Toqanyan da münaqişənin yoluna qoyulması haqda məlumat verib.
Amma onun sözlərinə görə vəziyyət tam həll olmaylb: “Bizim vəzifəmiz bu ticarət mərkəzinin ərazisində Rusiya qanunvericiliyinin qələbə qazanmasıdır. Bəli, hələlik hər şey sakitdir, amma biz bilmirik ki, əgər bizim sahibkarlarımız yenidən ora mal göndərsələr, fasiləsiz iş təmin ediləcək, yoxsa yox”.
London, Los-Anceles, Kişinyov
Cümə günü isə Ermənistan və Azərbaycan əsilli insanlar arasında Londonda dava düşüb. Toqquşma Azərbaycanın Böyük Britaniyadakı səfirliyi qarşısında baş verib. Azərbaycan mediasının yaydığı xəbərə görə, etiraz edən azərbaycanlılar ermənilərin hücumuna məruz qalıb. Ermənistan mediası isə bildirir ki, davanı azərbaycanlılar təhrik edib.
İyulun 21-də ABŞ-da, Los-Ancelesdə də ermənilər və azərbaycanlılar arasında toqquşma baş verib. Azərbaycan konsulluğundan zərərçəkənlər haqda məlumat verilib – polis əməkdaşları və yeddi azərbaycanlı xəsarət alıb. Azərbaycanın Los-Ancelesdəki baş konsulluğunun əməkdaşı “Kavkazskiy Uzel”ə bildirib ki, mitinqin erməni və azərbaycanlı iştirakçıları qarşılıqlı olaraq Dağlıq Qarabağla bağlı şüar səsləndirəndən sonra daa başlayıb.
İyulun 22-də Kişinyov polisi Ermənistanın Moldovadakı səfirliyinin qarşısında keçirilən mitinqdə münaqişənin qarşısını ala bilib. Amma daha sonra Azərbaycanın Moldovadakı səfiri Qüdsi Osmanov bəyanatla çıxış edib və Moldova siyasətçilərini erməniyönlü mövqedə ittiham edib. Onun sözlərinə görə, iqtidarda olan Sosialistlər Rartiyasının deputatı Hayk Vartanyan və Moldova prezidentinin müşaviri Ernest Vardanyan Ermənistanın maraqlarını açıq şəkildə dəstəkləyirlər.
