Azərbaycandan viski ixracı cəmi bir ilə 20 dəfə artıb. Səbəb nədir?
Azərbaycandan viski ixracı
Azərbaycandan viski ixracı cəmi bir ilə 20 dəfə artıb. Üstəlik bu alkoqol məhsulu ixracının 98,3%-i Rusiyanın payına düşür. Ən maraqlısı odur ki, azərbaycanlıların əksəriyyəti yerli viski istehsalından xəbərsizdir. İqtisadçı Natiq Cəfərlinin fikrincə, Rusiyaya qarşı Qərbin sanksiyaları ona gətirib çıxarıb ki, “Rusiya bazarlarında böyük boşluq yaranıb və Azərbaycan onu doldurmağa çalışır”.
- Dövlət Departamenti azərbaycanlı aktivist Salayevin işini “diqqətlə izləyir”
- “Çirkli əllərinizi “Georgian Airways”dən çəkin!” – Gürcüstanda Rusiyaya uçuşlar ətrafında qalmaqal
- “Qabıq atan ayaqqabıların təmiri yorucu olur”
Rəsmi statistikaya görə, 2022-ci ildə Azərbaycandan viski ixracının həcmi 1,22 milyon litr təşkil edib. Bir il əvvəl eyni göstərici 61,2 min litrə bərabər idi. Başqa sözlə, ölkə 2021-ci ildəkindən 20 dəfə çox viski ixrac edib. Bu növ spirtli içkilərin bütün ixracının 98,3 faizi təkcə Rusiyanın payına düşür.
Ekspertlər, demək olar ki, bütün Qərb ölkələrinin – bu məhsulun əsas istehsalçılarının ciddi sanksiyalar tətbiq etdiyi Rusiyaya viskinin təkrar ixracı versiyasını dərhal təkzib edirlər. Sadə səbəbdən Azərbaycan bu qədər böyük həcmdə viski idxal etmir. Belə çıxır ki, ölkə həqiqətən də istehsalın həcmini görünməmiş miqyasda artırıb.
Azərbaycan Dövlət Statistika Komitəsinin məlumatına görə, 2022-ci ildə respublikadan Rusiyaya 10,59 milyon dollar dəyərində spirtli içkilər ixrac edilib. Bu, 2021-ci illə müqayisədə təxminən 3,3 dəfə çoxdur. Rusiyaya kəmiyyət baxımından 430,81 min dekalitr alkoqollu içkilər göndərilib ki, bu da 2021-ci illə müqayisədə təxminən iki dəfə çoxdur.
“Alkoqol ixracı daha da arta bilər”
İqtisadçı ekspert Natiq Cəfərli belə kəskin artımın səbəblərini açıqlayıb.
“Birincisi, Azərbaycan son illər alkoqol ixracatçılarının məsuliyyətinin artırılmasında mühüm irəliləyiş əldə edib. İkincisi, sanksiyalara görə Rusiyaya bir sıra ölkələrdən spirtli içkilərin ixracı dayandırılıb. Bu ona gətirib çıxarıb ki, Rusiya bazarında möhkəm boşluq yaranıb və Azərbaycan onu doldurmağa çalışır”, – ekspert bildirib.
Onun sözlərinə görə, spirtli içkilərin ixracı daha da arta bilər, çünki bu, çox gəlirli maddədir və Rusiya bazarı çox böyükdür.
Azərbaycanın özündə yerli viskini tanımırlar
JAMnews-un müxbiri spirtli içki həvəskarı sayılan onlarla tanışına “Rastınıza Azərbaycan viskisi çıxıbmı?” sualı ilə müraciət edib.
Bütün respondentlər nəinki mənfi cavab veriblər, hətta belə məhsulun mövcudluğuna təəccübləniblər. Bakı barları ənənəvi olaraq tanınmış Qərb brendlərini təklif edir.
Bu arada məlum olub ki, nisbətən yaxın vaxtlardan Azərbaycanın iki müəssisəsi viski istehsalı ilə məşğul olur.
Belə ki, Polşanın paytaxtı Varşavada keçirilən Whiskey Live Warsaw sərgisində Azərbaycan viskisi təqdim olunub. Bu barədə ölkənin İqtisadiyyat Nazirliyi məlumat yayıb.
Azərbaycan viskisi Rusiyada populyarlaşır
Ekspert Abbas Quliyevin fikrincə, bu statistik göstəriciləri Azərbaycan sahibkarlarının çevikliyi ilə izah etmək olar.
“Rusiya böyük bazardır. Rus alıcının spirtli içkilərə ənənəvi sevgisini nəzərə alsaq, o zaman sanksiyalara görə elit içkilərin çox böyük qıtlığı yaranıb.
Rusiya özü yerli bazarı araqla təmin edə bilir, lakin yaxşı şərablar, konyak, viski – bu seqmentlərdə ruslar idxala üstünlük verirlər.
Əgər Azərbaycan sahibkarları bu qədər qısa müddətdə öz istehsallarını qonşu ölkənin bazarının tələblərinə uyğunlaşdıra biliblərsə, onlara halal olsun. Amma yerli bazarı da düşünsək pis olmaz”, – deyə Quliyev bildirib.
