Azərbaycanlı fəalın şübhəli ölümü Türkiyə parlamentinin gündəmində
Müxalif deputat Türkiyə daxili işlər nazirinə Bayram Məmmədovun ölümü ilə bağlı sorğu ünvanlayıb
Heykəl məhbusu kimi tanınan azərbaycanlı fəal Bayram Məmmədovun İstanbulda baş vermiş müəmmalı ölümü Türkiyə parlamentində müzakirə olunub.
Təşəbbüslə çıxış edən müxalif Xalqların Demokratik Partiyasının (HDP) İzmir deputatı Murat Çepni bunları bildirib:
“Məmmədovun ölümündən 10 gün öncə onunla birlikdə eyni cinayətdən mühakimə olunmuş dostu Qiyas İbrahimov heç bir səbəb göstərilmədən deportasiya olunub və bir daha Türkiyəyə daxil ola bilməyəcəyi özünə bildirilib. Bayramın atası Fərman Məmmədov oğlu ilə sonuncu dəfə 1 may 2021-ci il tarixində danışdığını və onun bir həftə ərzində Bakıya gəlməyi planlaşdırdığını açıqlayıb. Yaxınları üstəlik Məmmədovun MİT tərəfindən izləndiyini, daha əvvəl İstanbul hava limanında vəzifəli şəxs tərəfindən sorğuya çəkildiyini də bildirirlər”.
“Bayram Məmmədov Azərbaycan ictimaiyyətinin yaxından tanıdığı və xarici ölkələrdə fəaliyyəti təqib edilən bir insan haqları müdafiəçisi olduğu; Azərbaycan mətbuatında dərc olunan xəbərlər və Emniyyet Müdürlüyünün (Polis İdarəsi) hadisəni intihar, sonra da qəza olaraq açıqlamasından irəli gələrək, hadisənin üstünün örtülməyə çalışıldığı təəssüratı yaranıb”, – deyən Çepni bildirib ki, Məmmədovun ölümü ilə bağlı ətraflı araşdırma aparılaraq, şübhələrin aradan qaldırılması gərəkdir.
Deputat Çepni Bayram Məmmədovun ölüm şəraitinin və səbəblərinin aydınlaşdırılması ilə bağlı Türkiyə daxili işlər naziri Süleyman Soyluya doqquz sualdan ibarət sorğu ünvanlayıb. Sorğuda gəncin ölümünün ətraflı araşdırılması üçün Azərbaycan höküməti ilə danışıqların, əməkdaşlığın aparılıb-aparılmadığı haqda sual da yer alıb.
Nə baş verib?
Bir müddətdir ki, təhsil səbəbilə Türkiyədə yaşayan gənc fəal Bayram Məmmədovla mayın 2-dən etibarən əlaqə kəsilib. Mayın 5-də onun İstanbulda dənizdən ölü tapılması haqda məlumat verilib.
Rəsmi açıqlamaya görə, Bayram Məmmədov mayın 2-də Kadıköy Moda sahilində oturarkən başmağı dənizə düşüb, onu götürmək üçün suya atılan gənc bir müddət üzdükdən sonra gözdən itib. Sahil mühafizə xidmətinin əməkdaşları hadisə yerinə gəlib, bir qədər aralıda onun cansız bədənini sudan çıxarıblar. Üzərində sənədi olmadığı üçün kimliyi naməlum şəxs kimi morqa yerləşdirilib.
Yaxın dostlarının axtarışı nəticəsində tapılan meyitin Bayram Məmmədova məxsus olduğu müəyyən edilib və üzərində məhkəmə-tibbi ekspertiza aparılandan sonra ailəsinə təhvil verilib. Bayram Məmmədovun cənazəsi mayın 9-da Bakıya gətirələrək burada dəfn edilib.
Əsassız intihar iddiaları
Azərbaycanda hakimiyyətyönlü media Türkiyədən rəsmi açıqlama gəlmədən hadisəni intihar kimi qələmə verib.
Halbuki Bayram Məmmədov Böyük Britaniya universitetlərindən birində stipendiya qazanmışdı və yaxın zamanda təhsilini orada davam etdirməyi planlaşdırırdı. Bir gün öncə atası ilə son telefon danışığında isə Bayram bir həftə ərzində Bakıya gələcəyini bildirib. Dostları və doğmaları Bayram Məmmədovun intihar etdiyinə qətiyyən inanmır.
Hadisə ilə bağlı qaldırılmış cinayət işində də hadisə “intihar” kimi yox, şübhəli ölüm kimi təsbit edilib.
“Mühafizə xidməti əməkdaşları öz ifadələrində də Bayram dənizdə boğulmağa başlayarkən onlar qurtulması üçün ona müəyyən yol göstərdiklərini, Bayramın da buna cavab verdiyini, qurtulmağa çalışdığını, amma təəssüf ki, bacara bilmədiyini deyiblər. Yəni bu hadisənin intihar olmadığı artıq dəqiqdir”, – Bayram Məmmədovun ölümü ilə bağlı ailəsinin vəkili Çiydəm Akbulut bildirib.
Vəkilin sözlərinə görə, sahildə vəzifə başında olan mühafizə əməkdaşlarının öz ifadələrinə görə, “üzə bilmədikləri üçün” Bayramı xilas etməkdən ötrü suya atılmadıqları və sadəcə, sahildən sözlü yardım etməyə çalışdıqları da məsələnin şübhəli tərəflərindən biridir.
Akbulut onu da qeyd edib ki, hələlik Bayram Məmmədovun dənizdə boğulduğu sahildəki mühafizə kameralarının görüntüləri və cəsəd üzərində aparılmış məhkəmə-tibbi ekspertizasının rəyi onlara təqdim olunmayıb.
“Ekspertiza rəyinin açıqlanmasının üç-dörd ay çəkəcəyi də bildirilir”, – Çiydəm Akbulut əlavə edib.
Azərbaycan və Türkiyədə gənc fəallar sosial şəbəkələrdə Bayram Məmmədovun ölümünün aydınlaşdırılması üçün #BayramaNeOldu kampaniyasını davam etdirirlər.
Bayram Məmmədov kimdir?
Bayram Məmmədov 2016-cı ildə Qiyas İbrahimovla birlikdə həbs edildikdən sonra tanınıb. Onlar eks-prezident Heydər Əliyevin doğum günü və bunun şərəfinə hər il qeyd olunan “Gül bayramı” ərəfəsində H.Əliyevin heykəlinin üzərinə “Qul bayramınız mübarək” sözlərini yazmışdılar.
Bundan dərhal sonra narkotik alveri ittihamı ilə həbs olunan fəallar 10 il müddətinə azadlıqdan məhrum edilmişdilər. Həbsdə olduqları müddətdə hər iki gənc ağır işgəncələrə məruz qalıb.
Amma həmin ildən etibarən Azərbaycanda hər il milyonlarla manat büdcə vəsaiti hesabına keçirilən “Gül bayramı” ləğv edilib.
Bayram Məmmədov və Qiyas İbrahimov 2019-cu ildə əfv fərmanı ilə azadlığa buraxılıblar. Hərçənd azadlığa buraxılandan sonra da bir neçə dəfə qısamüddətli həbs yaşayıblar.
